15 Ақпан, 2011

Жақсы жағдай жан жадыратады

393 рет
көрсетілді
2 мин
оқу үшін
Тәуелсіз Қазақстанның Тұң­ғыш Президенті Нұрсұлтан Назарбаев «Нұр Отан» халықтық-демократиялық партиясының ке­­зекті ХІІІ съезінде қазақ­стан­дық­тардың денсаулығын нығай­туға медициналық қызметке қол­же­тім­ділік пен сапаны арт­тыруға қа­т­ысты әңгімелеп, 2013 жылға қарай алғашқы меди­ци­налық-са­ни­тарлық көмектің са­п­асын жо­ға­рылататын біртұтас ұлттық жүйе қалыптасты­рыла­тындығын атап көрсетті. Біздің саланың ны­сандары қарқынды салынып, заманауи құрал-жаб­дықтар алына­тындығын да жеткізді. Оның бәрі осы сала қыз­мет­керлерін қуа­ныш­қа бөлеп, жұ­мысымызға соны серпін беруде. Қамқорлық демекші, кеше облыс орталығының Ынтымақ алаңында облыс әкімі Қ.Көшер­баев облыстық аурухананың бас дәрігері С.Төралиевке жылжы­ма­лы медициналық кешеннің құжаттары мен автокөлікті сал­танатты түрде табыс етті. Жапонияда жасалған құны 86 млн. теңге тұратын бұл жылжымалы кешен түрлі сырқаттарды дәл анықтай алатын бірнеше заманауи құрал-жабдықтармен жаб­дық­талған. Қажет кездерде ауыл­дық жерлерге де еркін бара алады. Облыс басшысы шалғай­дағы Маңғыстау, Бейнеу аудан­дарына да дәл осындай екі кешен алынып берілетінін және облыс орталығына бір тікұшақ сатып алынатындығын жеткізіп, сала қызметкерлерінің жұ­мы­сына табыс тіледі. Ал көмек жайына келсек, алдыңғы күні облысымызға Астана, Алматы­дан келген медициналық ар­найы  жұмыс тобы түрлі ақыл-кеңестер беріп, семинар өткізу­мен қатар, кеше сол топтағы еліміздің бас онкологы Ж.Ар­зықұлов маңғыстаулық бір аза­маттың асқазанындағы қатерлі ісікке сәтті ота жасады. Осы саланың бюджеті мен құрылыстары жөнінде айтсақ, өткен жылы сала бюджеті 4 млрд. теңгені құрады. Үш аурухана, бір перзентхана, облыс­тық қан құю орталығы пайда­лануға берілді. Жақын күндері Форт-Шевченкода аудандық балалар ауруханасы мен облыс­тық онкологиялық диспансер құрылысы аяқталады. Қамқор­лық нәтижесінде жергілікті ма­мандарымыз өткен жылы өлке­де тұңғыш рет протездеу, ней­рохирургия, офтальмология са­ла­сының жоғары техно­ло­гиялық   түрлері бойынша түрлі көмектер көрсетіп, халықара­лық деңгейде қарым-қатынас жасауға қол жетті. Осынау жұмыстарды алдағы күндерде де Елбасы тапсыр­ма­сына орай жаңа сатыға кө­те­ре беруге жұмыстанатын бола­мыз. Оған мүмкіндік мол. Ынта-жі­гер де бар. Себебі, мемлекет та­рапынан жақсы жағдай жасалып отыр. С.МУСИНОВ, Маңғыстау облыстық денсаулық сақтау басқармасының бастығы.