Тәртіпсіздіктің алғашқы құрбандығы

Иран астанасы Теһран қаласында демонстранттар мен полиция арасында қақтығыс болып, бір адам опат болса, жа­ра­ланғандар ондаған адам саналады. 200-ден астам адам қа­мауға алынған. Жұмыс күні аяқталған кешқұрым сәтте қа­ланың екі бас алаңына түрлі жолдармен бет алғандар қатары ондаған мың адамға жеткен. Жиналғандар үкіметке қарсы ұрандар айтып, саяси тұтқын­дарды босатуды, режімді демократияландыруды талап еткен. Кей көшелерде полициядан қорғану үшін баррикадалар тұрғызыла бастаған. Демонстранттарға он мың шамасында полиция қарсы тұрған көрінеді. Олар адамдардың шоғырлануын болдырмау үшін көзден жас ағызатын газ, келдектер және резеңке оқтар қолдануда екен. ШЕНЕУНІКТЕР ШОТТАРЫН ЖАБУДЫ ӨТІНДІ Египет басшылығы АҚШ-қа, Ұлыбритания мен Фран­ция­ға экс-президент Хосни Мүбәрактің әкімшілігіндегі бұрынғы шенеунік­тердің шоттарын жабу туралы өтінішпен шықты. Бірақ Франция мен АҚШ бұрынғы шенеуніктер тізімінде экс-президенттің не өзі, не отбасы мүшелері жоқ екенін мәлімдеп отыр. Сонымен қатар, Мысыр басшылығы аталған өтінішті Еуро­одаққа қатысты да жасаған. Енді ЕО елдерінің қаржы министрлері арнайы мәжілісте Мысыр басшылығының өтінішін талқы­ламақ. Қазірдің өзінде жоғарыдағы өтініштер қанағаттанды­ры­латын сыңайлы. Өкініш­тісі, тізімде Мүбәрактің не өзі, не отбасы мүшелері жоқтығы ғана. ЙЕМЕНДЕ ДЕ ҚАҚТЫҒЫСТАР ЖАЛҒАСУДА Йеменнің астанасы Сана қаласында манифестанттардың полициямен және ел президенті Абдалла Салехтың жақтас­та­рымен қақтығыстар қайта жалғасты. 3 мың қаралы нара­зылар ел астанасындағы басты алаңға келіп, президенттің отставкаға кетуін талап етті. Қақтығыс салдарынан бірнеше адам жеңіл дене жарақатын алды. Президенттің отставкасын талап еткен демонстрациялар сондай-ақ Таиз қаласында көрініс берді. Онда 8 манифестант жарақаттанған. Одан бір күн бұрын болған осындай акция бары­сында он адам тұтқынға алынған екен. Президент Салех келесі мерзімге сай­ланбаймын, 2013 жылы отставкаға кетемін деп мәлім­дегендіктен, парламенттік оппозиция үкіметпен келіссөзге келуге келіскен. РЕСЕЙ КУРИЛДЕГІ ӘСКЕРІН КҮШЕЙТЕДІ Курил аралдарында орналасқан 18-ші пулеметтік-артил­ле­риялық дивизияға енді зениттік-зымырандық бригада қосыла­тын болды.  Сонымен қатар, әскер құрамаларының қару-жарақ­тары да жаңаларымен алмастырылатыны мәлімделді. Бұл ақпаратты Ресей қорғаныс министрі Анатолий Сердюков те қуаттады. Оның сөзіне қарағанда, Ресей Курил аралдарындағы стра­те­гиялық нысандарын нығайтуға қажетті шаралардың бәрін жасай­тын болады. Бұл мәлімдеме  Ресей мен Жапония арасындағы қарым-қатынас өткірлене түскен жағдайда жасалып отыр. Екі жақты қарым-қатынас жапондар өз аумағы санайтын Курилге Ресей президенті Д.