Бүгін Қытайда G-20 саммиті басталады

  Осымен 11-ші рет ұйымдастырылып отырған «Үлкен жиырмалықтың» дәстүрлі саммиті бүгін түстен кейін басталады (Астана уақытымен салыстырғанда Ханчжоу қаласы 2 сағат ерте жүреді). Оның жұмысына Қазақстан Президенті Нұрсұлтан Назарбаев қатысады. Әлемдегі жетекші елдердің басын қосып отырған саммитте жаһандық экономиканың орнықты және теңгерімді өсімін ынталандыру, халықаралық қаржы саласын жетілдіру, оның реформаларын алға жылжыту, инклюзивті қаржыларды дамыту мәселелері талқыланады. Осы арада айта кететін нәрсе, Қытай тарапы Қазақстан Президенті Нұрсұлтан Назарбаевтың саммитке қатысуына үлкен мән беріп отыр. Еске сала кетейік, 2015 жылғы 1 желтоқсаннан бастап «Үлкен жиырмалыққа» төрағалық Түркиядан Қытайға өткен болатын. «Инновациялық, кінәратсыз, өзара байланысты және инклюзивті әлемдік экономика құру» тақырыбындағы бұл саммит ертең аяқталады.   Жолдыбай БАЗАР, «Егемен Қазақстан» – Ханчжоудан (Қытай)