А.Сатаевтың жаңа фильмі халықаралық байқаудың бас жүлдесін жеңіп алды

Сейсенбі күні Ялтада «Евразийский мост» фестивалінің салтанатты жабылу шарасы өтті. Онда қазақстандық режиссер Ақан Сатаевтың «Анаға апарар жол» фильмі Гран-приді жеңіп алды. Байқауға Ресей, Украина, Беларусь, Италия, Германия, Сербия, Қазақстан, Қытай, Оңтүстік Корея, Бельгия, Үндістан, Армения сияқты елдердің киношылары қатысты. Фестивальде үздік әйел рөлі жүлдесі осы фильмде басты рөлді сомдаған Алтынай Нөгербекке берілген болатын. «Анаға апарар жол» фильмінде ана махаббатының күші баяндалады. Басты кейіпкер Ілияс (Әділ Ахметов) пен оның анасы (Алтынай Нөгербек) арасындағы ұлы сезім олардың басына туған барлық қиындыққа төтеп беріп, соңында ана мен баланың қауышуына көмектеседі. Фильм 1930 жылдан бастап бүгінгі күнге дейінгі аралықты қамтиды. Мұнда халықтың басынан өткен қиын-қыстау кезеңдер (ұжымдастыру, жұт, соғыс жылдары) басты кейіпкерлердің тұрмыс-тіршілігі арқылы беріліп отырады. Басты рөлдерді Әділ Ахметов, Алтынай Нөгербек, Аружан Жазылбекова, Болат Әбділманов, Берік Айтжанов, Азамат Сатыбалды, Еркебұлан Дайыров, Асылбек Боранбай сомдаған. Картинаға жалпы саны 2 мыңнан астам адам қатысты. Түсіру жұмыстары Қазақстан, Беларусь және Әзірбайжанда жүргізілді. Фильмнің сценарий авторы – Тимур Жақсылықов, композиторы – Ринат Ғайсин. Әйгерім Тоқсанбек