Шанхай ынтымақтастығы аясында семинар өтті

Астанада «ШЫҰ-ға мүше, байқаушы және диалогы бойынша әріптес мемлекеттердің жоғары мемлекеттік аудит (бақылау) органдарының мемлекеттік аудиторларды сертификаттауды енгізу тәжірибесі» деген тақырыпта халықаралық семинар бас­талды. Есеп комитеті ұйымдастырған семинар ШЫҰ-ға мүше мемле­кет­тердің жоғары мемлекеттік аудит (бақылау) органдарының ынты­мақтастығы шеңберінде 2016-2017 жылдарға арналған іс-шаралар жос­парында көзделген. Осы іс-шараға қатысу үшін Қа­зақ­стан астанасына Қытай, Қыр­ғыз­­стан, Пәкістан, Ресей, Түркия­ның жоғары мемлекеттік аудит ор­­ган­­дарының (ЖМАО) өкілдері келді. Семинардың ашылуында Есеп комитетінің төрағасы Қозыкөрпеш Жаңбыршин құттықтау сөз сөй­леді. Қазақстанның жоғары мемле­кеттік аудит органының басшысы түрлі елдердің мамандарына мем­лекеттік аудит саласындағы ең маңызды мәселелер бойынша тә­жірибе мен пікірлер алмасуға мүм­­кіндік беретін осындай кездесу­лер өткізудің маңызды екенін ба­са айтып өтті. Есеп комитеті төр­аға­сының айтуынша, әлемнің тез өзге­ріп отырған жағдайында маман­дар­дың кәсіби деңгейін арттыру, ау­дит жүргізу әдістерін жетілді­ру қазіргі заманғы аудитор­лық қоғамдастық үшін өте өзекті. Қозыкөрпеш Жаңбыршин Есеп комитеті үздік әлемдік тәжірибені зерделеуге және пайдалануға, со­­ның ішінде қазіргі уақытта Қазақ­станда жүргізіліп жатқан мем­ле­кеттік аудиторларды серти­фи­кат­тау шеңберінде де үлкен мән бере­тінін атап өтті. «Сертификаттау жөніндегі ұлт­тық комиссия екі айдан астам уақыт жұмыс жасауда. Мемлекеттік аудит және қаржылық бақылау орган­дарының 661 қызметкерімен әңгі­мелесу өткізілді. Олардың басым бөлігіне мемлекеттік аудитор мәр­тебесі берілді. Ағымдағы жыл­дың соңына дейін 800-ден астам кан­дидатқа қатысты шешім қабыл­данатын болады», – деп хабарлады ол. Семинар барысында оған қатысушылар Қазақстан, Қытай, Қыр­­ғызстан, Пәкістан, Ресей, Түр­кия­ның ЖМАО-ларының мем­лекет­тік аудиторларды даярлау және қайта даярлау мәселелеріне қатыс­ты ұлт­тық көзқарастарымен таны­сып, аудиторлық іс-шара­ларды жүр­гізудің тиімділігі мен сапасын арт­тыру мақсатында оларды серти­фикаттау тетігін жетілдіру жол­дарын талқылады. «Егемен-ақпарат»