Орысшаға жетік жастар марапатталды

Мәдениет және спорт министрлігі тілдерді дамыту және қоғамдық-саяси жұмыс комитетінің тапсырысымен Ш.Шаяхметов атындағы тілдерді дамытудың республикалық үйлестіру-әдістемелік орталығы орыс тілі білгірлерінің VIII республикалық «Ой-сана» байқауын өткізді. Байқауға облыстық және қалалық іріктеу кезеңдерінің жеңімпаздары, 18-22 жас аралығындағы жоғары оқу орындарының студенттері, жалпы білім беру мекемелерінде, орта және орта арнаулы оқу орындарында қазақ тілінде білім алатын жастар қатысты. Шығыс Қазақстан облысынан келген қатысушы Каирдинова Аида Қайролдақызы байқау барысында орыс тілін жетік меңгергенін танытып, орыс тілінің білгірі атанып, бас жүлдені (150 000 теңге) қанжығасына байлады. Қостанайлық Демесінов Нұржан Алматұлы 1-орынды (120 000 теңге), Астана қаласынан қатысқан Жұмағалиева Мадина Маратқызы 2-орынды (100 000 теңге) және Солтүстік Қазақстан облысынан келген Қапбасова Дана Болатқызы 3-орынды (70 000 теңге) иеленді. Асанбаева Елдана Бақытқызы (Павлодар облысы), Нұрмұхамбетов Арман Нұрланұлы (Ақмола облысы), Сенкибаева Мәдина Қайратқызы (Қарағанды облысы) мен Елшібекова Гүлнұр Амантайқызына (Ақтөбе облысы) ынталандыру (35 000 теңге) сыйлығы берілді. Егемен-ақпарат