Шындықтың шырайын кіргізген

Шындықтың шырайын кіргізетін мына бір сөзді айтқан жөн. Елдің амандығы мен тыныштығын қашанда аузынан тастамай, бес уақ намазындай көретін кім? Аналар. Өйткені, перзентінің бақыты елдегі тұрақтылыққа байланысты екенін олар жан-жүрегімен түсінеді. Елбасының «Болашақтың іргесін бірге қалаймыз» атты биылғы Жолдауын Жетісудағы ерен еңбегімен танылған ардақты аналар қызу қарсы алып, қуаттауы осыдан. Солардың қатарында Алма­ты облысы мен Панфилов ауда­ны­ның Құрметті азаматы, Ең­бек Ері Күләш Айтжанова Пре­зидент Н.Ә.На­зар­баевтың Қа­зақстан халқына Жолдауы жайлы пікірін былайша тарқатты: – Мен – қарапайым еңбек адамымын. Кезінде еңбегімді ел бағалады. Десе де ертеңгі өмі­рі­міз, ұрпақ келешегі өзге де әйел қауымы тәрізді мені де  ойлан­ды­рады. Би­ыл­ғы Жолдау халықтың әл-ауқатын арттыруға бағытталып, еліміздің 2020 жылға дейінгі ал­да­ғы ұста­ны­мы мен міндеттері нақ­ты айқын­дал­ғанымен құнды. Президент жас­тар­дың жайын бұл жо­лы да ұмытпай, кешенді бағдар­ла­ма ұсынып отыр. Бүгінгі таңда еліміз халық­ара­лық қоғамдастықтың белсенді мү­шесі, әрі Орталық Азияда аса беделді мемлекет ретінде таныл­ған. Ұлт Көш­басшысының сындарлы саясатының, табандылығы мен ерік-жігерінің арқасында қысқа мерзімде орасан зор табыстарға қол жеткізілді. Хал­қы­мыздың ар­ман-мақсаты бірте-бірте орын­далу­да. Көптеген сауалдар­дың түп­кі негізін Елбасының осы жол­ғы құжаты саралап, жүйеледі. Ауылдағы қарапайым халық Мемлекет басшысының Жолдауын зор ынтамен тыңдап, көңілде жүр­ген көптеген сауалдарына нақты жауап тапқанын күнделікті тіршілігімізде көріп, оның игілігіне бө­леніп жүрміз.  Тәуелсіз мемлеке­ті­міз­дің бұ­дан әрі дамуына игі ық­палын тигізетін маңызды құжат та жас ұрпақ тәрбиесі, ана тіліміздің дамуына бай­ланысты нақты тұ­жырым жасалды. Ана ретіндегі ақ тілегім – елімізде  саяси тұрақтылық пен қо­ғам­дық келісім салтанат құрып, ынтымақ пен бірліктің туы биікте желбіресін! Қой үстіне бозторғай жұмыртқалаған жақсы өмір ұза­ғы­нан сүйіндірсін. Осы ретте жеті­су­лық­тар әрдайым Елбасымен бірге екенін айтқым келеді. Іле ауданындағы «Қараш» ша­руа қожалығының жетекшісі Ға­лия Құрманқожаева Нұр­сұл­­тан Әбішұлына аналық алғы­сын арнап, маңызды құжат өмір­ге әке­летін саяси-экономикалық, әлеу­­мет­тік тұрғыдағы өзгеріс­тер мен жаңалықтардың бағ­дар­­ша­мы екеніне назар аударды. Жол­дау болашаққа сенім беріп, жігер жанитынын ортаға салды: – Жыл сайынғы Жолдауда ал­да­ғы жылғы міндеттер мен тап­сыр­малар, әлеуметтік және эконо­микалық қолдаудың нақты іске асу­ын нақтылады. Ал оны көзбен көріп, жемісін татып жатырмыз деп нық сеніммен айта аламыз. Би­ылғы бағдарламалар мен жаса­латын жеңілдіктер салмақты. Әрі көңілге қонымды. Тәуелсіздігіміз­дің 20 жылдығын атап өту, соны­мен қатар, еңбек және соғыс арда­герлерінің әл-ауқатын көтерудегі нақты шаралардың айқындалуы да жақсы жаңалық. Жолдаудағы ауыл шаруашы­лы­ғын