Халықаралық көрмеге Кариб қауымдастығынан он ел келеді

Жақында Нью-Йоркте өткен БҰҰ Бас Ассамблеясы 71-ші сессиясының аясында «ЭКСПО-2017» Халықаралық мамандандырылған көрмесінің комиссары Рәпіл Жошыбаев Кариб қауымдастығының (КАРИКОМ) бас хатшысы Ирвин Ла Рокпен кездесті. Кездесу қорытындысында Кариб қауымдастығының ЭКСПО-2017 көрмесіне қатысуы туралы Шартқа қол қойылды. Екіжақты кездесу барысында Р.Жошыбаев И.Ла Рокты халықаралық көрмені өткізуге байланысты жасалып жатқан дайындық мәселелерімен жан-жақты таныстырды. Ол сонымен бірге КАРИКОМ-ның бас хатшысын әлемдік көрменің жұмысы басталған кезде Астана қаласына келуге шақырды. Өз кезегінде КАРИКОМ-ның бас хатшысы ЭКСПО-2017 көр­месінің бас тақырыбы – «Бола­шақтың энергиясы» Кариб бас­сейніндегі елдер үшін қанша­лықты маңызды екендігін тілге тиек етті. Оның айтуынша, Кариб қауымдастығы елдерінің көпшілігі дәстүрлі энергия көздерінен тапшылық көріп келеді. Сондықтан бұл елдер баламалы қуат көздерін игеруге ерекше ынталылық білдіруде. Тараптар БҰҰ Қауіпсіздік Кеңесіне Қазақстанның мүше болуына байланысты су, энергия және азық-түлік қауіпсіздігі мәселелері бойынша жан-жақты диалог өткізуге мүдделіліктерін білдірді. Бұл мәселелер Кариб қауымдастығы елдері үшін өте өзекті болып табылады. Себебі, бұл мемлекеттер жаһандық жылыну үрдісі басталғаннан бері ауа райының келеңсіз апаттарына жиі тап болуда. Бүгінгі күнге дейін Кариб қауымдастығына қарасты 10 мемлекет көрме жұмысына қаты­са­тындығын растады. Олар­дың қатарында Антигуа және Бар­буда, Белиз, Доминика, Гре­нада, Гайана, Гаити, Сент-Китс және Невис, Сент-Винсент және Гренадины, Сент-Люсия және Сурина мемлекеттері бар. Осы аталған елдердің атынан көрменің бірыңғай Комиссары ретінде КАРИКОМ-ның бас хатшысы Ирвин Ла Рок тағай­ын­далды. Бұл өз кезегінде елордада өтетін ЭКСПО-2017 көрме­сінің Кариб бассейні елдері үшін маңызының аса зор екендігін көрсетсе керек. Нью-Йорк қаласындағы кездесулер аясында Рәпіл Жо­шы­баев БҰҰ-ның әлсіз дамыған елдер, теңізге шығатын жолы жоқ елдер және шағын аралдардағы дамушы елдер бойынша жоғары өкілі – Бас хатшының орынбасары Гия Чандро Ачариемен және БҰҰ Бас хатшысының тұ­рақ­ты даму жөніндегі орын­басары Ву Хонбомен кезде­сті. Тараптар БҰҰ атынан ЭКСПО-2017 Ха­лықаралық мамандан­ды­рылған көрмесіне бірыңғай комис­сар тағайындау, Астана қала­сындағы көрме жұмысы кезінде БҰҰ құрылымында өткізілетін тақырыптық шараларды, сонымен бірге, БҰҰ-ның климаттың өзгеруі жөніндегі Конвенциясын іс жүзіне асыру барысындағы мәселелерді жан-жақты талқылады. Ұлан САНЖАР