Қарағандының үздік учаскелік инспекторы анықталды

Қарағанды облысында осымен төртінші рет ішкі істер органдарының қызметкерлері арасында «Кәсібі бойынша ең үздік» атты конкурс өтті. Бұл жолғы байқауда қарағандылық учаскелік полицейлер заңды білу, дене және оқ ату даярлықтары бойынша норматив тапсырып, күш сынасты. Былтырғы жылдың соңына таман елімізде жергілікті полиция қызметінің құрылғаны белгілі. Қазіргі таңда бұл құрылым өзінің құрамы және атқаратын міндеті бойынша ішкі істер органдарында жетекші қызметке айналды. Ал бұл саланың батпан жүгін арқалаған басты құрылымның учаскелік инспекторлар екендігі сөзсіз. Міне, осы қызметтің беделін көтеру бойынша өткен байқау қорытын­дысында Октябрь аудандық полиция бөлімінің учаскелік инспекторы, полиция капитаны Манарбек Файзуллин үздік деп танылды. Жеңім­пазға естелік кубокты былтырғы жылдың ең үздік учаскелік инспек­торы, полиция майоры Қуаныш Тілек­баев тапсырды. Сондай-ақ, сыннан сүрінбей өткен капитанға 80 мың теңге көлемінде сыйақы берілді. Қайрат ӘБІЛДИНОВ, «Егемен Қазақстан» ҚАРАҒАНДЫ