Медведев сапармен барған соң бұзылған болатын. БАХРЕЙНДЕ ДЕ КӨЗ ЖҰМҒАНДАР БАР Тунис пен Мысырдағы халық көтерілісі нәтижелі аяқтал­ған­нан соң болар, мұндай оқиғалар қара құрлықтың және араб әлемінің кейбір жерлерінде көрініс бере бастады. Мәселен, Бахрейнде демонстранттар мен полиция арасындағы қақты­ғыс салдарынан бір адам қаза тауып, кем дегенде 25 адам жа­рақаттанған. Елде көпшілік болып табылатын шииттер билеуші сүннит азшылығынан қысым көргендеріне төзбейтіндіктерін енді ғана ашық білдіре бастағандай. Бахрейннің королі сүннит өкілі болып табылады. Елде азшылық бола тұра, еркінситіндері корольді арқа тұтатын­дықтан екені анық. Демонстранттар жазылуына сүннит­термен қатар, шииттер де қатыса алатын жаңа конституция қабылдауды, премьер-министрді сайлап қоюды талап етіп отыр. ҚАРУ-ЖАРАҚ ПЕН ЕСІРТКІ ТӘРКІЛЕНДІ Аргентина басшылығы Америка Құрама Штаттарынан АҚШ әскери-әуе күштерінің ұшағынан табылған декларация­лан­баған қару-жарақ пен есірткіге байланысты түсініктеме талап етті. АҚШ ұшағы Буэнос-Айреске бірлескен әскери жаттығулар өткізуге келген сарапшылар мен құрал-жабдық­тар­ды жеткізуге орай қонған болатын. Қару-жарақ пен есірткіні С-17 жүк ұшағын қарау барысында жергілікті кеденшілер тапқан екен. Олар туралы АҚШ тарабы ұсынған ешқандай құжатта мәлімет жоқ болған көрінеді. Арген­ти­налықтар ұшақ бортындағы жүктің барлығын кәмпескелеп, АҚШ-тан оқиғаны бірге тексеруді талап еткен. Түсініспестік салдарынан бірлескен оқу-жаттығу да өтпей қалғанға ұқсайды. ҚЫЗМЕТКЕРІ КЕСІРІНЕН ЖҰМЫСТАН КЕТТІ Литва полициясының бас комиссары Визгирдас Теличенас отставкаға кетті. Оның мұндай қадамға баруына полиция қызметкерлерінің бірі жол-көлік оқиғасын жасап, бірнеше кісінің өліміне соқтыруы себеп болды. Кейін анықтал­ға­нын­дай, полиция қызметкері рөлге мас күйінде отырыпты. Теличенас оқиғаға түсініктеме бере келе, полицияның іс-әрекетіне тек бас комиссар ғана емес, сондай-ақ кейбір бөлім­шелердің бас­шылары да жауап беруі тиістігін атап өткен. Ел президенті Даля Грибаускайтенің төңірегіндегілер Теличенастың отставкасын лайықты қадам деп бағалап отыр. Мұндай қадамға екі басшының бірі бара бер­мей­тіні белгілі. ҚЫСҚА ҚАЙЫРЫП АЙТҚАНДА: • Мысырда билік басына келген әскерилер парламентті таратып, конституция әрекетін тоқтата тұ­ра­тындарын жариялады. Сондай-ақ 6 ай ішінде жаңа президенттік сайлауға дайындық жүргізуге уәде берді. • Палестина автономиясының үкіметі отставкаға кетті.  Премьер-министр Салам Файяд бастаған үкіметтің от­ставка­сын автономия президенті Махмұд Аббас қабыл алды. Бұл оқиға Израильмен келіссөздер туралы құпия құжаттардың сыртқа жарияланып кетуімен байланысты орын алған сияқты. • Италия премьер-министрі Сильвио Берлускониге қатысты іс сотқа жолданды. Оған кәмелетке тол­мағандармен сексуалды қарым-қатынасқа түсті деген айып тағылып отыр. 74 жастағы премьер ісі бойынша алғашқы сот мәжілісі 6 сәуірге белгіленген. Интернет материалдары негізінде әзірленді.