Жақсы тілек, жарасымды құрмет

Азия ойындарында қазақ­стандық­тардың жеңіп алған 70 медалінің тең жартысы кенді Алтай шеберлерінің үлесіне тиесілі. Алматы мен Астанада өткен Ақ Азиадаға Шығыс Қазақстан об­лы­сынан 47 спортшы аттанған еді. Оның ішінде: шаңғы жары­сынан 6, тау шаңғысынан 1, биатлоннан 4, фристайл бойынша 4, қысқы спорттық бағдарлаудан 3, қыздар арасындағы шайбалы хоккейден 5, допты хоккейден 1 адам қатысты. Хоккейден Қазақстан құрамасының сапында жүрген жігіттеріміз тағы бар. Жерлестеріміз намысты жанып, 15 алтын, 11 күміс, 7 қола барлығы 33 медалға ие болды. Шығыс Қазақстан облысының әкімі Бердібек Сапарбаев ел намысын жоғары ұстап, айшықты бәсекелерде топ жарған саңлақ­тарға ел есінде қаларлықтай құр­мет көрсетті. Чартерлік рейспен топ жарған спортшылармен бірге қазақтың даңқты балуаны Дәулет Тұрлыханов, әнші Роза Рымбаева, ақын Ұлықбек Ес­дәулет бірге ұшып келді. Өңір басшысы Бердібек Мәшбекұлы 33 медальді қоржынға салған жерлестерімізді әуежайда қарсы алып, құт­тық­таған соң айшықты топ орта­лықтағы Республика ала­ңына бет алды. Бұл жерде 5 мыңға жуық өскемендіктер үкі­леген үмітті ақ­тап, бай­ра­ғы­мыз­ды көкке көтер­ген саңлақтарды күтіп тұрған. Роза Рымбаева, Ерболат Құдай­бер­ген, басқа да әншілер сахна тө­рінде ән шырқады. – Кенді Алтайдың спорт­шы­лары байрақты бәсекелерде үнемі топ жаратыны белгілі. Олимпиада чемпионы Борис Александров, мұхиттың арғы жағында өнер көрсетіп жүрген атақты хоккейшілеріміз ел мақтанышы. Азия ойындарында шаңғышы Алексей Полторанин 4 алтын, 1 қола медальді, Оксана Яцкая мен Елена Коломина әрқайсысы 2 алтын, 2 күміс, 1 қоланы жеңіп алса, фристайлдан Юлия Галышева 2 алтын, 1 күміс, Дмитрий Бармашов 1 ал­тын, 1 қола, Дмитрий Рейхерд 1 ал­тынды жеңіп алды. Сонымен бірге, биатлоннан Ольга Полторанина, Инна Можевитина, Ян Савицкий әрқайсысы бір-бірден ал­тын алқаны иеленді. Қысқы спорт­тық бағдарлау бойынша жер­лестеріміз, алтын, күміс, қо­ласы бар 8 алқаны омырауларына тақты. Тау шаңғысы спортынан да 5 медалға ие болдық. Жер­лестеріміздің бұл жеңісті жол­дары енді 3 жылдан кейін Ре­сейдің Сочи қаласында өтетін Ақ Олимпия ойындарында жалғасса деген ниеттеміз, – деді облыс әкімі Б.Сапарбаев. Бұдан кейін сахна төріне же­ңімпаздар шақырылды. Өңір бас­шы­сы А.Полторанин, О.Яцкая, Е.Коломина, Ю.Галышеваға су жаңа шетел көліктеріне қоса қо­мақты қаржы ұсынды. Атап айтқанда, Алексейдің бір өзі 2 млн. 200 мың теңгенің сер­ти­фи­катын алды. Басқа спортшылар мен жеңімпаздардың бапкерлері де сыйақыға ие болды. Одан кейін түнгі Өскемен аспанында от шашу шалықтап, әсем әнге кезек берілді. Оңдасын ЕЛУБАЙ, Өскемен.