Ата Заңға адалмыз

Еліміздің Ата Заңы – Конс­титуция татулықтың іргетасы, қазақ­стандықтардың тең құқық­тары мен мүмкіндіктерінің кепілі болып табылады. Ол қоғамда демократияны дамытуға және елде азаматтық бейбітшілік пен келісімді нығайтуға серпін бер­ді. Ең бастысы – Конституция ха­лықтың құқығы мен бостан­ды­ғын қорғайтын негізгі заң. Конституциялық нормалардың әлеуеті қоғамымыздың бүгінгі жетістіктерінің тұғыры. Осының барлығына Мемлекет басшысының салиқалы саясатының, халық­тың ауызбіршілігінің арқасын­да қол жетті. Президент Нұрсұлтан Назарбаев өз сөзінде: «Консти­туция күнінде біз Отан алдын­дағы жауапкершілік пен мемлекет қызметіндегі азаматтар үшін жауапкершілікті ерекше түсінеміз», деп атап айтты. Ата Заң аясында ішкі істер органдары азаматтардың заңды мүддесі мен бостандығының, конституциялық құқықтарының сенімді тірегіне айналды. Полиция қызметіне қойылатын талаптың бірі – азаматтардың хабарламалары мен арыздарын қарастыру кезінде, қылмыстық істерді тергеуде заңдылықты бұлжытпай сақтау. Бұл орайда жүргізілген шаралар қылмыстар жөніндегі хабарламаларды қабылдау мен тіркеу рәсімін талапқа сай ат­қаруға, аза­маттардың арыздарға жедел әрекет етуге және оларды қарас­тыру үшін уақытты созбауға мүм­кіндік жасады. Бүгінде құқық бұзушылықтар мен қылмыстар жайындағы арыз­дардың басым көпшілігі бір тәулік ішінде қарас­тырылады. «Юго-Восток» және «Көктал» шағын аудандарында бюджеттік құралдарды жұмсамай-ақ ішкі штатты қайта бөлу есебі­нен аудан­дық полиция бөлімдері құ­рылып, қызмет атқаруда. Бұл қадам қылмыстар мен құқық бұзу­шылықтар жөніндегі хабар­­ламаларға жедел әрекет етуге жағдай жасады. ЭКСПО-2017 көрмесінің аумағында жаңа ауданда қоғамдық тәртіпті қамтамасыз ететін полиция бөлімі салынуда. Полиция қызметінің тиім­ділігін және азаматтардың се­німін арттыру мақсатында поли­цияға хабарласқан жандарға күн­делікті жауап беру амалы енгі-зілді. Ағымдағы жылдың тамызында телефон арқылы Жедел басқару орталығының «102» нөміріне қоңырау шалған 500-ден астам азаматқа сауал қойылды. Жүргізілген сараптаманың нәти­жесінде абоненттердің 85 пайызы елордалық полицияның қызметіне оң баға берді. Мәселен, азаматша Наталья Ли оқиға орнына шұғыл жетіп, алтын бұйымдарды ұрлау қылмысын «ізін суытпай» ашқан полицейлердің кәсібилігі үшін алғыс білдірді. Ғаламтор арқылы азаматтармен кері байланыс орнату кеңінен қолданылады. Қала тұрғындары мен қонақтары қажетті сауалдарын менің жеке блогыма жолдай алады. Әкімнің ресми сайтында «Халықтық бақылау» және «Виртуалды қабылдау» айдарлары бар, онда қаланың бейжай қалмайтын тұрғындары өздеріне мәлім болған құқық бұзушылықтар туралы хабарлап отырады. Кө­бінесе олар жол қозғалысы ере­жесін және тыныштықты бұзу, көлікті тұраққа дұрыс қоймау, кез келген жерде қоқыс тастау секілді бұзушылықтар. Барлық фактілер мұқият қарастырылып, шаралар қабылдануда. Астана қаласы ішкі істер департаменті жұмыстың жаңа түрі мен әдістерін, оның ішін­де инновациялық технологиялар­ды белсенді енгізуде. Олардың ішінде жаңа жоба «Ай-ти-си», «ақыл­ды» бағдаршамдар орнату, сондай-ақ ЖҚЕ бұзуды тір­кейтін автоматтандырылған жүйе бар. Қоғамдық тәртіпті күзету және қылмысқа қарсы күресте құқық қорғау бағытындағы қоғамдық құ­рылымдардың, жеке күзет құры­лымдарының, шұғыл көмек көр­сету қызметтерінің көмегі кеңі­нен қолданылуда. Өскелең ұрпақты отансүйгіштікке тәрбиелеуге және саламатты өмір салтын сақтауға зор көңіл бөлінеді. Департамент жанында спорттық жарыстар және түрлі конкурс­тар үнемі өткізіліп отыратын балалар аула клубы құрылған. Елорда полицейлері көп балалы және аз қамтылған отбасыларға көмек көрсетуге бағытталған түрлі әлеуметтік акцияларға дәстүрлі түрде қатысып отырады. Жаңа оқу жылы қарсаңында «Мектепке жол» қайырымдылық акциясы шеңберінде бірнеше отбасына материалдық көмек көрсетілді. Біздің еліміз үшін маңызды іс-шара – ЭКСПО-2017 халықаралық мамандандырылған көрмесін өткізуге дайындық шындап көңіл қоюды талап етеді. Оған қатысу үшін Астанаға шамамен 2 млн адам келеді. Халықаралық жоспардағы іс-шараның маңыздылығы ішкі істер департаментіне жүктелген міндеттердің тиімді орындалуы үшін, әсіресе, виза жұмыстарын, көші-қон бақылауын, қонақтардың қауіпсіздігін қамтамасыз ету жә­не маңызды нысандарды күзе­туге әрі қылмыстың және құ­қық бұзу­шылықтың алдын алуға жауап­кершілікті орындарына түседі. 2016 жылғы 1 қаңтардан бастап елордалық полицейлер тәулік бойы қоғамдық тәртіп күзетін сақтауға және ЭКСПО-2017 аумағында қо­ғам­дық тәртіпті қамтамасыз етуге жұмылдырылды. Ағымдағы жылғы 22 тамыздан бастап Қытай Халық Респуб­ликасының өкілдері полицейлерді мобильді инспекциялық-тексеру кешенімен жұмыс жасауға оқы­туды бастады. Ол теориялық және практикалық бөлімі бойынша екі кезеңде өтеді. Оқуды аяқтағаннан кейін қызметкерлер тиісті сертификаттар алатын болады. Еліміздің бас қаласындағы тыныштықты сақтау және қоғамдық тәртіпті қамтамасыз ету, азаматтардың конституциялық құқықтарын қорғау полицияға тапсырылған. Міне, бұл орайда елорда полициясы Астана үлгілі құқықтық тәртібі бар қауіпсіз қала болуы үшін бар күшін салады. Амантай Әубәкіров, Астана қаласы ІІД бастығы, полиция генерал-майоры