Бір күндік жалақыларын аударды

Астана қаласы ішкі істер департаментінің басшылығы мен жеке құрамы Алматы қаласындағы қайғылы оқиғалардың салдарынан қаза тапқан әріптестерінің отбасыларына қаржылай көмек көрсету туралы шешім қабылдады. Осыған орай елордалық ішкі істер департаментінің басқару құрамы қаза тапқан полицейлер: полиция капитаны Бауыржан Нұрмұханбетов, полиция кіші сержанты Мақсат Сәлімбаев пен полиция старшинасы Аян Ғалиевтың отбасыларының шотына бір күндік жалақыларын аударды. Сонымен қатар, елордалық 60-тан астам полиция қызметкері 20 литрге жуық қан тапсырды. Бұл басшылық пен полиция қызметкерлерінің ерікті түрде қан тапсыру акцияларына алғаш қатысуы емес. «Осындай игі акцияға қатыса отырып, біз ең алдымен көмекке зәру жандарға көмектесуге, қызметтік міндетін атқару кезінде жараланған әріптестерімізге барынша жәрдемдесуге тырысамыз», дейді олар. Бүгінгі іс-шара да осының айқын дәлелі, деп хабарлады Астана қаласы ІІД баспасөз қызметі.