Мерзімі межеленбеген нысан

Палата отырыстарында өңір­лердегі көптеген мәселелер депутаттар сауалдарына арқау бо­лып жатады. Оның басты себебі – жергілікті жердің бюджетінде қаржының тапшы болуы. Ха­лық қалаулыларының өңір­лік мәселелерді көлденең тар­тып жататыны да сондықтан. Төмен­дегі депутаттық сауалға Қара­ған­ды қаласында концерт за­лын салу мәселесі арқау болған еді. Мәжіліс депутаты Дауылбай Құсайынов бастаған бір топ депутат Премьер-Министр К.Мәсі­мов­тің атына жолдаған сауа­лын­да Қарағанды қаласында Достық залы бар 1500 орындық концерт залын салу қажеттігіне назар аудартады. Аталған ғимараттың қажеттілігі этностардың әдет-ғұ­рыптарын, дәстүрлері мен мәде­ниетін жаңғыртуға мүмкіндік берерімен түсіндіріледі. Қазіргі таңда мұнда 70-тен астам этно­мәдени бірлестіктер жұмыс істейтіні белгілі. Олар өздерінің ұлт­тық мәдениеті мен ана тілін дамытуда. Сондай-ақ жарты миллион тұрғыны бар облыс ор­та­лығында әлемдік дәрежедегі мә­дениет пен өнер қайраткерлерінің қатысуымен ауқымды шаралар өткізетін концерт залының уақыт талабына сай қажеттілікке ай­налғаны анық. Аталған нысан құрылысының техникалық-экономикалық негіздемесі айқындалып, жоба-сметалық құжаттары жасалғаны да белгілі болып отыр. Сонымен қатар, санитарлық-эпидемиоло­гия­лық, экологиялық және мемлекеттік өрт бақылау мекемеле­рінің тиісті қорытындылары да алынған. Тіпті, құрылысқа қа­жет­ті жер учаскесі мен инженер­л­ік-кәріздік жүйелері де дайын көрінеді. Жоба-сметалық құжат­тар­ға жасалған мемлекеттік сараптама қорытындысы бойынша жоба құны 4 миллиард 342 миллион теңгеге бағаланыпты. Өткен жылдың 10 қаңтарында Премьер-Министр Кәрім Мәсімовтің Қа­рағанды облысына жасаған жұ­мыс сапары барысында да атал­ған мәселе көтерілген көрінеді. Кәрім Қажымқанұлы берген тап­сырмаларының ішінде сол ны­санның құрылысы да тілге тиек етілген. Барлық құжаттары толық жинақталып, тиісті шешімін кү­тіп отырған ғимарат қомақты қаржыны қажет ететіндіктен, оны табудың бірден-бір жолы респуб­ликалық бюджет қана болса керек. Сондықтан депутаттар Үкі­мет басшысынан осы мәселені шешуге ықпал етуін сұрайды. К.Мәсімов депутаттарға жол­да­ған жауабын былай бастапты: «Қарағанды қаласында 1500 орындық концерт залын салуға рес­публикалық бюджеттен қара­жат бөлуге қатысты сіздердің сауалдарыңызды қарап, мынаны хабарлаймын». Ары қарай Мәде­ниет министрлігінің бюджеттік өтінімі бойынша 2011-2013 жыл­дарға арналған республикалық бюджетті қалыптастыру шеңбе­рінде жобаны қаржыландыру мәселесі Республикалық бюджет комиссиясында қаралғаны баян­далады. Республикалық бюджет­тің шығыстарын оңтайландыруға байланысты жаңа инвестициялық жобаларды іске асыру кейінге шегерілген. Сондықтан да, «2011-2013 жылдарға арналған респуб­ликалық бюджет туралы» заң жо­басында және Үкіметтің 2010 жылғы 31 тамыздағы №857 қау­лы­сы жобасында да көрініс таппаған. Депутаттар аталған нысанды салуды республикалық бюджет есебінен 2011 жылы 1 миллиард теңгемен бастап, үш жыл ішінде бітіруді ұсынған. Премьер-Ми­нистр­дің жауабында жаңа ин­вестициялық жобаларды іске асыру неғұрлым кейінірек мерзімге қалдырылды делінеді. Алай­да, ол мерзімнің қаншаға созылары нақты айтылмайды... Асқар ТҰРАПБАЙҰЛЫ.