Береке бастауы

Тұрақтылық күші – бірлікте. Ешқандай дәлелдеуді қажет етпейтін аксиома бұл. «Бөлінгенді бөрі жейтінін», «саусақ бірікпесе, ине ілікпейтінін» солтүстікқазақстандықтар да жақсы түсінеді. Елбасының ұлтаралық татулыққа, конфессияаралық келісімге негізделген саясатын жан-тәнімен қолдайтындықтары сондықтан. Сабақтастық дәстүрлері өз жарасымын тауып, келешек ұрпаққа үлгі-өнеге болсын деген тілекте. Сол себепті тәлім алар тағылымдарды іс жүзінде орнықтыру шараларына белсене қатысып келеді. Өңірде тұратын түрлі этнос өкілдерінің қатысуымен өткен «Салт-дәстүр» этномәдени фести­валі барысында елдегі тыныштық пен өзара келісім басты тақырып арқауына айналып, қазақстандық жарқын жол ұстанымдары жан-жақты паш етілді. Ұлттық нақышта киінген адамдар Тәуелсіздік стелласы алаңына жиналып, мереке ажарын аша түсті. Бір-бірлерімен емен-жарқын амандасып, құттық­тау сөздері болашағымыз баянды бол­ғай деген ақжарма тілектерге ұла­­сып жатты. Осы бір ұстын та­би­ғи өріліп, әдемі үйлесім тауып, «па, шіркін!» деген ерекше леп­ті аңғартқандай. Облыстық Қазақстан халқы Ассамблеясы хатшылығының меңгерушісі Наиль Салимовтың жұртшылық алдында сөйлеген сөзі жарқын шықты. Ол фести­валь Тәуелсіздігіміздің 25 жыл­дық мерейтойы қарсаңында өтіп жат­­қанын, тұрғындарды бірік­тіру­­шілік, ортақ мақсатқа жұ­мыл­­дыру­­шылық маңызын атап көр­­сет­ті. Осыдан ширек ғасыр бұ­рын об­лыста 5 қана этномәдени бір­лестік құрылса, қазір олардың саны 25-ке жеткен. Жергілікті жер­лердегі 130-ға тарта ұлттық бір­лес­тіктер өскелең ұрпақ бойына қазақ­стандық патриотизмнің жақ­сы үлгілерін қалыптастыруға өз үле­сін қосып келеді, деді Н.Салимов. Сәндік-қолданбалы қолөнер көрмесін тамашалаушылар назарына ұлттық киімдер, саз аспаптары, қыш ыдыстар, зерлі әшекей бұйымдар, теріден, киізден жасал­ған өнімдер ұсынылып, көз жа­уын алатын заттар хас шебер­лер­дің қолы­нан шыққанын бірден ай­ғақ­тай­ды. Ақжар ауданынан арнайы кел­ген Мәдиқажының отбасы домбыра, қобыз, адырна, астау жасау­мен көптен бері айналысады екен. Облыстық «Мерейлі отбасы» бай­қауы­ның жүлдегері саналады. Был­тыр «Жұмыспен қамтудың жол кар­тасы-2020» бағдарламасы шең­берін­де алған жеңілдікті несиеге шетел­дік станок алып, ісін дамыта түскен. – Мен металл, ағаш қалдық­тары­нан, пластикалық заттар­дан қолөнер өнімдерін жасаудың қыр-сырын балаларға үйрету мақ­сатымен үйірме аштым. Талантты да талапты бүлдіршіндердің қол­өнерге деген қызығушылығын арттыра отырып, түрлі конкурс­тарға үзбей қатысып жүрміз, – дей­ді Тимирязев ауданының намы­сын қорғай келген, 37 жыл жұ­мыс тәжірибесі бар ұстаз. Оның шә­кірттері жасаған су асты әлемін бейнелейтін коллек­ция жиынтығы көпшілікті қайран қалдырды. Сол сияқты, Летовочное ауы­лы­ның тұрғыны Надежда Маслова ұсын­ған бұйымдар мен өрнек­тер орыс халқының ұлттық ерекшеліктерін айтқызбай танытады. Оның бастамасымен қазақ, орыс және неміс тілдерінде балалардың өлеңдер жинағы құрастырылыпты. Аққайың ауданының «Шаңырақ» этномәдени бірлестігі «Бесікке бөлеу» сахналық қойылымын ұсынып, бүгінде ұмытыла бастаған дәстүрімізді әр қырынан паш етті. «Бірлік» ұйымы Мэрцишор мейрамын қаз-қалпында бейнелеуге тырысты. Молдовандардың бұл мерекесі ертеден тойланатын көрі­неді. Көктем сағынтып жет­кенде бір-бірін құттықтап, сый­лық беру дәстүрі қалыптасқан. Нау­рызға ұқсас жақтары көп. Тимирязев­тіктердің еркек пен әйел­дің өз­­ара сыйласымдылығын ашып көр­сететін көрінісі өзгелерге үлгі етіл­ді. Басқа да ұлттық салт-дәс­түр­­лер мен әдет-ғұрыптар сахналанып, тәлім-тәрбиелік мағыналары ба­рын­ша ашып көрсетілді. Бас жүлдені Ғ.Мүсірепов ауда­ны­ның өкілдері жеңіп алды. Сон­дай-ақ, бағдарламаға енген 14 ұлт­тық салт-дәстүрлер аталымдары бо­йынша жүлдегерлер белгілі болды. Өмір ЕСҚАЛИ, «Егемен Қазақстан» Солтүстік Қазақстан облысы Суретті түсірген Талғат ТӘНІБАЕВ