Күркіреген күн. Қою бұлт және... бармақтай бұршақ

  Бұрнағы күні Алматы­дағы аспан төрі қақ айырыла күркіреп елді таң қалдырды. Іле-шала көк жүзін бұрын-соңды байқалмаған қара түнек бұлт тұмшалап, ара-тұра найзағай ойнап, жаң­быр шелектеп төгіп берді. Сол-ақ екен, дауыл соқты. Үлкен көшелерге ілінген бильбордтар құлап, жел шайқаған ағаш­тардың бұтағы морт-морт сына бастады... Көп кешікпей қалалық ТЖД ресми өкілі Сандуғаш Бай­мұ­хамбетова «112» қызметі арқылы мәлімет таратты. Небәрі бір сағаттай болған жаңбыр араласқан дауылда қа­ла бойынша 24 ағаш құлапты. Оның 16-сы жол жиегінде, аулаларда қаңтарулы тұрған жеңіл автокөліктердің үстіне тү­сіп елеулі зақым кел­тір­ген. Жел қаңбақтай ұшыр­ған жаздық шатырлар да бар­шылық. Абырой болғанда, зардап шеккен адам жоқ. Жаңбырлы дауылдың күш­тілігін Алатаудың етегін ала орналасқан Наурызбай ауда­нының тұрғындары айрықша сезді. «Қалқаман» шағын ауданында дауылмен, жаңбырмен араласып торғайдың басындай бұршақ жауды. Электр желісінде өрілген сым темірлер желден соқтығысып жарылыстағы секілді қатты дыбыстар шықты. Дауыл да, жаңбыр да бір сағаттың айналасында сап тиылды. Табиғаттың бұл тосын құбылысын таңертеңгі атыс­тан үрейленіп үйден шықпай отырған қала тұрғындары әлі күнге дейін әрі-сәрі күйде түсіне алмай жүр... Талғат СҮЙІНБАЙ, «Егемен Қазақстан» АЛМАТЫ