Кәріздің кінәраты

Көлкілдеген көшелер өскемендіктерге Венецияны еске салды Соңғы күндері өр Алтай­дың асқақ шыңдарын жиі бүр­кеп алатын көкшулан бұлт­тар шығысқазақстандық тұр­ғындардың жазғы демалысын ойдағыдай өткізуіне мүмкіндік бермеуде. Әлбетте, табиғаттың жаратылысына мойынұсынбасқа лажымыз жоқ. Десе де, қала инфрақұрылымының қолайсыздық тудыруы жергілікті әкімдіктің әрекетсіздігінен бе деген ойға қалдырады. Айталық, газетімізде «Нөсер нөпірі» (8 шілде, 2016 жыл) атты мақаламызда қалың жауған жауыннан көшені көл­кілдеген су алғандықтан кәріз жүйелерінің жұмысында кінәрат барлығын жазған едік. Алайда, жөнделген немесе тазаланған арық жоқтығы тағы белгілі болды. Бұрнағы күні түс әлетінде бір сағатқа жетер-жетпес жауын-шашында облыс орталығының көшелеріндегі көліктер көрген жанға жүзіп жүргендей әсер қалдырды. Бейнебір Өскеменде емес Венецияда жүргендейміз, деседі тұрғындар. Атап айтқанда, толассыз жаңбырдан Жаңа Согра, Мирный кенті, қаладағы Тәуелсіздік даңғылы мен Михаэлис көшесі және басқа да жерлерді су бас­ты. Тәуелсіздік даңғылында көлік кептелісі орын алды. Осында келе жатқан біз тізеден су кешкен тұрғындарға, белуарынан малтығып жан-жағына су шаша қозғалған көліктерге куә болдық. Жеке секторлардағы үйлердің іргетасына көтерілген су жертөлелерге де құйылды. Қалалық төтенше жағдай бас­қармасы Аврора көшесінің тұрғыны көмек сұрағанын, ауласындағы 65 сантиметрлік биіктікке көтерілген суды сор­ғызып алғанын айтады. Ал көшедегі судың деңгейі 85 сантиметрге дейін көтерілген болатын. Жалпы, құтқарушылар жеке үйлер иелерінің табиғаттың тосын райы­на кез келген уақытта дайын болуын, суағар арықтар жасап, құм толтырылған қаптарды әзірлеп қою қажеттігін жеткізді. Ал біздің қос нөсерден түйген ойымыз – қала билігі көше жиектеріндегі арықтар мен кәріз жүйелерін жедел жаңғыртуды қолға алуы тиіс. Думан АНАШ, «Егемен Қазақстан» ӨСКЕМЕН