«Егемен Қазақстан» Елбасы кітабының жаңа бөлімдерін жариялады

«Егемен Қазақстан» газеті Президент Нұрсұлтан Назарбаевтың жаңа жазылып болған «Ұлы дала ұлағаттары» атты кітабын жариялауды жалғастырып жатыр. Бүгінгі нөмірде және сайтымыза «Тәуелсіздіктің тал бесігі» және «Саясат салтанаты» атты бөлімдері жарық көрді. Бірінші бөлімде Елбасы тәуелсіздіктің тал бесігі Алматы туралы толғаныстарымен бөліседі. «Алматы ұлттық сананы қалыптастырудың рухани орталығы болды» дейді Нұрсұлтан Назарбаев. Екінші бөлім «Саясаттың мәні неде? Саясаткердің мұраты қандай?» деген сұрақтарға ширек ғасырлық жаңа тарих кезеңіндегі басты оқиғалар, алға қойылған және орындалған міндеттер негізінде жауап береді. «Ұлы дала ұлағаттары» кітабына Елбасы Нұрсұлтан Назарбаев қажырлы еңбекке толы ғұмырында саясаткер және адам ретінде түйген ойлары, ел мен жер, адами және ұлттық құндылықтар туралы философиялық толғаныстары жинақталған.