«Kazakhstan Open» – гольф ойындарының жаңа тарихы

Алматы қаласында гольфтан «Kazakhstan Open» халықаралық турнирі өтетінін бұған дейін де жазған едік. Бүгін әлемнің 132 елінен арнайы келген ойыншылар «Жайлау» гольф кешенінде жиналып, танысу рәсімін өткізеді. Он екінші жыл қатарынан өтіп, дәстүрге айналған жарыстың тізгін қағар сәтінде Қазақстан гольф федерациясының бас хатшысы Константин Лифановты сөзге тартқан едік. – Константин, сіз «Kazakhstan Open» турнирін ө­ткізу жұмыстарының басы-қасын­да жүргелі біршама жыл болған екен. Бұл халықаралық турнирдің басты жетістігі неде? Әуелгі мақсат орындалды ма? – Жетістіктерді санамалайтын бол­сақ, өткен он екі жылдық тари­хы­мыздағы жұмыстар ұзақ әңгі­менің арқауы болар еді. Ал ең бас­ты жетістігіміз деп, Қазақстан топы­рағында гольф ойындарының қалып­тасып болғанын толық сенім­мен айта аламын. Осыдан он екі жыл бұрын елімізге әлемдік спорт эли­тасының назарын аудара­тын­­­дай турнир өткізу қажеттігін Мем­­­лекет басшысы Нұрсұлтан Назарбаев нықтап тапсырған болатын. Халықаралық аренаға Барыс бейнелі елдің даңқын паш ету үшін тиісті тапсырма алған мамандар­дың еңбегі мен Елбасының идея­сы жемісін берді. 2004 жылы Лондон­­дағы Еуропалық турды ұйымдас­тыру­шылардың офисінде алғашқы кездесу өтті. Шынымды айтсам, дәл сол сәтте бұл идеяның санаулы жыл­дарда, сәтті жүзеге асатын­ды­ғы­на гольфтің қыр-сырына қа­нық мамандар түгілі өзім де аса сенімді емес едім... Өйткені, ол кезең­де Еуропада Қазақстан жай­­лы мағлұмат өте аз еді. Біздің спорт елі екенімізді ілеу де біреу ға­на мо­йындайтын. Бізді өте ауыр сынақ күтіп тұрды. Керемет жұ­мыс жасалды. Нәтижесінде, араға бір жыл салып алғашқы халық­ара­лық турнир өткізуге қол жет­кіз­дік. Және қандай турнир деңіз? Шетел­ден 130 ойыншы шақы­рып, талап­қа сай ойын алаңын таныс­тыр­ғанымызда, олардың ауыздары ашылып қалып еді... Біз сол жолы қазақтың қонақжайлылығымен қатар гольфті де еуропалықтардан кем ойнамайтындығымызды мойындатып жіберген едік. – Демек, «Kazakhstan Open» турнирін өткізу еліміз үшін имидж қалыптастыру жолын­дағы жаңа қадамның бірі болған екен. Ал әлем ойыншылары үшін Қазақстан тек ойын алаң­дарын ұсынушы ел болып отыр ма? Әлде, бізде өтетін турнирлер жаһандық жарыстардың алдын­дағы «ет қыздыру» ойындары санала ма? – Ойыңызды ұққандаймын. Мынаны қараңыз, біз жыл сайын өткізетін турнир European Challenge Tour атты үлкен ойынның бір бұтағы іспетті. Осы жерде жеңіске жеткен ойыншылар Лондонға жолдама алады. Бұл – гольф тарихына енген дәстүр. Енді дүние жүзіндегі гольф ойындарының тарихы Қазақстансыз жазылмайтын болды. Айтпақшы, осы Алматының жасыл қыратында алғаш рет чемпион атанғандар бар. Қазір әлемнің гольф жанкүйерлері табынатын Марк Каймер, Алваро Кирос, Эдуардо Молинари, Томми Флит­вуд сияқты жұлдыздардың тұ­сауын «Kazakhstan Open» кескен еді... – Ал өз ойыншыларымыз ше? Мысалға, әлем бізді гольф ойнайтын ел қатарына қоса ма? – 2004 жылы осы қызметке кел­генімде гольфке қызығушылық таны­татындардың барлығын түстеп танитын едім, әрі кеткенде 20 адам болатын. Қазір біздің корт­тарымызға әуесқой ойын­шы­лар кезекке тұрады десем сен­бессіз... Кәсіпқойлар клубында үш жүзден аса мүше бар. Жерлесіміз, мақтанышымыз Дәулет Тұрлыбаев еуропалық турнирлерде топ жарып, «кәсіби гольф ойыншысы» атағын иеленген. European Tour серияларына қатысады. – Отандық гольфтің дамуы туралы айтқанда, тек Алматымен шектелеміз бе, әлде... – Алматыда екі үлкен гольф алаңы барын білесіздер, олар дүниежүзілік талап бойынша санаулы 20 орындардың қатарына кіреді. Ал еліміздегі гольфтің дамуы жаңа кезеңге өтті десе де бола­­ды. Федерация президенті Нұр­­тай Әбіқаевтың тікелей тапсыр­масы бойынша барлық аймақта бөлімшелер құрылып жатыр. Ас­тана, Ақтау, Қарағанды, Шым­кент, Қостанай және Талдықорғанда жұмыс басталды. Қазір әлемде гольф ойындары бұқаралық сипат алып келеді. Олимпиада ойын­дары­ның санатына қосылды. Биыл тұңғыш рет Риода гольфтан әлем чем­пионын таныдық. Қысқасы, Қазақстандағы гольфтің дамуынан жарқын болашақ күтуге болады. – Константин мырза, соңғы сұрақ. Мына басталған турнирде еліміздің Туын ұстап шығатын ойыншылар бар ма? – Әрине, әлемнің назары бізге ауып отырғанда әрі өз топы­ра­ғымызда тұрғанда ойынның Қазақ­стансыз өтуі қисынсыз болар еді. Біз ел ішінде кіші чемпионат өткіз­генбіз. Топ жарған ойыншылар турнирге қатысады. Ертеңнен бас­тап Нұртай Салдаров пен Зият Сейіл­б­ековтердің ойындарын тама­ша­лайтын боламыз. Екеуі де әуес­қой гольфші. Ал кәсіпқой ше­бер­­лер­дің қатарында Александр Вон­гай ойнамақшы, бұл жігітті жұрт Балалар гольфі академиясының директоры ретінде тануы тиіс. Жалпы, өзіміздің ойыншылар жайлы жиі жазып тұрсаңыздар екен. «Егемен Қазақстанның» оқырмандарына гольф ойыны туралы білу қызықты деп ойлаймын. Және біздің бас ақпараттық серіктесіміз ретінде есі­гі­міз ашық, бәріңізді ойынның қона­ғы болуға шақырамын. – Ендеше, жеңіс жолында жолығайық! Әңгімелескен Қалмаханбет МҰҚАМЕТҚАЛИ, «Егемен Қазақстан»  Алматы