Қауіпсіздіктің жаңа парадигмасы

Астанада «Әлем. XXI ғасыр» тақырыбында арнайы жастар сессиясы өтті. «Жас Отан» жастар қанатының ұйытқы болуымен ұйымдастырылған бұл шараға еліміздің ғана емес, Ресей, Қытай, Түркия, Беларусь, Қырғызстан, Тәжікстан, Германия, Әзербайжан, Моңғолия мемлекеттерінің жас көшбасшылары қатысты. Шараның мақсаты – жаһандық қа­уіп­сіздікті нығайтуға бағытталған Елба­сы Нұр­сұлтан Назарбаевтың «Әлем. XXI ға­сыр» манифесінің идеяларына ха­лық­­ара­лық жастар қауымдастығын жұ­мыл­дыру. – Елбасы Н.Назарбаевтың Вашинг­тонда жария еткен манифесі БҰҰ Бас Ассамблеясы мен Қау­іпсіздік Кеңе­сінің арнайы құжа­ты­на айналды. Ол өз елімізде ғана емес, шетел­дерде де үлкен қоғамдық резонанс туғызды. Қазіргі таңда әрқайсымыз және әр­қайсымыздың отбасымыз үшін бола­шаққа деген сенім қажет. Алай­да, бұл сенім бейбіт өмірге келіп тіре­леді. Себебі, бүгінде бейбітшілік пен тұрақ­тылық мәсе­лесі өте өткір тұр. Бұл жиын­да біз еліміздің бейбітшілік пен қауіп­сіздікті сақтау жөніндегі идеяларын әлем жастарын­а насихаттауды көз­деп отырмыз, – деді «Жас Отан» жастар қанатының төрағасы Шах­мар­дан Бай­манов. Ал «Нұр Отан» партиясының хатшысы Фархад Қуанғанов бұл шара Қазақстанның Шанхай ынтымақтастық ұйымына төра­ғалығы аясында өткізіліп отырғанына тоқ­тала келе, мұндай үнқа­ты­сулар тәжірибе алмасуға, ынтымақ­тастықтың көкжиегін кеңейтуге сеп бола­тынын жеткізді. Әлем құбылмалы күйді бастан кешіп тұр. «Эко­но­ми­када, халықаралық қарым-қаты­наста тек­тоникалық өзгерістер орын алуда. Ел­дердің басым көпшілігінде эконо­­ми­калық қарама-қайшылықтар байқалуда. Халықаралық сауда-саттыққа шектеулер, санкциялар енгізіліп, әскери қақтығыстар өрши түсуде. Ал мұндай жағдайда Қа­зақстан Президенті страте­гиялық маңы­зы бар бастамаларды көтерді. Олар әлем мен адамзаттың бо­лашағы үшін алаң­даушылықтан туған. Солардың бірі – «Әлем. XXI ғасыр» манифесі. Он­да Елбасы әлемдік қоғамдастық алдын­да тұрған қауіп-қатерлерді атап, олардан сақтанудың жолдары мен ға­лам­дық қауіпсіздіктің жаңа парадигмасын көрсетеді», деді Ф.Қуан­ғанов. Осы­лай дей келе, ол әлемнің қауіп­сіздік тетігін нығайтуда жастардың халық­аралық ұйымдарға да үлкен міндет­тер жүктелетінін, себебі, елдердің болаша­ғы­ның қандай болмағы жастардың іс-әрекеттеріне тікелей байланысты болатынын жеткізді. Ресейдің «Еуразиялық таңдау» халық­аралық қоғамдық ұйымының төр­ағ­асы Роман Школин бүгінде әлемдік гео­сая­саттың ракурсын «жасанды» түрде өзгер­туге бағытталған әдіс-амалдар кездесе­тінін, ал олардың алдын алу үшін қауіпсіз­дікті нығайтудың жаңа те­тіктерін ойлап табу қажеттігін атап өтті. Сессия аясында жастар ұйым­дары­ның өкіл­дері «Нұр Отан» партиясы бас­шы­лы­ғымен кездесіп, әлемдегі қауіпсіздік пен бейбітшілікті сақтау үшін әріптестік құру мәселелерін талқылады. Сонымен қатар, «Жас Отан» жастар қанаты мен Түркия және Беларусь Республикаларының жастар ұйымдары арасындағы ынтымақтастық жөніндегі екіжақты келісімге қол қойылды. Арнайы жастар сессиясы қоры­­тын­дысы бойынша барлық халықаралық қоғам­дас­тықтың күштерін зорлық-зомбылыққа қарсы біріктіруге шақырған үндеу қабыл­данды. Ләйла ЕДІЛҚЫЗЫ, «Егемен Қазақстан»