Күздің де соңғы айы өтіп жатыр. Қылышын сүйретіп қыстың келетін шағына тым жақын қалды. Осы ретте көкейге «Спорт нысандарының қысқы маусымға дайындығы қандай?» деген сауалдың оралатыны да рас. Сондықтан біз осы сұраққа жауап алуды аймақтардағы тілшілерімізге тапсырған едік. Бүгін солар бойынша әзірленген алғашқы мақаланы жариялап отырмыз.
Қостанай мемлекеттік педагогикалық институтындағы дене тәрбиесі, туризм және спорт факультеті мектептер үшін денешынықтыру пәнінің мұғалімдерін дайындайды. Факультет жанындағы спорт клубы теориялық білім алып жүрген студенттерді спорттың түр-түріне баулиды. Мұнда спорттың қай түріне де шектеу жоқ, мүмкіндік толық жасалған. Дегенмен, еліміздің солтүстігінде қар ұзақ жататындықтан, қысқы спорт түрлерін жастар ұнатады. Қалалық, облыстық шаңғышылар жарыстарынан педагогика институты шет қалған емес.
– Биыл қысқы спортқа дайындығымыз жаман емес. Спортпен айналысу үшін материалдық база жеткілікті болуы тиіс. Біздің институт осыдан біраз жыл бұрын алған шаңғылардың тозуы жетіп жүр еді. Биыл 100 шаңғыға сұраныс беріп қойдық, жақын уақытта қолымызға тиіп те қалады, – дейді білім ордасы спорт клубының жетекшісі Аманжол Төлегенов.
Педагогика институты болған соң, әрине, студенттердің басым көпшілігі қыздар. Әдетте, білім ордасында спорттың бұқаралық болып саналатын екі түрі бар. Қыздар волейболды ұнатады, ал жігіттердің футболға көңілі ауып тұрады. Осы екі спорт түрі де қыс айларында да ешқандай бәсеңсімейді. Өйткені, институттың спорт кешенінде волейболды да, футболды да, баскетболды да студенттер кең залда ойнай береді. Спорт залға осыдан бірнеше жыл бұрын жөндеу жұмыстары жүргізілген болатын.
– Әр нәрсенің өзінің ыңғайы бар ғой, институт басшылығы спортклубқа биыл шаңғы алып беруді жөн көрді. Барлығы да қаржыға тірелетін болған соң, жөндеу жұмыстары келесі жылға қалдырылды. Көңілдің жақсыны қалап тұрары болмаса, спорт залдың жағдайы жаман да емес, – дейді Аманжол.
Спорт клубта спортты жанына серік еткен студенттер қатары кем емес. Әсіресе, жігіттер жағы күрестің барлық түрімен айналысады. Ауыр атлетикадан, пауэрлифтингтен, конькимен сырғанаудан, шаңғыдан Қостанай мемлекеттік педагогика институтының студенттері облыс бойынша алдыңғы орындардан көрінеді. 2013 жылы республикалық универсиада Қостанайда өткен болатын. Сонда институт командасы екінші орынды иеленді, ал өткен жылы Алматыда өткен универсиадада төртінші орынды алды.
Оның сыртында облыста қысы-жазы өтіп жататын облыстық, қалалық жарыстардан студенттер тыс қалмайды. Қазір институттың республика құрама командасының сапына енген 5 спортшы-студенті алдағы Алматыда өтетін дүниежүзілік Универсиадаға қызу дайындық үстінде екен. Спорт клубының жетекшісі Аманжол Төлегенов алдағы жылдың басында елімізде тұңғыш өтетін Универсиадаға институт спортшыларының қатысуы үлкен дәреже екенін айтты.
Нәзира ЖӘРІМБЕТОВА,
«Егемен Қазақстан»
ҚОСТАНАЙ