Президенттіктен үміткерлерді тіркеу басталғанда, біздің ҚКХП да өзінің белсенді бір мүшесін саясат додасына қосуды дұрыс деп тапты. Үміткеріміз Ақмола облысының Қорғалжын ауданындағы Жантеке атты шалғай елді мекенде он бір бала туып, тәрбиелеп өсірген ардақты ата-ананың шаңырағында дүниеге келіпті. Демек, бірлік пен тірліктің, қиындық пен жеңістің не екенін кітаптан емес, өмірдің өзі арқылы біліп өскен азамат деп сенеміз оған.
Шынында, он екі жасында қара жұмысқа жегіліп, он бес жасында трактор тізгінін ұстау қай жасөспірімге де оңай емес. Бірақ оның жастық жігері қиындықтан мұқалмапты. Жиырма төрт жасында Қызылсай ауылдық округінде депутат болған ол өзінің ел үшін туған ер екенін түрлі лауазымды қызметтерге қол жеткізу арқылы одан ары дәлелдей түскен. Сөйтіп, ақ-қараны айыра білетін әділ, қарапайым халық жағында жүретін қайырымды азамат ретінде ауыл, аудан және облыс жанашырына айналған. Ал сыбайлас жемқорлық пен пайдакүнемдік пиғылына қарсы тұру ниеті оны ҚКХП мүшелігіне алып келген.
ҚКХП Жамбыл облыстық комитетінің 6 мыңға жуық мүшесі бар болса, соның барлығы өз үміткерін қолдайтыны белгілі. Басқа сайлаушылардан да үміттіміз. Ол үшін біз бүгінде сайлауалды штаб құрып, үміткерімізді қолдауға байланысты үгіт-насихат жұмыстарының жоспарын жасадық. Жоспар бойынша, сайлаушыларды «қалалықтар» және «далалықтар» деп бөлмей, үгіт-насихат жұмыстарын ел тұрғындары арасында бірдей жүргізуге мән бермекпіз.
Ал президенттіктен үміткерлер арасынан кімді таңдап, кімге дауыс береді, ол – халық қалауында. Оған ешкім қол сұға алмайды.
Әбдірахман МАМАШЕВ, ҚКХП Жамбыл облыстық комитетінің бірінші хатшысы.
Тараз.