«Биле, Қазақстан!»

ең үздік өнер иелерін анықтайды «Биле, Қазақстан!» жобасы талай жұртты мойындатқан, көптеген елдерде өз кө­рермендерін жинап, таңғалдыра білген музыкалық жоба. «Хабар» арнасы талғамы жоғары көрермен үшін тағы бір тың дүние әзірлеп жатыр. Күзгі маусымда көпшілік назарына «Биле, Қазақстан!» деп аталатын жаңа бағдарлама ұсынылады. Халықаралық жоба шетелдік би жарысының Орталық Азия ау­­мағындағы алғашқы нұсқасы болмақ. Әй­гілі «Эндемол» компаниясы би байқауын Қазақстанда ұйымдастыруға келісімін берді. Бұл – «Хабар» агенттігінің бірнеше жыл бойы жүргізген келіссөзінің нәтижесі. Бағдарлама Қытай, Австралия, Ұлыбритания сынды әлем­нің 37 елінде көрсетіліп, ең жоғары рейтингтерге ие болған. Ал елімізде өтетін би жарысына 10 жастан асқан кез келген азамат қатыса алады. Басты талап – жеңіске деген ұмтылыс пен өнерге құштарлық», – дейді ұйымдастырушылар. «Биле, Қазақстан!» жобасына қатысушы­лардың өнеріне әйгілі бишілер баға береді. Қазы­лар алқасының құрамына шетелден арнайы маман шақыртылған. Байқауға алыс және жақын мемлекеттерден ынталанған өнер иелері де қатыса алады. Жоба мақсаты – еліміздің барлық тұр­ғын­дарын би билеп, саламатты өмір салтын ұс­тану­ға шақыру. Әлеуметтік жоба би билеу ар­қы­лы қазақстандықтарды бірлікке, достыққа шақырады. Шоудың төлнұсқасы бірінші рет 2005 жылы АҚШ-та «So You Think You Can Dance» деген атаумен көрсетілген. Жоба 10-нан астам «Эмми» жүлдесін алған. Қазақстан бойынша бұл байқауға іріктеу кезеңдері Астанада шілденің 23-і мен 24-і аралығында, ал Алматыда 30-31 шілдеде өтеді. Естеріңізге салайық, «Биле, Қазақстан!» шоуы арнаның эфирінен күзгі телевизиялық маусымның басында көрсетілетін болады. Байқаудың іріктеуі Қазақстанның үш қаласында өтеді: Астанада – 23 және 24 шілде, Алматы – 30 және 31 шілде, сондай-ақ, 6 және 7 тамызда көрермендер дауыс беру арқылы таңдаған үшінші қалада. Іріктеу айналымдарынан кейін 60 қатысушы арнайы жабдықталған үйге шақырылып, онда танымал хореографтардың басшылығымен өнер көрсетуге жаттыға бастайды. Кезеңнің қоры­тындысы бойынша 20 қатысушы (10 жігіт және 10 қыз) келесі айналымға өте алады. Үшінші кезеңде жиырма қатысушы жұп-жұпқа бөлініп, әр апта сайын көрермендер мен қазыларға түрлі жанрдағы би нөмірлерін (балет, контемпорари, хип-хоп, брейк-данс, джаз, бал билері және басқалары) көрсететін болады. Қазыларды таң қалдыра алмаған қатысушылар жобадан кетеді. Финалдық шығарылымдарда бишілер жеке-жеке 1-орын үшін бәсеке-додаға түспек. «Биле, Қазақстан!» шоуы арнаның эфирі­нен күзгі телевизиялық маусымның басында көрсетіледі деп ұйғарылған. Гүлзейнеп Сәдірқызы, «Егемен Қазақстан» АЛМАТЫ