«Егемендегі» спартакиада

«Егемен Қазақстан» газетінде спорттан жарыстар ұйымдастыру дәстүрге айналған. Газетіміз жыл сайын еліміз бойынша ақпарат құралдары арасында өтетін көптеген турнирлер мен жарыстарға да белсене қатысып келеді. Ал биыл 95 жылдық тарихы бар аға газет өз қызметкерлері арасында спорттың бірнеше түрінен спартакиада өткізді. Оған редакция ұжымы төрт топқа бөлініп, бильярд, шахмат және дойбыдан жарыстарға қатысты. Спартакиада бір-екі күнде өтетін кубоктық жарыс емес, ол бірнеше күнге созылатыны белгілі. Биылғы жарыс та Байланыс және ақпарат қызметкерлері күніне орай өткізіліп, бірнеше күнге жалғасты. Кеше редакция қызметкерлерінің арасында өткен спартакиада мәресіне жетті. Онда журналистердің «Сұңқар» командасы бас жүлдені жеңіп алды. Екінші орынды хатшылық және әкімшілік бөлімдерінен құрал­ған «Жігер», үшінші орынды интернет-редакцияның жігіттерінен жасақталған «Ұшқын» командасы иеленді. Ал төртінші орынға журналистердің «Ұмтылыс» жасағы ие болды. Спартакиада соңында «Егемен Қазақстан» газетінің Басқарма төрағасы Дархан Қыдырәлі жеңімпаз бен жүлдегерлерді жарыста үздік атанған қызметкерлерді құттықтап, дипломдар мен бағалы сыйлықтар табыс етті. Бұл сында «Сұңқар» командасының ойыншылары Ғалым Омархан мен Ғабит Іскендерұлы, «Жігер» жасағының мүшесі Ахметқали Өтеғалиев бильярд­тан өткен бәсекеде үздік ойыншы атанды. Ал «Ұмтылыс» командасының өкілі фототілші Орынбай Балмұратқа шахмат жарысында тең келетін ешкім болмады. Ол ойындардың барлығын жеңіп, үздік ойыншы атанса, «Жігер» командасының мүшесі Фариза Ор­манова дойбы додасында жеке-дара шығып, үздік ойыншы деп танылды. «Егемен-ақпарат»