Бағаны бақылау қатая түсті

Облыстағы сауда орындарын­дағы азық-түлік бағаларының көте­рілуіне жол бермеуде кешенді шаралар қабылдануына қа­рамастан, өнімнің кейбір түр­ле­рінің қым­бат­тауы орын алып отырғаны жасы­рын емес. Қанша жерден қадаға­ла­саң да қалтаны қампитуды ғана ой­лайтын кейбір кәсіпорындар, ірі базарлар мен сауда орындары көзді ала беріп, азық-түлік бағаларын қым­­баттата қоюдан тыйылмай келеді. Осы және басқа мәселелер облыс әкімі Елеусін Сағын­ды­қов­тың төрағалық етуімен азық-түлік қауіпсіздігін қамтамасыз ету және азық-түлік өнімдерінің негізгі түрлеріне бағаның өсуіне жол бермеуге бағытталған мәжі­ліс­те өткір әңгіме өзегіне айналды. Құқық қорғау және қадағалау-бақылаушы органдар жетекшілері, Ақтөбе қаласының әкімі мен бірқатар ауылшаруашылық өнім­дерін өндіретін кәсіп­орын­дар­дың, қаладағы ірі сауда мекемелері мен базарлардың басшылары қатысқан жиында мұндай жәйт­терге жол бергендерден қатаң сұралды. Біздің облыстағы инфляция республикалық орта көрсеткіш­тен төмен екендігіне қарамастан, арқаны кеңге салуға болмайды, дей келіп, өңір бас­шы­сы мұндай мазмұндағы жина­лы­стың осы жылы үшінші мәрте өткізіліп отырғанын тілге тиек етті. Әуелі жергілікті азық-түлік рыногын молшылықта ұстау және бірінші қажеттіліктегі азық-түлік өнімдеріне баға өсуін ұстап тұру бойынша қабылданған шаралар туралы қала әкімі Архимед Мұхамбетов пен «Ақтөбе әлеу­мет­тік-кәсіпкерлік корпорация­сы» АҚ басқармасының төрағасы Серғазы Есембаевтың хабарлары тыңдалды. Қабылданған шаралар нәтижесінде он екі атаулар бой­ын­ша, оның ішінде күріш, қара­құмық, қырыққабат, картоп және басқа азық-түлік түрлеріне баға елеулі түрде төмендегені атап өтілді. Бәскелестікті қорғау агентті­гі­нің Ақтөбе және Батыс Қазақстан об­лыс­тары бойынша өңіраралық инс­пекциясының бастығы Азамат Қам­шымбаев өздері жүр­гіз­ген сараптама бойынша, азық-түлік ры­но­гымен қатар тұтыным рыно­гын­дағы бағаны тұрақтан­ды­руға ар­нал­ған бірқатар аудан­дық штаб­тардың жұмыстарын сынға алды. Мәселен, Ырғыз, Темір және Мәр­төк аудандарында азық-түлік ба­ғасы жоғары болса, ең қолайлы баға Шалқар ауда­нында қалыптасқан. Облыс әкімі аудан басшы­лары­на жуық арада баға саяса­тын реттеу туралы тапсырма берді. Алда­ғы уақытта қабылданған шаралар туралы бірінші басшы­лардың есептері тыңдалатын болды. Облыс әкімі «Савола Фудс СиАйЭс» ЖШС жетекшісі Ба­қыт­жан Тұрметовке жергілікті жерде өндірі­летін өнімнің бағасы неліктен қымбат деген сауалды төтесі­нен қойды. Атал­мыш кә­сіп­орын өндіретін «Лето» майының бір литрі 308 теңге тұрады, ал Шығыс Қазақстан облысынан әкелін­ген осындай өнім 301 теңгеден сатылуда. Жергілікті рыноктағы қолже­тім­ді баға бойынша етпен қам­тамасыз ету жолдарын талқылау барысында облыс әкімі «өн­діруші – өнімді өткізуші» тізбегінде дел­дал-сатып алушыларды болдыр­мау қажеттігі­не назар аударды, осыған бай­ла­ныс­ты қажетті шаралар алу жөнінде тиісті органдарға нұсқау берді. Сатыбалды СӘУІРБАЙ, Ақтөбе облысы.