Абай әлеміне саяхат

  Астана опера және балет театры өзінің төртінші маусымын А.Жұбанов пен Л.Хамидидің «Абай» операсымен ашады. Белгілі режиссер Джанкарло дель Монако (Италия) мен көрнекті қоюшы-дирижер Алан Бөрібаевтың қойылымындағы бірегей ұлттық спектакль Астана тұрғындары мен қонақтарына III халықаралық «Жібек жолы» фестивалінің аясында ұсынылады. Биыл қазақтың композиторлық өнерінің алыптары – Ахмет Жұбанов пен Латиф Хамидидің туғанына 110 жыл толғалы тұр. Әйтсе де, «Астана Опера» үлкен залының аса көрнекті композиторлардың туындысымен ашылуы кездейсоқ емес. Неге десеңіз, ол театрдың «маңдайалды» қойылымы. Партитураны музыкалық тұрғыдан қайта қарау жауапкершілігі Ахмет Жұбановтың шөбересі – театрдың бас дирижері Алан Бөрібаевқа жүктелгені де тектен-тек емес. Оның мінсіз жұмысына көрерменмен қатар, ойшылымыздың шексіз тамаша әлеміне еліктіріп әкететін симфониялық оркестрдің музыканттары да лайықты баға беріп үлгерді. Қазақ-итальян шығармашылық тобы жүзеге асырған опера қазақ философиясының данышпаны – Абай Құнанбайұлының өмірдегі қызметі, құндылығы мен армандары жайлы баяндайды. Қойылым сол кездегі шынайы етіп, дәлме-дәл жеткізеді. – Классикалық опералық спектакльді итальян мектебінің көзімен ұсынған көркемдік-қойылымдық топ операда бірінші кезекте музыкада берілген драматургиялық қақтығыстарға апаратын адам құштарлығының көрінісін тыңдарманға эмоциялық тұрғыдан бірге бас­тан кешіруді көздеген. «Абайды» тек осылай көрген олар театрдың керемет кәсіби деңгейін пайдалана отырып, ұлттық негізді ескеретін қойылым жасады. Жанрдың мүмкіндігін ерекше сезінетін көркемдік-қойылымдық топ кеңес заманындағы спектакльдердің көзге ұрып тұратын әлеуметтік «илеуін» еңсеріп, операның мән-мағынасын аша білді. Бүгінде бұл өзекті мәселе болып табылады. Алайда бұған дейін оған баса назар аударылған жоқ, – деп атап өтті операның тұсаукесерінде болған өнертану ғылымдарының докторы, ҚазҰӨУ профессоры Үмітжан Жұмақова. Бірінші актінің екінші көрінісіндегі Абайдың таңғажайып үйі ойшылдың рухани байлығын жеткізіп тұрды. Ақынның шығармашылығын осылайша сезінген атақты суретші-сценограф Эцио Фриджерионың (Италия) сценографиялық жұмыстары таңдай қақтырады. Франко Скуарчапино (Италия) ұсақ-түйегіне дейін зерттеп, нәтижесінде түпнұсқаға пара-пар етіп тіккен сахналық костюмдер ұлттық мұражайлардағы қазына­ларымыздан кем түспейді. «Астана Опера» солистері көрерменмен жаңа маусымдағы алғашқы кездесуін асыға күтеді. Бас партияға дайындалып жатқан Қазақстанның еңбек сіңірген қайраткері  – Жанат Шыбықпаев, Ажар – Қазақстанның еңбек сіңірген қайраткері Салтанат Ахметова, Айдар – Қазақстан мен Татарстанның еңбек сіңірген қайраткері Нұрлан Бекмұхамбетов, Сырттан –Арме­нияның халық әртісі Барсег Туманян, Әзім – Бейімбет Таңарықов, Жиренше – Евгений Чайников, Қарлығаш – Салтанат Мұратбекова, Көкпай – Талғат Ғалеев, Нарымбет – Рамзат Балакишиев, Мес – Нұрлыбек Қоспармақов осы сапта бар. «Астана Опера» бас хормейстері – Қазақстан Республикасының еңбек сіңірген қайраткері Ержан Дәуітов. «Егемен-ақпарат»