Кен алыбы жаңа өнім түрін шығара бастады

Еуразиялық Топ (ERG) құрамына кіретін «Соколов-Сарыбай кен-байыту өндірістік бірлестігі» АҚ-тың жөндеу-механикалық зауытында жасап шығарылған жаңа өнімнің түрі «құйма қалақ» деп аталады. Технологиялық ыдыс Топ құрамына кіретін «Қазхром ТҰҚ» АҚ Ақтөбе ферроқорытпа зауытының кәдесіне жарайды. Еуразиялық Топтың жөндеу қуатын дамытып, топішілік айналымды арттыру жобасын жүзеге асыру аясында ССКӨБ-те шығарылатын өнім түрлерін ұлғайтуға мүмкіндік туып отыр. Оған ERG-дің жөндеу директораты мен «ERG Service» сервистік компаниясы және Топтың басқа да кәсіпорындарымен бірлесе көтерілген бастама мұрындық болды. «Құйма қалақ» – төрт жағында іл­мек тәрізді элементтері бар металдан құйылып жасалған бұйым. «Қа­лақ» Ақтөбе зауытындағы феррохром дай­ындаудың технологиялық үдері­сінің ажырамас бөлшегіне айналады. Сал­мағы 3 тонна болатын осындай техно­логиялық ыдыстың алғашқысы Со­колов-Сарыбай кен өндіру бірлес­­тігінің Жөндеу-механикалық зауытын­да өндірілді. Бұл өндірісті іске қосу бірлестік мамандарының жан-жақты ізденісінің нәтижесі десе болады. – Бірінші кезекте технологиялық және конструкторлық құжаттамалар жасалып, қалыпқа арналған жұмыс пен құрастыру сызбалары әзірленді, – деп түсіндірді зауыттың құю цехының технологы Татьяна Садчикова. – Механикалық өңдеу цехының металл құрастыру учаскесінде қалып пен қосалқы бөлшектер – қамыт, ілмек, бұранда, гайка, шайба жасалды. Құю цехының қолдан қалыптау учаскесінде «қалақты» қалыптау мен құю жүзеге асырылды. Суыған соң 18 сағат ішінде құйма қалыптан алынып газ пешке қыздырылып өңделеді. Тек содан кейін ғана қамытты бекіту үшін Жөндеу-механикалық зауытының ілмек пен құты жасау учаскесіне жіберіледі. Технологиялық ыдыс арнайы жа­салған кестеге орай Ақтөбеге жөнел­тілетін болады. – Ақтөбе ферроқорытпа зауытында технологиялық ыдыстарды жа­ңарту мәселесіне ерекше назар ау­дарылады. Себебі, мұның техно­логиялық процестер мен адамдардың қауіп­сіздігіне тікелей әсері бар, – дейді «Қазхром» ТҰҚ» АҚ Ақтөбе ферроқорытпа зауытының технология жө­ніндегі өндірістік-тех­никалық бөлім басшысының орынбасары Дар­хан Айдаров. – Сондықтан біздің кәсіп­орында ыстық феррохром құйма­ларын сақтауға арналған құйма қа­лақтар паркін жаңарту қажеттілігі туындағанда біз тек экономикалық көрсеткіштерді ғана емес, техникалық жағы мен сапасына көңіл бөлдік. Бұрын осы технологиялық ыдыс шетелден сатып алынатын. Сондықтан импортты отандық өніммен ауыс­тыру мақсатында Еуразиялық Топ кәсіпорындары арасынан осы өнімді жасауға қай кәсіпорынның мүмкіндігі бар екенін зерттедік. Осы тұста сапасы ешкімнен кем түспейтін өнімді бізге Соколов-Сарыбай кен-байыту өндірістік бірлестігінің мамандары ұсынды. Ақтөбе ферроқорытпа зауыты жылына 29 құйма қалаққа сұраныс жасайды. – ERG кәсіпорындары осымен бірнеше рет бір-біріне нақты қолдау көрсетіп келеді. Жуырда біз Қазақстан электролиз зауыты үшін блюмстар шығара бастадық. Ал бүгін Еуразиялық Топтың басқа да компанияларымен байланысты нығайтуға тырысып отырмыз. Болашақта Ақтөбе ферроқорытпа зауыты үшін тағы да басқа екі түрлі құрал – 2,83 текше метрлік қожжинағыш пен 3 текше метрлік шөміш шығару жос­­парда бар. Қазірдің өзінде осы бұйымдарды жасауға дайындық жұмыстары басталып кетті. Осы қадам­дардың барлығы өндіріс көлемі төмен­деген қиын кезеңде зор мәнге ие. Себебі, бұлар нарықта отандық тауар­лардың үлесін арттыруға бағыт­талған, – дейді «ССКӨБ» АҚ прези­денті Береке Мұхаметқалиев. Ізденістер осылай ішкі нарықтың айналымын қамтамасыз етуде. Нәзира ЖӘРІМБЕТОВА, «Егемен Қазақстан» РУДНЫЙ