Оған «Көгеріс» ауылшаруашылық өндірістік кооперативі үлгі бола алады
Газет тілшісі болып қызмет атқарып жүрген соң осы бір мәселе мен тақырыпты көтеріп жазсам ба екен деген әртүрлі ойлардың келетіні де рас. Осы ойды әріптесім Сейфолла Шайынғазының газетіміздің биылғы 11 қараша күнгі нөмірінде жарияланған «Жеке шаруашылық жетістікке жетсін десек...» атты сараптамалық материалы дөп басқанын айтқым келеді. Мұнда автор шалғайдағы ауыл тұрғындары қолдарындағы азын- аулақ малдары мен оның өнімдерін өткізуде үлкен қиындықтарға тап болатынын қынжыла жазыпты. Әрі осы мәселенің шешімі мен тиімді жолдарын іздестіруге ұмтылыпты. Ең бастысы, өндіріс орындары жоқ еліміздің шалғай ауылдарында күнделікті тіршілігін қолындағы азын-аулақ малымен айырып отырған ағайындардың бүгінгі жай-күйіне алаңдаушылық білдіріпті. Осы тұрғыда не істеу керек деген сауал қойыпты.
Бәсе, не істеу керек? Осы арада әріптесім қойған сауалға қатысты жауап іздер болсақ, мұндай жағдайда не істеу керектігін білген шалғай ауыл тұрғындары да бар екенін айтқан жөн. Баяғы кеңестік кезеңдегі совхоздар мен колхоздар жүйесінде бұлардың бөлімшілері мен фермалары да болушы еді ғой. Сірә, өркениеттен алыс жатқан деп бүгінде осы құрылымдардың ізінде тұрып жатқан ағайындарымызды атасақ, қателеспейтін шығармыз. Әйтсе де олар бүгінгі заман талабына сай икемделе білгеніне Сырым ауданындағы Бұлдырты ауылдық округіне қарасты «Көгеріс» ауылшаруашылық өндірістік кооперативі мысалында әңгіме өрбітуге болады.
Бұл жоғарыда айтылғандай, бұрынғы Бұлдырты совхозының бір бөлімшесі екен. Шағын ауылда елу алты түтін бар болып шықты. Яғни, бұл мұнда соншама отбасы тұрады деген сөз. Оның әрқайсысы азды-көпті мал ұстайтыны айтпаса да белгілі емес пе? Әріптесіміз мәселені орынды жазғандай, өздері өсірген мал мен оның өнімдерін қайда өткізерін білмеген әрі жұмыртқадан жүн қырқып, әлекедей жалаңдаған коммерсанттарға жем бола берген ауыл тұрғындары өзара бірігіп кооператив құруды ұйғарыпты. Оған өздерінің орталарынан еті тірі, шаруаның ыңғайы мен жөн-жосығын жақсы білетін бір адамды төраға етіп сайлапты. Ендігі жерде сауалды не істеу керек деп емес, кішкентай ауылда құрылған кооперативтің ерекшелігі неде, бұл ауыл тұрғындары үшін нендей тиімділік әкеле алады деп қойғанымыз жөн шығар. Сұрақ өз иесіне солай қойылды да. Бұл сауалға қайтарылған жауаптың түп-төркінін «Көгеріс» ауылшаруашылық өндірістік кооперативінің төрағасы Боранбай Сарбөпеев төмендегіше түйіндеп берді.
Облыс орталығынан шалғай жатқан ауыл тұрғындарының негізгі күнкөріс көзі мал ғой. Әйтсе де жерлестеріміз бұдан айта қаларлықтай пайда тауып жарытпайтынын көзіміз көріп жүрді. Өзім де солардың бірі емеспін бе? Сөйтіп жүргенде бір күні республикамызда қабылданған «Ауылдық тұтыну кооперативтері туралы» заң қолыма түсе қалғаны. Мұнда көрсетілген талаптар ойымнан шыққан соң кооперативке біріксек қайтеді деген ішкі ойым мен ұсыныс-пікірімді ауылдастарыма жеткіздім. Олардың дені негізінен мені қолдады. Сөйтіп арада көп уақыт өтпей осы ойымызды іске асырып Әділет департаментінде заңды тұлға, заңды түрдегі кооператив ретінде тіркеуден өттік. Жеке аулалардағы мал басын біріктіріп, оны асылдандыру мәселесін ойластыра бастадық. Бұл үшін аталған заң аясында мемлекеттен берілетін өтемақы біз үшін үлкен көмек болды. Ал 2015 жылдың 29 қазаны күні республикамызда «Ауылшаруашылық өндірістік кооперативтері туралы» заң шыққаннан кейін мұның алдындағы тұтыну кооперативтері туралы заң күшін жойып, соңғы заңға орын берді.
Кооператив төрағасының әңгімесінен тағы бір көңілге түйгеніміз, олар бірінші кезекте заңда көрсетілген мүмкіндіктерді пайдаланып, рыноктық баға бойынша әрқайсысы 354 мың теңгеден он бас асыл тұқымды аталық мал – бұқа сатып алыпты. Осы қаражаттың елу пайыздық мөлшері мемлекеттің демеуқаржысы есебінен кейін қайтарылып берілген. Сонымен бірге, селекциялық-асылдандыру жұмыстарын жүргізу барысында ірі қараның әр бас аналық малына 18 мың теңге тағы да төленген. Бүгінгі күні «Көгеріс» ауылшаруашылық өндірістік кооперативіне 300 бас сиыр біріктірілген. Оның әрқайсысына төленетін 18 мың теңге көлеміндегі сома тұрғындар иелігіндегі аналық ірі қараның тұрқы мен генетикалық қорын жақсарту және оны біртіндеп асыл тұқымға айналдыру үшін бөлінген. Сонда кооперативтің мемлекеттен алған көмек қаржысының жалпы мөлшері 5 миллион 400 мың теңге құрағанын есептеп шығару қиынға соқпайды.
