Семейде жылуға ақша төлемегендер кәріз жүйесінен ажыратылады

Биылғы көктемнен бас­тап жергілікті атқарушы орган мен «Жылукоммунэнерго» ме­ке­месі қызметкерлері, құқық қор­ғау органдары мен жеке сот орын­даушылардың бірлескен жұмыс­тарының нәтижесінде жеке және заңды тұлғалардың 767, 4 млн теңге мөлшеріндегі қарызы 318 млн теңгеге дейін азайған екен. Бұл қарыздың 249,6 млн теңгесі жеке тұлғалардікі, қалғандары кәсіпорын, мекемелерге қатысты болып отыр. Облыс әкімі Даниал Ахметов ағымдағы жылдың мамыр айынан бастап «Жылукоммунэнерго» мекемесінің кредиторлық және де­биторлық қарызын азайтуға қа­тысты бірқатар тапсырмалар жүктеген. Со­ған орай, жергілікті биліктің қа­рыз­дарды азайту үшін сан түрлі тә­сілдерге баруларына тура келді. Тіпті, үгіт-насихат жұмыстарын да жүргізді. Енді жылдар бойы жылуға төлемегендер сот шешімі негізінде кәріз жүйесінен ажыратылып, пәтерге кіреберіс есіктері алынатын болды. Өздеріңіз білесіздер, бүгінде кіреберіс есіктер темір әрі домофонмен жабдықталған. Қымбат тұратын есік екендігі бесенеден белгілі. Осындай шаралар оң нәтиже береді деп күтілуде. Осыған орай жылу маусымының қарсаңында қала әкімі «Жылукоммунэнерго» мекемесінің або­ненттік бөлім қызметкері, жеке сот орындаушылар мен учаскелік инс­пекторлар және БАҚ өкілдерімен бір­лесіп, сот шешімі шыққан бо­рыш­к­ерлердің мекенжайларында болды. Рейд барысында қала әкімі, түрлі өкілетті өкілдер және «Жылукоммунэнерго» мекемесі қызметкерлерінің қатысуымен «Орталық» қазандығының қысқы мерзімге дайындығын тексерді. Жы­лу орталығының қуаты мен кө­мір мөлшерін көрген Ермак Сә­лімов «Жылукоммунэнерго» ны­сандарының жылу маусымына дайындығына ризашылығын біл­ді­р­ді. Оған қоса, мекеме әлеуметтік ны­сандарға тиісті кестеден бұрын жылу берді. Қазандықтар отынмен толық қамтамасыз етілген. – «Жылукоммунэнерго» мен барлық қазандықтар жылу маусымына дайын. 17 қазандықтың 10-ы бүгінде жылу беруде, – деді қала әкімі. – Алдымен әлеуметтік нысандарды жылумен қамтуды бастадық. Ол – ауруханалар, интернаттар мен мектептер, балабақшалар. Бүгінде қалада 30 мың тонна көмір бар. Күнделікті көмір жеткізіліп отырады. Жылуға ақша төлеуден жалтарушылар қатарында тұрақты кірістері бар тұрғындар да бар. Сондықтан да қарызы бар коммерциялық нысандар өздеріне көрсетілген қызмет ақысын төлегендері жөн. Ал төлемейтін, жеке тұлғаларға түбегейлі шара қол­­данылады. Тұрмыстық техникалар мен өзге де мү­ліктерді тәркілеу тәжірибесінен тиісті нәтиже бол­ма­ғандықтан, пәтердің кіреберіс есігін алып, кәріз жү­йе­сі­нен ажырату сынды шара қолданатын боламыз. Қазір заң­герлермен кеңесе отырып, борышкерлердің жеке мүл­кі ретінде пәтерлерінің сыртқы есіктерін тәркілеуге бел будық. Жеке сот орындаушылармен кез­де­стік. Олар жауапсыз абоненттерге қатысты 2 мыңға тарта іс қозғалғанын айтып отыр. – Бүгінде бізде Жамақаев, 219­ мекенжайындағы 8 пәтер кә­різ жүйесінен ажыратылған бо­латын. Қосымша 2 пәтердің қа­ры­зы болғандықтан, жылуға қо­сы­луы әлі белгісіз, – дейді «Жыл­укоммунэнерго» мекемесінің бөлім бастығы Гауһар Жетпісбаева. – Сонымен қатар, осындай рейдтер Физкультурная, 17, 15, Гете, 121 мекен-жайларында да жүргізілді. Рейд жүргізілген екі жарым сағатта 230 мың теңге қарыз жиналды. Бізге белгілі болғандай, биыл қаладағы тұрғын үйлердің 86 пайызы жылуды қабылдауға дайын. Үйдің құбырлары таза, техникалық ақауы жоқ деген дайындық тө­л­құ­жаты тұрғын үйлердің 70 пайызында бар екен. Осы рейдтің қо­рытындысы бойынша кейбір кө­ше­лер тұрғындары қарыздарын өтеуге асықты. Әкім алдағы уа­қыт­та да осылайша өзі рейдке қа­­т­ысып, қарыздарды азайтуға күш жұмсайтындығын атап айтты. Жылу ақысы үшін пәтерлердің есі­гін қағып, қарызды төлеуге ша­қы­рып жүрген қала әкімін көрген Бө­генбай батыр көшесіндегі 23-пә­тер­дің бір борышкері 62 227 теңге қа­рызының 50 мың теңгесін қолма-қол қалтасынан шығарып, келген ко­м­иссиямен есеп айырысты да, қал­ған ақшасын жақын аралықта тө­леймін деп уәде берді.  Раушан НҰҒМАНБЕКОВА СЕМЕЙ