Суармалы алқапты кеңейту кенже қалуда

Биыл аймақта 561,2 мың гектар алқапқа егіс салу жоспарлануда. Бұл өткен жылмен салыстырғанда егіс алқабы 48,4 мың гектарға ұлғаяды деген сөз. Дәнді дақылдар 336 мың, малазығындық дақылдар 176,1 мың, майлы дақылдар 38,6 мың, картоп 5,75 мың, көкөністер мен бақша дақылдары 4,7 мың гектарға орналастырылады.   Егіс науқаны барлық аудан­дарда және Ақтөбе қаласы аума­ғын­да уақытында жүр­гізілді. Ауылшаруашылық құрылым­дары көктемгі дала жұмыстарын жүргізу үшін қажетті техникамен және жанар-жағар­маймен толы­ғымен қамтамасыз етіл­ді. Дән­ді дақылдар көзделген межеде толық себілді. Осыған байланысты Берді­бек Сапарбаев науқанды мейлінше қысқа мер­зім ішінде аяқтауды тапсырған болатын. Облыс басшысы бау-бақша және көк­өніс дақылдарына бө­лін­ген алаңдардың кеңейтудің мардымсыз жүргізіліп жатқанын  сын­­ға алды. – Осыдан кейін біз өз өңірімізді қажетті өніммен қамтамасыз ете алмаймыз, көкөністі басқа облыстардан тасуға мәжбүр боламыз. Мұндай жағдайдың неліктен орын алғанына талдау жасау керек, – деген еді. Шегірткемен күрес жүргізетін штаб құру бойынша шаралар алынуда. Облыс әкімінің орынбасары Асқар Шерияздановтың айтуынша, өңір шегірткемен күресу үшін қажетті химикаттармен және техникамен толығымен қамтамасыз етілген. Ең бастысы, облыстың қай аумағында болмасын шегірткенің пайда болуын дер кезінде қадағалап отыру. Б.Сапарбаев кеңес барысында суармалы және жайылма ал­қап­тарды айналымға қосу, облыс аумағымен өтетін өзендерді, әсіресе, құрғақшылықтағы Ыр­ғыз, Байғанин және Ойыл аудан­дарында дұрыс және тиімді пайдалану мәселелеріне ерекше назар аударды. Өткен жылы облыста қолда бар суармалы жерлердің жартысынан азы ғана пайдаланыл­ды. Ағымдағы жылы суармалы жер көле­мін 12 мыңнан 18,8 мың гектарға дейін ұ­л­­ғай­ту жоспарлануда. Бүгінгі күні 13,9 мың гек­­тарға әртүрлі ауылшаруашылық дақыл­дары егілді. 9 мыңдай гектарға жобалау-сме­та­лық құжат­тарды әзірлеу жұмыстары жүргізілуде. – Мемлекет басшысы суландырылатын алқаптар көлемін ұлғайту мәселесіне ерекше көңіл бөлуде, өйткені бұл азық-түлік қауіпсіздігін қамтамасыз етудің тиімді тетіктерінің бірі болып табылады. Талдау көрсеткеніндей, әзірге аудандардың барлығы бірдей биылғы жоспарларын орындаған жоқ. Ырғыз ауданында жоспар – 15, Алғада – 62, Ойыл және Қарғалы аудандарында 63 пайызға орындалды. Бұдан басқа, бір ауданнан да суландырылатын алқаптарды қосым­ша ұлғайту бойынша тапсырыс түскен жоқ. Ал мемлекет қазір бұл жобаны жүзеге асыру үшін қаржы бөліп, көмек көрсетуде. Сондай-ақ, бөгеттер құрылы­сы арқылы суландыруды дамы­ту мүмкіндігін қарастыруымыз қажет, – деп атап көрсетті өңір басшысы. Сатыбалды СӘУІРБАЙ, «Егемен Қазақстан» Ақтөбе облысы