Бірлескен жобалар бағдары

Соңғы жылдары Оңтүстік Қазақстан облысына инвестиция салуға шетелдік кәсіпкерлер көптеп келе бастады. Жыл он екі айдың екі-үш айына созылатын қысының қаһары Орталық, Солтүстік Қазақстан облыстарының көктем, күз айларындай жылымық болады. Яғни мал шаруашылығымен айналыссаң, төрт түлікті Арқадағы ағайындардай алты ай қорада ұстамайсың. Қоян жон үйеме шөп дайындау да оншалықты қажет емес. Диқан қауымына да қолайлы. Қыс­тың аяғы сұйылмай жатып, күн жылт ет­кенде пленка астында көшетін егіп, ерте көктемде-ақ алғашқы өнімін алып үлгереді. Бүгінде республикадағы жылыжай атаулының 87 пайызы Оң­түстікке тиесілі екендігінің бір сыры осы тамаша табиғатында жатыр. Сондықтан, Оңтүстікке инвесторлар көп келеді. Жақында Израиль мем­­ле­кетінен кәсіпкерлер келіп, Шым­кентте Қазақстан-Израиль бизнес-фо­румында бірқатар мәселелерді бір­лесіп талқылады. Израильдің Қазақ­стандағы елшілігі мен облыс әкімдігі мұрындық болған бастамалар меморандумға жалғасып, біршама жобаларға қол қойылды. Бұған дейін ауыл шаруашылығы және медици­на салаларында әріптес болып кел­ген екі тарап басқа да бағыттар бо­йын­ша жұмыстар жасамақ. Оңтүстіктегі «Орда­басықұс» серіктестігі Қазақ­стан-Израиль бірлескен жобасы ретінде жұмыс істеп жатыр. Осындағы құс фаб­­­рикасында күркетауық өсіріп, оны өңдеп сату табысы мол сәтті жоба­лар­дың бірі болды. Соның нәтижесін­де Оңтүстікте өсірілген күркетауық өнім­дері шетелдерге де экспортқа шығарыла бастаған. Бүгінде фабрика 10 тоннаға дейін дайын өнім ұсына алады. Басқа ірі қара малдардай емес, шетелдіктер құс етін тағамдарына көп тұтынады. Қазақстанда да жылына 350 мың тоннаға дейін сұраныс болады екен. Яғни, осы бағыттағы жобалар орта жолда тоқтап қалмайды. Бүгінге дейін Оңтүстікте израиль­­дық­тардың қатысуымен 15 ірі жоба атқарылып жатыр. Бұған дейінгі әріптестік негізінен ауыл шаруашылығында болып келсе, енді израильдық кәсіпкерлер жасыл экономика аясында баламалы қуат көздерін өндіруге қондырғылар ұсынып отыр. Сонымен қатар екі тарап «Қауіпсіз қала» және «Ақылды қала» жобаларын талқылап, бірлесе жұмыс жасаудың мәсе­ле­лерімен кеңесті. Израиль мем­лекетінің медицинасы әлемде озық, маман дәрігерлерінің үйретері көп. Халық ден­саулығын нығайтуда сенімді әріптес бола алады. Жалпы, облыс әкімі Бейбіт Атам­құловтың ұйытқы болуымен Оңтүстікке бір жылдың өзінде шетелден ондаған мемлекеттен кәсіпкерлер келген. Алды табысты жұмыс жасап жатыр.Үйретері көп, үйренері де бар.  Құдай қосқан көрші әрі түбі бір аға­йын болса да Өз­бекстан мемлекеті шекара­сын айқара ашудан кешеге дейін тартынып келді. Енді сол сең бұзылғандай. Жа­қын­да Қа­зақстанның Өзбекстан Рес­публикасындағы Төтенше және өкілет­ті елшісі Ерік Өтембаев Оң­түс­тікке жиыр­маға жуық түрлі салаларда қызмет ететін  кәсіпкерлері бар делегацияны бастап келді. Олар сапар барысында «Оңтүстік» индустриялық аймағы мен «Оңтүстік» еркін экономикалық аймағында болып, ондағы кәсіпорындардың тыныс-тіршілігімен танысты. Соңынан екі жақты кездесу өткізіліп, өзара кәсіп­кер­лік байланысты нығайту мақсатында ашық әңгіме болды. Кейінірек облыс әкімінде болған қабылдауда Ерік Өтембаев өзбекстан­дық кәсіпкерлердің ауыл шаруашылығы саласы, тері өңдеу және жеңіл өнеркәсіп бағытында бірлесіп жұмыс жасауға ықтияр екендігін жеткізді. Облыс басшысы Бейбіт Атамқұлов өз кезегінде Өз­бекстан кәсіпкерлері ұсынған бір­лескен жобаларды қолдайтындығын, өңірдің инвестициялық мүмкіндігі мықты екендігін айтты. «Бармасаң, келмесең, жат боласың» дейді халық даналығы. Қарға адым жерде отырған Өзбекстан кәсіпкерлері осы жолы біраз уағдаластыққа қол жеткізіп қайтты. Бақтияр ТАЙЖАН, «Егемен Қазақстан»