Беслан балаларынан хат

Редакциямызға «Бөбек» қоры­ның президенті Сара Ал­пысқызы Назарбаеваның атына жазылған хат келіп түсті. Ол таяу шетелден келіпті. Анықтап айтсақ, хатты осыдан алты жыл бұрын қасіретті жағдайға тап болған Беслан ба­лалары жазыпты. Олар Сара Алпыс­қызына қиын сәтте көр­сеткен көмегі, жан жылуы үшін рахмет айтады. Біз шынайы ықы­ласқа толы бұл лебіздің қалың қауымға  берер тағылымы мол екенін, әрі Сара Алпысқызының мерейлі шағын ескере отырып, оны жұртшылық назарына ұсын­ғанды жөн көрдік. Сәлеметсіз бе, қымбатты Сара Алпысқызы! Сізді мерейлі тойы­ңызбен шын жүректен құттық­таймыз! Біздің, Беслан қала­сы­ның балаларының тағдырында Сіз үлкен рөл атқардыңыз! Сізге шын жүректен зор ден­саулық, әрдайым ашық аспан жә­не атқарып жатқан істе­ріңізге өріс тілейміз! Сіз сияқты өз Отаны мен халқын, балаларын сү­йе­тін, жаны ізгі, мейірімді  жан ең үлкен Ба­қыт пен Махаббатқа лайық! Біз өзіміз үшін ең бір қиын кездерде, сол бір қорқынышты түстей бол­ған зобалаңнан соң өмірге қайта келуге көмектесіп, қасымыздан табылғаныңызды еш­­­­қа­шан ұмытпаймыз. «Бө­бек­тегі» кездерімізді, өзіңізбен бол­ған кездесуді  алғыспен еске ала­мыз. Біз үшін бұл үлкен оқиға еді және Сіздің жүрегіңіздің жылуы, туған анамызды еске салатын мейірімді күл­кіңіз әлі күнге шейін жү­регімізге жылу беріп келеді. Бұл үшін алғы­сымыз шексіз! Сіздің осы­нау қамқорлығы­ңыз­дың арқасында біз Қа­зақстанды жер бетіндегі ең жақсы ел ретінде еске аламыз! Бесланға қай­тып кел­геннен кейін біз­дің топ қа­лыпты өмірге бірден бой үйретіп кетті, санамызға білімге деген құштарлық орнығып, лаңкестік әрекеттен көз жұмған қандас­та­рымыздың рухтарының риза­шы­лығы үшін, келешекте ізгі істерге мұрындық болу үшін біз қайтадан оқуға бардық. Уақыт орнында тұрмайды, міне, алты жылдан асып барады... Бәріміз есейіп те қалдық. Сіздің сол кезде айтқан  – жақсы оқып, үздік маман болып, мейірімді де адал адам болыңдар деген аналық ақылыңыз бүгінгі күні одан да қымбаттырақ. Зарина Даурова (есіңізде ме, ол Бесландағы қайғылы оқиға туралы өлең жазып еді ғой?) мен Алана Аликова эко­но­микалық білім алды, қа­зір банк саласында қыз­мет ат­қарып жүр. Алана қаржылық жо­ғары оқу орнын осы жылы аяқ­тайтын Инга Туаевамен бірге заң­герлік екінші мамандық алмақ. Заур Цораев пен Аслан Дзарасов та заңгер болмақ. Оған қоса спорт­пен де айналысып жүр. Заур­дың қарын­дасы Алина Цораева қаржы академиясының студенті. Ал Асланның інісі Сослан Дзарасов дәрігер боламын деп шеш­ті, медицина ака­де­миясында оқиды. Но­гаев­тардың үлкені – Залина Мәскеудегі меди­циналық жо­ғарғы оқу орнына түс­ті, ал кішілері Эллина мен Аллочка орта мектепте оқиды. Зарина Цирихова Мәс­кеу маңындағы лицейді бітіреді. Арамыздағы жас айырма­шы­лы­ғына қарамастан, «Бөбектегі» бір ай бізді жақындастырып жіберді, достасып кеттік, әлі күнге байланысымыз үзілген жоқ. Ал кездесе қалсақ, міндетті түрде «Бөбектегі» күндерді еске ала­мыз. Ол күндерді еске алудың өзі біз үшін бір мереке. Өйткені, сол кезде біз ең алғаш нағыз Адам­дардың әрқашан бір-біріне көмек­тесетінін, жер бетінде жақсы жан­дардың көптігіне сену керек екенін және қалың көпшілік жақ­сы өмір сүруі үшін өзіміз де көп нәр­се істеуіміз керек екенін тү­сіндік. Сіз бізге Өмір мен өзін өзі тану­дың керемет сабағын бердіңіз! Қазір біз аяғымыздан тік тұр­дық, өз болашағымызды өзі­міз жасаудамыз – барлығы да Сіздің арқаңыз, қымбатты Сара Алпысқызы! Қазақстан жеріндегі әр сәтіміз есімізде! «Бөбек» орталығының қызметкерлері мен Алматының қарапайым тұрғындары сондай бір жылуға бөлеген еді! Мұндай нәрсе ұмытылмайды, біз мұны әрдайым есте ұстаймыз және бүгінгі бақытымыз үшін Сізге алғыс айтып өтеміз! Сізге және жақындарыңызға денсаулық пен бақыт тілейміз! Құрметпен, Сізді сүйетін және алғыс айтатын Беслан балалары.