Электронды үкіметіміз үздік ондықта

Қазақстан электронды үкіметті дамыту жөнінен Азия мемлекеттерінің арасында 7-орынға шықты. Бұл туралы БҰҰ-ның электронды үкіметтердің даму деңгейі туралы есебінде айтылған. Біздің алдымызда әзірге Оңтүстік Корея, Сингапур, Жапония, Израиль, Бахрейн және Біріккен Араб Әмірліктері  тұр. Ал осы электронды үкіметті дамытуға қатысты жаһандық рейтингте Қазақстан ТМД елдерінің барлығын басып озып, 33-орынға іліккен. Бұл орайдағы көш тізгі­нін Ұлыбритания бастаса, одан кейінгі орындарда Австралия мен Оңтүстік Корея орныққан. Жаһан­дық рейтингте АҚШ  12-орын­да, Ресей  35- орында, Қытай 63-орында, Өзбекстан мен Қырғызстан 80 және 97-орындарға жайғасқан. БҰҰ электронды үкімет­тер­дің даму индексі (EGDI) – мемлекеттердің ақпараттық және коммуникациялық технологиялар арқылы азаматтарға мемлекеттік қызметтер көрсету әлеуетін және осы қызметтерді көрсетуге деген әзірлік деңгейін бағалайтын кешенді көрсеткіш. Осындай маңызды көрсеткіш­те  Қазақстанның композиттік индексі биыл 0,7250 балл болса, жаһандық орташа EGDI балы 0,4922 деңгейіне жеткен. Бұл индекс адам капиталының дамуы, телекоммуникациялық инфра­құрылым және онлайн қызметтер сияқты 3 көрсеткіштен құралады. Рейтинг пен оған қатысты көрсет­кіштерді әр екі жыл сайын БҰҰ сарапшылары есептеп, нәтижесін жариялап отырады.  «Егемен-ақпарат»