Нәтижелі жүздесу

Қазақ ұлттық аграрлық уни­верситеті әлемнің жетекші аграр­лық оқу орындарымен арадағы ын­тымақтастықты дамытуда бел­­­сенді жұмыстар атқаруда. Уни­верситет басшылығы соңғы жылдары Шығыс Азияның бір­неше университеттерімен тығыз байланыс орнатып, ғалымдар мен сту­денттер алмасу, сала ғалым­дарымен бірлесе зерттеулер жүргізу үшін өзара ынтымақтастық туралы бірқатар келісімдерге қол қойған болатын. Шығыс Азия мен Қазақ елі ара­сындағы әріптестік байланысты одан әрі жандандыру мақсатында университет ректоры, академик Тілектес Ес­полов таяуда Қытай­дың Солтүстік-батыс ауыл және орман шаруашылығы университетінің өкіл­дерін қабылдаған еді. Деле­гация құ­рамында университет прези­денті Сун Чишин, Көкөніс шаруашылығы колледжінің деканы Ма Фенгван, Экстеншен технологиялар мен ғылым басқармасының директоры Ванг Япенг, Агро­номия колледжінің профессоры Ху Инган, Экономика және менеджмент колледжінің профессоры Вай Фэнг, Халықаралық ынтымақтастық және алмасулар басқармасының директоры Ю Лин және Экономика колледжінің деканы Шан Вексин бар. Университет басшысы екі ел арасындағы байланыстың барлық сала бойынша дамып жатқанын, оқу орнының қызметі, халықара­лық қатынастар туралы сөз қоз­ғап, «Біз университеттер арасын­дағы ын­ты­мақтастықтың негізгі 5 бағы­тын анықтадық. Олар: жеміс-жидек дақылдарын өсіру технологиясы, Су ресурстары мен технологияларын зерттеу, мал бордақылау ресурстарымен қамтамасыз ету, азық-түлік өнімдерінің биотехнологиясы болып табылады. Бұл әріптестік байланыс жақын арада өз жемісін беріп, еліміздегі білім мен ғылымның дамуына ықпал етеді деп ойлаймын», – десе, Сол­түстік-батыс ауыл және орман шаруашылығы университетінің президенті Сун Чишин екі ел арасындағы байланыстың ке­ле­­шегіне қысқаша тоқталып өтті. Сондай-ақ, ҚазҰАУ-мен бірлесе маман дайындау, инновация саласы бойынша байланысты дамыта отырып, ғылым-білім кеңесін құру, сонымен қатар, өзі басшылық ететін университетте Қазақ елінен келген студенттерді оқыту үшін гранттар санын арттыру туралы жоспарларымен бөлісті. Қазіргі таңда Қазақ ұлттық аграрлық университетіне білім мекемесі магистратура бойынша 5 грант ұсынылғанын да жеткізді. Жүздесуге Ауыл шаруа­шы­лығы вице-министрі Гүлмира Исаева арнайы қатысқанын да айта кетсек дейміз. Сонымен, кездесу қорытындысында жоғары оқу орындарының басшыла­ры екі келісімге қол қойды. Бі­рі – ака­демиялық ұтқырлық бағ­дарламасын жүзеге асыру және оқытушылар мен студенттер алмасу, екіншісі – бірлесе ғылыми-зерттеу жобаларын дайындау. Ғылыми кеңестің шешімімен Солтүстік-батыс ауыл және орман шаруашылығы университетінің президенті Сун Чишин мырзаға оқу ордасының «Құрметті профессоры» атағы берілді. «Егемен-ақпарат»