Бүгін Астанадағы Бокс орталығында Қазақстан ұлттық құрама командасы мен Колумбия, АҚШ, Мексика және Доминикан Республикасының боксшыларының арасында спарринг кездесулер өтті.
Осы жекпе-жектер туралы еліміздің ұлттық құрамасының бас жаттықтырушысы Мырзағали Айтжанов egemen.kz сайтына өз ойларымен бөлісті. Бас жаттықтырушы команданың оқу-жаттығу жиыны жоспарлы түрде болып жатқанын, енді Олимпиадаға дайындық Рио-де-Жанейро қаласында жалғасатынын айтты.
-Оқу-жаттығу жиыны жақсы өтіп жатыр. Бұл біздің еліміздегі Олимпиада алдындағы соңғы дайындығымыз. Қазір боксшылар жарысқа 70 пайызға дайын. Жігіттер өздеріне тиесілі тапсырмаларды орындады. Осы жаттығуларда біз өзімізге тиісті жұмыстарды бастан-аяқ жасап шықтық, – деді ол.
Сонымен бірге ол ұлттық құраманың дайындығына арнайы шақырылған шетелдің боксшылары туралы да айтты. «Біздің құрамамен оқу-жаттығу жиынында спарринг кездесулер өткізу үшін шетелдің 9 боксшысы шақырылған. Бұл боксшылар орта деңгейлі спортшылар. Олар боксшыларға көмектесіп жатыр. Шетелдіктерді Қанат Ислам әкелді. Қанаттың өзі келесі жекпе-жегіне АҚШ-та емес, Қазақстанда дайындалған жақсы деп жатыр», деді Мырзағали Айтжанов.
Дастан КЕНЖАЛИН
Фото: Қазақстан бокс федерациясы
