1993
*25 қазанда Қазақстанға Иран Ислам Республикасының Президенті Али Акбар Хашеми-Рафсанджани ресми сапармен келді. Нұрсұлтан Назарбаевтың өткен жылғы күзде Иранға барған сапарынан кейін екіжақты байланыстар өзара тиімді ынтымақтастықтың барған сайын жаңа салаларын қамти отырып, қарқынды дамып келе жатқандығы кездесу барысында атап өтілді. Бұл жөнінде «Егемен Қазақстан» газетінің 26 қазан күнгі нөмірінде «Иранмен өзара тиімді ынтымақтастық нығаюда» атты мақала жарияланды.
*3 қарашада Мәскеуде өткен Ресей мен Қазақстан премьер-министрлерінің кездесуінде еліміздің сом аймағынан шығатындығы туралы шешім хабарланды.
* 5 қарашада Қазақстан Президентінің «Ақша жүйесін тұрақтандыру жөніндегі шұғыл шаралар туралы» Жарлығына қол қойылды. Сондай-ақ бұл күні Президент Н.Ә.Назарбаев «Болашақ» бағдарламасын тағайындады. Осы жылы «Болашақ» бағдарламасы бойынша шетелге жастарды оқыту басталды.
*12 қарашада Президенттің «Қазақстан Республикасының ұлттық валютасын енгізу туралы» Жарлығы шықты. Осы күні түнде Қазақстан Республикасы Жоғарғы Кеңесі мен Министрлер Кабинетінің «Қазақстан Республикасы Президентінің ұлттық валюта – теңгені енгізу туралы шешімі жөнінде» қаулысы қабылданды.
* 13 қарашада Президент Н.Ә.Назарбаевтың «Қазақстан Республикасының ұлттық валютасын енгізу туралы» Жарлығы мен Елбасының Қазақстан Республикасының азаматтарына, барлық халықтарына Үндеуі «Егемен Қазақстан» газетінде жарияланды.
*15 қарашада Қазақстан Республикасының ұлттық валютасы – теңге енгізілді. Осы кезге дейін жаңа валютаның банкноттары мен тиындары республиканың барлық облыстары мен аудандарына тасып жеткізілген болатын.
*16 қарашада Президент Нұрсұлтан Назарбаев АҚШ-тың Қазақстандағы елшісі Уильям Кортниді оның өтініші бойынша қабылдады. Президент Билл Клинтонның Қазақстан басшысына жеке хатын тапсырған елші АҚШ Қазақстанның ұлттық валюта енгізу туралы шешімін жақтайтынын және халықаралық қаржы ұйымдары тарапынан кең көлемде қолдау ұйымдастыру жолымен елге қажетті көмек көрсетуге әзір екендігі туралы хабарлады.
* 19 қарашада еліміздің валюта биржасында АҚШ долларына кезекті сауда өтті. Нәтижесінде 1 АҚШ долларының белгіленген бағам деңгейі 4 теңге 68 тиынға тең болып шықты.
* 20 қарашада Нұрсұлтан Назарбаевқа «Жыл адамы» құрметті атағы берілгені туралы хабар «Егемен Қазақстан» газетінде жарияланды. «Руханият» халықаралық қауымдастығы бұл құрметті атақты Қазақстан басшысына ТМД Экономикалық одағын құруға, мемлекеттер арасындағы қатынастарды тұрақтандыруға, бейбітшілік пен тату көршілікті жақтау ісіне қосқан зор үлесі үшін берді.
* 25 қарашада «Төтенше жағдайдың құқықтық режимі туралы» Қазақстан Республикасының Заңы «Егемен Қазақстан» газетінде жарияланды.
* 8 желтоқсанда Президент Н.Ә.Назарбаев мемлекеттің тұрақты жұмыс істейтін бірден-бір заң шығарушы және жоғары өкілді орган ретіндегі бірінші сайланатын Қазақстан Республикасы Жоғарғы Кеңесі депутаттарының және Қазақстан Республикасының облыстық, аудандық және қалалық өкілетті органдары депутаттарының сайлауын 1994 жылғы 7 наурызға тағайындау жөнінде Заңға қол қойды.
* 9 желтоқсанда «Қазақстан Республикасы халық депутаттары жергілікті кеңестерінің өкілеттігін мерзімінен бұрын тоқтату туралы» Заңға Президент қол қойды.
* 10 желтоқсанда Жоғарғы Кеңес өз өкілеттігін мерзімінен бұрын тоқтату туралы шешім қабылдады. Парламент тарады.
* 13 желтоқсанда АҚШ-тың вице-президенті Альберт Гор Қазақстанға ресми сапармен келді. Альберт Гор Мемлекет басшысы Нұрсұлтан Назарбаевқа мұхиттың арғы жағына ресми сапар жасауға АҚШ Президентінің шақыруын тапсыра отырып, Билл Клинтонның Президент Нұрсұлтан Назарбаевпен мүмкіндігінше жақынырақ танысқысы келетінін атап өтті.
* 16 желтоқсанда Қазақстан халқы Тәуелсіздік күнін кең көлемде атап өтті.
* 17 желтоқсанда Мұхтар Әуезов атындағы Қазақ мемлекеттік академиялық драма театрында Қазақтардың дүниежүзілік қауымдастығының тұсаукесер салтанаты өткізілді. Жиналғандар алдында Қазақстан Президенті, Қауымдастықтың құрметті Төрағасы Нұрсұлтан Назарбаев сөз сөйледі.
* 22 желтоқсанда Екібастұз-2 ГРЭС-інің екінші энергия блогы іске қосылды. Осыған орай өткізілген митингіде Президент Нұрсұлтан Назарбаев бүкіл республика үшін маңызды оқиғамен энергия құрылысшыларын, энергия монтажшыларын және пайдаланушыларды құттықтап, бұдан былай желтоқсанның 22-сі Қазақстан энергетикасының кәсіптік мерекесі болатындығын мәлімдеді. Бұл туралы «Егемен Қазақстан» газетінің 24 желтоқсандағы нөмірінде «Екібастұз қуаты – ел қуаты» тақырыбымен мақала жарық көрді.
* 24 желтоқсанда Ашғабадта ТМД елдері басшыларының кезекті кездесуі өтті. Пленарлық мәжіліс 21 құжатқа қол қоюмен аяқталды.
* 27 желтоқсанда ауыл тұрғындарының қажетін неғұрлым толық қанағаттандыру мақсатында Президент Н.Ә.Назарбаев «Селолық жердің тауар өндірушілері мен халқына қызмет көрсетуді жақсарту шаралары туралы» Жарлыққа қол қойды. Қазақстан Республикасы Тұтыну қоғамдары одағының село халқына қызмет көрсетуді жақсарту және кооперативтік ұйымдар қызметінің аясын кеңейту жөніндегі бағдарламасы мақұлданды.
