Өркениеттің өміршең өнегесі

Астана қаласында өткен «Ядролық қарусыз әлем құ­ру» атты халықаралық кон­фе­­ренцияға қатысып, әлем­дік дең­гейде көтерілген келе­лі мә­селелердің куәсі болдым. Елбасының әлем­дік деңгейдегі ядролық қа­русыз­дандыру жөніндегі бастамасы – Жер шарындағы бүкіл адам­затты ядролық сынақтардан біржо­ла бас тартуға және бейбітшілікке шақыр­ған үндеуінің нәтижесін көріп, ұғындым. Конференция барысында Елбасы Қазақстан халқы үшін ядролық қару мен радиация соншалықты түсініксіз теория емес екенін және еліміздің аумағында 500-ге тарта атмосфералық, жерүсті және жерасты «бейбіт» деп аталып келген әскери сынақтар жасал­ғанын атап өтіп, бүгінгі күнге дейін осы сы­нақтың зардабын тартып келе жат­қа­нын баяндап, адамзатты ядролық қа­русыз әлем құру мәселесіне бір кісі­дей ат­салысуы қажеттігін жеткізе білді. Бүгінде Семей поли­го­нының жабылуына 25 жыл толуы – ядролық қарусыз әлем құру бастамасының өзге елдерге үлгі боларлықтай бірден-бір факт екенін ай­туға болады. Семей сы­нақ алаңының жабылуы елі­міздің болашағын, яғни бей­бітшілікті таңдаудың дұрыс­тығына ешкім күмән келтір­мейді. Ядролық қарудан бас тарту арқылы еліміздегі тұрақтылықты, бейбітшілікті қамтамасыз ете білдік. Әлемдегі қарулы қақтығыстарды тоқтатып, бейбіт өмірге бастайтын Вашингтон қаласында өткен Ядролық қауіпсіздік жөніндегі ІV саммитте жарияланған Елбасы Нұрсұлтан Назарбаевтың «Әлем. XXI ғасыр» манифесі әлемдік деңгейде қолдау тапқанын баса айтқан дұрыс. Сондықтан, осы мақсатта елімізде кеңінен насихат жұмыстарын жүргізуге «Нұр Отан» партиясы барша қазақстандықтарды шақырғаны мәлім. Осынау бірлікке бас­тау болатын келелі іс Жетісу жерінде жанды жалғасын тауып, мемлекеттік саясатқа сай қадам жасайтынына кәміл сенім білдіреміз. Ғалиасқар САРЫБАЕВ, «Нұр Отан» партиясы Алматы облыстық филиалы төрағасының бірінші орынбасары ТАЛДЫҚОРҒАН