дамыту, сыбайлас жемқор­лық­қа бақылауды күшейту жө­нін­дегі тапсырмалар әр басшыға, Қазақстанның әр тұрғынына үлкен міндет жүктейді. Жаман әдеттен жиренуге шақырады. Өзім жасым жетпіске келсе де жердің тамырын тартып, бала­ла­рым­­ды еңбекке тәрбиелеудемін. Биылғы Жолдаудың ерекшелігі –  әлеуметтік  саланы жаңашылдық­пен дамыту, жастарға қолдау көр­сету, озық дәстүрлерді насихаттау бо­лып отыр. Оның әр тарауынан Елбасының көрегендігін, талап-жі­герін, халқына деген шексіз сүйіс­пеншілігін көріп, тамсандым. Жас, тәуелсіз мемлекетімізді ас­қақ­­татып, өскелең ұрпақтың бола­шақ­қа  сеніммен қарауына мүм­кін­дік берген Елбасына соғыс және еңбек арда­герлерінің, ақ жаулықты аналардың  атынан мың да бір алғыс айтамын. Бейбітшілікті, ынтымақ пен бір­лікті ту етіп, ел-жұртын мұра­ты­на жеткізуге күш-жігерін, білімін арнаған Елбасы – Ұлт Көш­басшысы – әлемдік деңгейдегі мемлекет қайраткері. Іле ауданы­ның халқы бір шаңырақтың ас­тын­дағы отбасындай өз Президентін қолдайды. Қазақ елінің көші көлікті, өмірі көрікті болсын. Көп жылдар атағы елімізге жайылған Қарғалы шұға ком­би­на­тында тоқымашы болған Еңбек Ері Күлдария Тоқсейітова өз пікірін былайша жұптады: – Әр жылдың басында елі­міздің қол жеткен табыстарымен танысып, алдағы даму көкжиегіне көз жүгірту қазақстандықтардың дәстүрлі ісіне айналған. Елбасы Нұрсұлтан Назарбаевтың халыққа кезекті маңызды Жолдауын жа­рия­лауы, олардың әрдайым жүзеге асырылып келе жатқаны ғанибет. Мен де көппен бірге Жолдауды асыға күттім. Қазақстанның эко­но­микасы дамып, әлеуметтік мүм­кіндігі артып, ғаламдық кеңістікте абырой-беделінің өсуіне куә бол­ған біздер үшін болашақта ат­қа­рылатын жұмыстардың жобасын білу маңызды. Ең бастысы, жыл­ма-жылғы Жолдау халықтың көкейіндегісін дөп басып келеді. Ұзақ жылдар бойы тоқыма өнеркәсібінде еңбек етіп, кез келген жетістіктің маңдай термен келетінін білемін. Президенттің Жол­даулары бізге бағдаршам іспетті. Және Елбасының сөзі мен ісінің қабысып жататыны қуан­тады. Атап айтқанда, зейнеткерлер мен бюджеттік сала қызметкер­лерінің жал­­ақысы әлем­дік эконо­ми­калық дағ­дарысқа қарамастан көбею үстінде. Азуын айға білеген мықты мем­лекеттердің өзінде зейнетақы мен жалақы қысқартылып жатқан­да, бұл экономикамыздың тұрақ­ты­лығын көрсетсе керек. Елбасы Жолдауында жеңіл өнеркәсіпті қал­пына келтіру мәселесіне лайық­ты көңіл бөлді. Бұл шынында да экономикамызды шикізатқа тәуел­діліктен құтқарып, халықтың 30 пайызға жуығын еңбекпен қам­ту­ға мүмкіндік беретін аса ауқымды сала. Сонымен бірге, Жолдауда мал шаруашылығын дамытуға үл­кен маңыз берілген. Білім беру, ме­дицина, әлеуметтік сала да Жолдауда жан-жақты қамтылған. Осыған дейінгі белгіленген бағ­дар­ламалардың барлығын жүзеге асыр­ған халқымыз бұл жолы да мақсат биігіне шығып, алдағы 10 жылдың ішінде тәуелсіз Қазақстанның әлем­дегі ең дамыған елдердің қатарынан көрінетіні сөзсіз. Жазып алған Күмісжан БАЙЖАН. Алматы облысы.