Алматы атлеттерін асқақтатты

Алматыда Олимпиаданың алтын медалін иеленген жүзгіш Дмитрий Баландин мен қола жүлдесін жеңіп алған Дариға Шәкімоваға лайықты сый-сияпат көрсетілді. Жиналған қауым Қазақстан тарихында су спорты түрлерінен бірінші болып Олимпиялық ойында жеңіске жеткен Дима мен екі мәрте Олимпиада чемпионы, америкалық Кларесса Шилдспен қаймықпай шайқасқан Дариғаға ерекше құрмет көрсетіп, қол соқты. Үкіметтің арнай шешімі бойын­ша Олимпиадада бірінші болған спортшыға 250 мың долларлық сыйақыдан тыс 3 бөлмелі, үшінші орын алған спортшыға 50 мың доллардан бөлек бір бөлмелі пәтер берілуге тиіс. Оңтүстік астанада сол шешімге сай талаптар жүзеге асты. Салтанат үстінде сөз сөйлеген қала әкімі Бауыржан Байбек: – Құрметті спортшылар, сіздер Қазақстан Тәуелсіздігінің 25 жылдығына тұспа-тұс келген Рио Олимпиадасында ел намысын қорғап, еліміздің көк Туын көкке көтердіңіздер,– деді. – Алматылықтар және барша қазақстандық жанкүйерлер дүбірлі күндері сіздерге әр сәт қолдау көрсетті. Әуежайда зор қуанышпен қарсы алды. Суда жүзуші Дима  мен бокс­шы Дариғаның бапкерлері де қала әкімдігінде өткен салтанаттан құр қол қайтпады. Бауыржан Байбек оларға 3 млн және 2 млн теңге көлемінде сыйақы тапсырды. Қала әкімдігінің алдында қы­зыл лента байланған  жол тал­ғамайтын қос көліктің кілті – Дми­трий Баландин («Тойота Ланд Крузер-200») мен Дариға Шә­кімоваға («Тойота Ланд Крузер Прадо-150») жиналған қауымның ду қол шапалағының астында берілді. Өз кезегінде сөз алған Дариға  мен Дима Елбасы Нұрсұлтан Назарбаевқа, қолдау көрсеткен барша қазақстандық жанкүйерге және бүгінгі көрсетілген сый-сияпат үшін шын жүректен алғыс айтты. Талғат СҮЙІНБАЙ, «Егемен Қазақстан» АЛМАТЫ