Ынтымақтастықтың іргетасын ғарышкерлер қалады

Жақында Венаның Ritz-Carlton отелінде Қазақстан Тәуелсіздігінің 25 жылдығына арналған конференция болып өтті. Шараны ұйымдастырушылар – Австрия-Қазақстан қоғамы мен Қазақстанның Австриядағы елшілігі. Конференцияға «Австрия-Орталық Азия» парламенттік тобының мүшелері, Австрия Сырт­­қы істер министрлігі, халықа­ралық ұйымдардың атқа­ру­шы құрылымдары және Қазақ­стан елшілігінің қызметкер­лері, Қазақстан Республикасының Авс­триядағы Құрметті консулдары, Австрия-Қазақстан қоғамының мүшелері, қазақ диаспорасының өкілдері мен студенттер, Австрияның экономика, ғылым, мәдениет салаларының және бұқаралық ақпарат құралдарының өкілдері қатысты. Австрия-Қазақстан қо­ға­мының президенті, Австрия Экономика палатасының вице-президенті, доктор Р.Шенц, Австрия-Қазақстан қоғамының атқарушы президенті, доктор Г.Лански, Қазақстанның Австриядағы елшісі Қ.Сарыбай жиынға қатысушыларға құттық­тау сөзбен қайырылды. Сөйле­гендер Қазақстанның тәуелсіздік алғаннан бергі жерде экономика, саясат, білім, мәдениет салаларында қол жеткізген табыстарын, сондай-ақ, Қазақстан-Австрия ынтымақтастығының өзара тиімді дамуын тілге тиек етті. Алдыңғы қатарлы техно­ло­гияға ие австриялық фирма­лардың «Нұрлы жол» мемлекеттік бағдарламасы мен «100 нақты қадам» Ұлт жос­парын жүзеге асы­руға қатысуға мүмкіндігі мол екен­дігіне назар аударылды. Энер­­гия көздеріне қатысты салада за­манауи технологиялар­мен жарақ­тандырылған австрия­лық ком­паниялар үшін қосым­ша мүмкіндік Астанадағы ЭКСПО-2017 көрмесіне қатысуға жол ашады. Конференцияға қаты­су­шы­­ларға алғашқы австриялық ға­рышкер Ф.Фибектің тұңғыш қазақ ғарышкері Т.Әубә­кі­ровпен 1991 жылдың қазанында «Бай­қоңыр» ғарыш айлағынан ғарышқа сапары туралы де­ректі фильм көрсетілді. Бұл Қа­зақ­стан Тәуелсіздігінің рәмізі іс­пет­тес және Қазақстан-Авс­трия ынтымақтастығының негі­зін қалаған оқиға болды. Бұл туралы 1991 жылы қазанда Қа­зақ­станға жұмыс сапарымен бар­ған, ғарыш кемесінің ұшуына куә­гер болған Австрияның бұрын­ғы Федералдық канцлері Ф.Вра­ницкий айтып берді. Қазақстан мен Австрия ара­сындағы екіжақты қарым-қаты­нас­тың алғашқы жылдары туралы Австрияның Қазақстандағы ал­ғашқы елшісі Х.Гюрер ханым баян­дады. Қазақстан Респуб­ли­касы Сыртқы істер министрі­нің орынбасары Р.Василенко қазақ жерінде тоғыз жыл бойы ел­шілік қызмет атқарған Гюрерге екі­жақты ын­ты­мақтастықты да­мы­туға қосқан үлесі үшін көр­некті Алаш дипло­маты Н.Төре­құ­лов атындағы ме­дальді тапсырды. Конференцияның ресми бөлігі аяқталған соң Вена консерватория­сында оқитын қазақстандық студенттер А.Ма­дияр мен А.Овчин­никова қо­нақ­тарды қазақ және классикалық му­зыкаларды орын­даудағы ше­бер­лігімен тәнті етті. Ғабит МҮСІРЕП, «Егемен Қазақстан»