Ерлер тізімін толықтырған еңбек

Минск қаласында Қазақстан Тәуелсіздігінің 25 жылдығы іс-шарасы аясында Қазақстанның Беларусьтегі елшілігінің ұйымдастыруымен Беларусь Республикасының Ұлттық кітапханасында әл-Фараби атындағы Қазақ ұлттық университетінің профессоры, тарих ғылымдарының докторы Л.С.Ахметованың «1941. Брест қамалы. Қазақстан» атты кітабының автордың қатысуымен тұсаукесері өтті. Тұсаукесерге Беларусь Респуб­ликасы Ұлттық жиналысының де­путаттары, саясат және қоғам қай­рат­керлері, соның ішінде Қа­зақстанның Достар клубының мүшелері, академиялық топтар мен қазақ диаспорасының өкіл­де­рі, жергілікті тарихшылар, жазушы­лар мен журналис­тер, сондай-ақ қазақстандық курсанттар қатысты. Өзінің сөзінде Қазақстан­­ның Беларусьтегі елшісі Е.Бөлеге­нов аталған еңбектің Қазақстан Тә­уелсіздігінің 25 жылдығы қарсаңында жарық көруінің ны­шандық мәні бар екенін айтып, Л.Ахметованың кіта­бы Ұлы Отан соғысы тарихын зерт­теудегі «ақтаңдақтарды» жою­ға үлкен үлес қосатындығын атап өтті. Соғыстың аса ауыр бас­тапқы кезеңінде қаза тапқан сан мыңдаған қазақстандық­­тың аттары белгісіз болып келді. Ал ғалымның жаңа еңбегі күні бүгінге дейін аттары белгісіз Брест қамалын қорғаушылардың тізімін айтарлықтай, яғни 556 қазақстандыққа толықтырып отырса, олардың жартысы – қазақтар. Қамалды қорғаған бар­лық 7 мың жауынгердің шамамен 1 мыңы Қазақстаннан шақырылғандар болып табылады. Л.Ахметованың күш-жігері­нің арқасында қазақстандық жауынгерлердің көп­шілігінің аттары белгілі болып отыр. Олар­дың арасында із-түзсіз кеткендер де бар. Біздің елдеріміз Еуразия­лық экономикалық одаққа бірігіп отырған жағдайда кітаптың өзектілігі арта түседі. Барлық сөйлегендер, со­ның ішінде Беларусь Ұлттық кітап­ханасының директоры Р.С.Матульский, Беларусь Рес­публикасы МҚК ардагерлер кеңесінің төрағасы, полков­ник А.П.Васильев және бас­қалар Қазақстан мен Беларусь халықтарының бауырлас­­тық тамыры тереңде екенін атап көр­сетіп жатты. Ал автор тұсау­кесерді ұйымдастырған Қазақ­станның елшілігі мен бар­лық қатысушыларға шынайы ал­ғысын білдіріп, Беларусьтің кітапханалары мен кітап қор­ларына кітаптың 200 данасын сыйға тартты. Іс-шара аясында Ұлттық кітапханада, сондай-ақ ел­ші­лік тарапынан Қазақстан Тәуел­сіздігінің 25 жылдығына арналған, қазіргі Қазақстанның же­тістіктерін, сонымен бірге Президент Н.Ә.Назарбаевтың ядроға қарсы бастамаларын ай­шықтайтын фотокөрме ұйым­дастырылды. «Егемен-ақпарат»