Тайландқа сапар табысты өтті

Елордамызда Халықаралық маман­дан­дырылған көрме өткізу күні жақындаған сайын осы бір жаһандық шараға байланысты келіссөздер де кеңейе түсуде. Үстіміздегі жылдың 8-9 тамызы күндерінде «ЭКСПО-2017»-нің Комиссары Рәпіл Жошыбаев Тайланд Корольдігінде болып, бірқатар кездесулер өткізді. Сапар барысында, Рәпіл Жошыбаев Тайланд энергетика министрлігінің тұрақты хатшысы – ЭКСПО-2017 көрмесіндегі Тай­ланд секциясының Ұлт­тық комиссары Ареепонг Бхо­очаооммен, БҰҰ Бас хатшы­сының орынбасары – ЭСКАТО-ның атқарушы хатшысы Шамшад Ахтармен, Тайланд елінің іскер топтарымен және елдің жетекші БАҚ өкілдерімен кездесті. Энергетика министрлігінде өт­кен кездесу барысында екі ел ара­сындағы экономикалық және энергетикалық ынтымақтастық және Тайландтың Астанадағы ЭКСПО-2017 көрмесіне қатысу мәселелері тілге тиек етілді. Рәпіл Жошыбаев өз сөзінде көрмеге халықаралық қатысушыларды тарту және елордадағы көрмені өткізуге дайындық шаралары бойынша атқарылып  жатқан жұ­мыс­тарға тоқталды. Өз кезе­гінде, Тайландтың Ұлттық комис­сары А.Бхоочаоом өз елі­нің ЭКСПО-2017 көрмесіне қаты­са­тындығын тағы да қуаттап, көрмеге «жасыл» энергетика саласында ат­қарылған жетістіктердің жеткі­зі­летіндігін айтты. Тай­ланд елі 2021 жылға дейін бала­малы энергия көздері арқылы алынатын энергетика үлесін 25 пайызға жеткізуді белгілеп отыр. Бұл ел баламалы энергетика көзі ретінде биомассаларды пай­далануда бай тәжірибе жинақ­тап, биомассаларды энергия көзі­не айналдыру бойынша Азия – Тынық мұхиты аймағында көшбасшылыққа қол жеткізді. Тараптар сонымен бірге, Қазақстан және Тайланд елдері арасында дипломатиялық қатынастың орнатылуына 25 жыл болатын жылы екіжақты ынтымақтастықта жаңа серпінді қадамдарға қол жеткізілетін­дігін атап көрсетті. Осы ретте, ЭКСПО-2017 көрмесі шеңберінде өткізілетін Ұлттық күнге орай­лас Тайланд корольдік от­ба­сы мүшелерінің Астанаға ар­найы сапарын ұйымдастыру мүм­кін­діктері де қарастырылды. Келіссөз қорытындысы бо­йын­ша, тараптар Комиссар А.Бхоочаоомның үстіміздегі жылғы 19 тамызда Тайландтың ЭКСПО-2017 көрмесіне қатысуы жөніндегі шартқа қол қою үшін Астана қаласына сапарын ұйым­дас­тыру туралы келісімге қол жеткізді. Тайланд елордада өтетін ЭКСПО-2017 көрмесіне қатысуын ресми түрде бекіткен 96-шы мемлекет болып табылды. Тайланд елінің көрмедегі павильонының жалпы көлемі 734 шаршы метрді құрайды. Корольдік соңғы жылдары өткізіліп келе жатқан ЭКСПО көрмесінің барлығына қатысып келеді. Атап айтқанда, Тайланд Корольдігі Ганновер-2000, Аичи-2005, Сарагоса-2008, Шанхай-2010, Йосу-2012, Милан-2015 халық­аралық көрмелерінің белсенді қатысушысы болып табылады. БҰҰ-ның Азия және Тынық мұхиты үшін Экономикалық және әлеуметтік комиссиясы­ның атқарушы хатшысы Шамшад Ахтармен болған кездесуде ЭСКАТО-ның көрмеге қатысу мәселелері және «жасыл» эконо­ми­ка саласындағы ынтымақтастық мәселелері талқыланды. Ахтар ханым көрме аясында ЭСКАТО-ның арнайы сайд-ивентін ұйымдастыруды ұсынды. Осы сайд арқылы Азия – Тынық мұхиты энергетикалық порталын таныстырып тұрақты энергетика және жасыл энергетиканы дамыту жөнінде онлайн-тренингтер өткізу мәселесін тілге тиек етті. Атқарушы хатшы БҰҰ Бас Ассамблеясының 70-ші сессиясы барысында Қазақстан Республикасының Президенті Нұрсұлтан Назарбаев ұсынған «Жасыл технология және инвестициялық жобаларды»  дамыту бойынша ЭКСПО базасында БҰҰ халықаралық орталығын құру жөніндегі бастаманың маңыздылығын ерекше атап көрсетті. Кездесу қорытындысында, ЭСКАТО ұйымы Астанада осындай орталықты құруға жан-жақты қолдау көрсетуге дайын екендіктеріне сенім білдірді. Сапар барысында өткен кездесулерде тайландтық энергетикалық және туристік компаниялар, бизнес топтарының өкілдері Астанада өтетін ЭКСПО-2017 көрмесіне ерекше қызығушылық танытты. Тайландтық тур-операторлармен ынтымақтастық байланысты дамыта отырып, жергілікті туристерді көрмеге кеңінен тарту мәселелері қарастырылды. Сапар қорытындысы бойынша ЭКСПО-2017 Комиссары Корольдіктің «Bangkok Post», «Radio Thailand» және «TNN-24» атты жетекші БАҚ-тарына сұхбат берді. «Егемен-ақпарат»