Ұйымшылдық үрдісі, шынайы қолдау үлгісі

Қазақстан Республикасы президенттігіне кандидат Нұрсұлтан Назарбаев­тың респубикалық қоғамдық шта­бы­ның сайлауалды үгіт-насихат жұмыс­тары Ақтөбе облысында жалғасты. Кеше «Нұр Отан» ХДП облыстық фи­лиалында кандидаттың республикалық штабының мүшелері, «Нұр Отан» ХДП бастамасымен құрылған, құрамына саяси партиялар жетекшілері, қоғам қай­раткерлері, сондай-ақ үкіметтік емес ұйымдар мүшелері кіретін «Қазақ­стан-2020» жалпыұлттық демо­кра­тия­лық күштер коалициясының өкілдері облыс активімен, жоғары оқу орын­дары ұстаздарымен, кәсіпорындар мен мекемелер қызметкерлерімен, үкіметтік емес ұйымдар өкілдерімен кездесті. Кездесуде сөз алған «Нұр Отан» ХДП Төрағасының бірінші орынбасары Нұрлан Нығматулин еліміз тәуелсіздік алғаннан бергі жиырма жыл ішіндегі саяси тұрақтылық пен экономикалық дамуды Н.Назарбаевтың есімімен бай­ла­ныстыра әңгімеледі. Нұрсұлтан Әбіш­ұлы­ның демократиялық мемлекет құ­рудағы, еліміздегі экономикалық қайта құ­рулардағы ерен еңбегінің нәтиже­сін­де Қазақстанды әлем мойындағанына дәйекті дәлелдер келтірді. – Биыл еліміздің Тәуелсіздігіне жиыр­ма жыл толғалы отыр. Осы уақыт ішінде біздің еліміз бүкіл әлем таныған мемлекет болып қалыптасты, татулық пен бірліктің, ынтымақтастықтың жар­қын үлгісіне айналды. Алда тұрған ас­қаралы міндеттер мен жоба-жоспар­лар­ды тек Нұрсұлтан Әбішұлымен бірге жүзеге асыра алатынымыз айдан-анық. Сондықтан, алдағы болатын ел президенттігіне сайлауда халықтың таңдауы Нұрсұлтан Назарбаев болатынына кә­міл сенімдіміз. Алда тұрған міндеттерді жүзеге асыруда көшбасшылар қата­рын­да келе жатқан облыс халқы алдағы сайлауға белсене қатысып, Нұрсұлтан Әбішұлының кандидатурасын бірауыз­дан қолдап дауыс береді деп ойлаймын.Сіздерді тура осындай таңдау жасауға шақырамын, – деді ол. Кездесуде Нұрсұлтан Әбішұлын қол­дауға үндеп «Әділет» демо­кра­тия­лық партиясының төрағасы Мақсұт Нә­рік­баев, «Ауыл» социал-демократиялық пар­тиясының төрағасы Ғани Қалиев сөз сөйледі. Парламент Сенатының де­пу­таты Қуаныш Сұлтанов тәуел­сіз­дік­тің елең-алаңындағы қиындықтарды жеңе оты­рып, Н.Назарбаевтың елімізді әлемдік қаржы дағдарысынан да әдемі алып шыққанын жеткізді. Ол ақтө­бе­ліктерді Н.Назарбаевтың кандидатура­сын қолдап дауыс беруге шақырды. Атақ­ты спорт­шы, бокстан олимпиада чемпионы Ермахан Ыбырайымов пен «Қазақстан студенттері альянсы» қо­ғам­дық бірлесті­гі­нің мүшесі Ербол Шыма да елімізде жастар үшін жаса­лып жатқан игі істерден хабардар етті. Сон­дықтан жастардың сайлауда Нұр­сұл­тан Әбішұлын қолдайты­нына сенімділік танытты. Сол күні Нұрлан Нығматулин бастаған коалиция мүшелері үш топқа бөлініп, халықпен үш жерде кездесу өткізді. Нұрлан Нығматулин бастаған топ «Ақтөберентген» акционерлік қоғамының ұжымымен жүздесті. Коалиция мүшелерін кәсіпорын ұжымы риясыз көңілмен қарсы алды. «Біз Елбасыға дауыс береміз», «Біздің таңдауымыз –  Нұрсұлтан Назарбаев» деген үндеулер ұстаған жұмысшылар­дың Н.Назарбаевты қолдайтындықтары анық аңғарылып тұрды. Кәсіподақтар федерациясының төр­ағасы Сиязбек  Мұқашев, «Атамекен» одағының төрағасы Азат Перуашев, «Қаз­ТрансГазАймақ» АҚ бас дирек­то­ры Қайрат Шәріпбаевтың сөздері де  елі­міздің қол жеткен табыстары төңі­ре­гінде тоғысты. Кәсіпорын жұмыс­шы­лары атынан сөз алған Ақжарқын Омарова өздері үшін Нұрсұлтан Назарбаевтан басқа таңдау болмайтынын айтты. Фрезерші Оразбай Саймағамбетов ал­дағы президенттік сайлау­да Нұрсұлтан Назарбаевтың канди­да­ту­расын қолдай­тындықтарын білдірді. «Нұр Отан» ХДП Төрағасының бірінші орынбасары Нұрлан Нығматулин осы салтанатты сәтті пайдаланып, Оразбай Саймағамбетовті туған күні­мен құттықтап, гүл шоғын және бағалы сыйлық тапсырды. Ол ұжымның тең жартысы болып табылатын қыз-ке­лін­шектерді өткен мерекелерімен құттық­туды да ұмытпады. Қалған екі топтың біреуі Алға ауданы тұрғындарымен, екіншісі, қаладағы «Достық» үйінде этномәдени бірлестіктер, шығармашылық интеллигенция өкілдері және мәдениет саласы қызметкерлерімен кездесті. Сатыбалды СӘУІРБАЙ, Ақтөбе.