Асыл тұқымды мал өсірудің тиімділігін, ол жай малға қарағанда үш-төрт есе өнімді екенін Елбасымыз да үнемі айтып келеді. Осы тұрғыда «Көгеріс» ауылындағы қарапайым тұрғындардың бастамасы еліміздің әр қиырынан қолдау тауып жатса, бұдан тек ұтар еді демекпіз. Бұған дейінгі материалымыздың бірінде ауыл тұрғындарының малдары жиі ұрланып, қолды болатындығы жөнінде жазған едік. Кооператив мүшелері бұл мәселеге де алаңдамайды. Өйткені олар ортақ қаражаттың есебінен бақташы ұстайды. Малдың жем-шөбі мен суы жөніндегі жәйттерді де жөнге қоя алады.
Сырым ауданында құрылған өндірістік кооператив мүшелері келесі кезекте лизингке жаңа техникалар алуды ұйғарған. Сонымен бірге, олар өз ауылдарының мәдени-тұрмыстық деңгейін одан әрі көтеру мәселесіне де белсенді түрде араласып жүргені сүйсіндірмей қоймайды. Соның бір айқын айғағы бюджеттен бір тиын қаражат алмай, өз күш-қаражаттары мен асарлату арқылы сыңғырлаған жаңа клуб ғимаратын салып алғаны. Кооператив мүшелерімен кездесу барысында біз олардың бұл істің тиімділігіне, оның әр отбасы үшін материалдық тұрғыдан өте пайдалы екеніне көз жеткізіп үлгергендеріне куә болдық. Енді алдағы уақытта олар он-он бес бастан тұратын шағын мал бордақылау алаңдарын салуды ойластырып отыр екен.
Осы материалды әзірлеу барысында ұққанымыз мал өнімдерін өндіру мен өңдеу және оны өткізу ісінде де кооператив мүшелері қиындық көрмейді десе болады. Бұл мәселе облыс орталығындағы ет және сүт өнімдерін өндіретін «Жайық ет», «Береке» және «Каверин» секілді ірі өңдеуші ауылшаруашылық құрылымдарымен бірлескен іс-қимыл таныту, бұл үшін екі жақты өзара тиімді келісімшарттар жасау арқылы шешімін таппақ. Ал ауылшаруашылық кооперативінен түскен пайда оның мүшелерінің ортақ іске қатысу үлесіне қарай бөлінбек. Тиісті міндетті орындаған жағдайда кооператив мүшелері қаржының белгілі бір бөлігін өз қалауларына қарай жұмсай алады екен.
Дәл осы тұста жалқыдан жалпыға көшудің де реті келіп тұрғандай. Осы орайда «Ауыл шаруашылығы өндірістік кооперативтері туралы» Қазақстан Республикасының заңы биылғы 2016 жылдың 1 қаңтарында күшіне енгенін айтқан жөн. Ендеше тұтастай алғанда, бұл тұрғыда Орал өңірінде нақты нендей іс-шаралар кешені қолға алынған деген сауал туады. Біз оны Батыс Қазақстан облысының ауыл шаруашылығы басқармасының басшысы Марат Оңғарбековке қойған едік. Ол бізге өңірде бүгінгі материалымыздың басты желісін құраған Сырым ауданындағы «Көгеріс» ауылшаруашылық өндірістік кооперативі үлгісіндегі 114 кооператив құрылғанын айтып берді. Бұлардың аяқтарынан тік тұрып кетуі үшін бюджет қаражаты есебінен 244 миллион теңге көлемінде демеуқаржы төленген.
Бұл аз ба, көп пе? Ауылдағы қарапайым тұрғындарды қолдауға бағытталған осынау қаражат мөлшері алғашқы қарлығаш-қадам үшін қанағат тұтуға әбден болады деген ойдамыз. Осындайда ойдан ой туады. Әрі бұл ой елімізде ауылшаруашылық өнімдерінің басым бөлігін кімдер өндіреді деген сауалдар төңірегінен туындайды. Осы орайда Ауыл шаруашылығы министрлігінің ресми сайтында жинақталған деректерге көз салсақ, аталған істе шаруа қожалықтары мен ірі агрофирмалар жалпы ауылшаруашылық өнімдерінің 30 пайызға жуығын өндіретінін көреміз. Мұнда ауылшаруашылық кәсіпорындарының үлесі 20 пайызға тең. Ал қалған 50 пайыздан астам үлес ел ішіндегі жеке аулалар мен шаруашылықтардың үлесіне тиеді екен.
Талас жоқ, бұл өте ауқымды үлес. Үлкен мүмкіндік. Мұндай жағдайда ауылшаруашылық кооперативінің келешегі зор болмақ. Ендеше, тиісті заңға сәйкес кооператив құрған ауыл тұрғындарына бөлінетін демеуқаржының мөлшері де уақыт өткен сайын арта түсетініне күмән келтіруге болмайды. Бүгінгі мақсат мемлекет тарапынан жасалып отырған осы мүмкіндік пен қамқорлықты қарапайым ауыл тұрғындарының қалт жібермей пайдалана білуінде. Бұл екіншіден, ел-жұрттың ауызбіршілігін қамтамасыз етудің таптырмас жолы да. Яғни, асыл тұқымды мал ұстау үшін ресми мәртебе алу – мемлекеттік қолдауға ие болу деген ұғым болып шығады.
Сондай-ақ, мемлекеттік өндірістік кооперативтерге ауылшаруашылық техникаларын алуға, модульды сүт қабылдау қосындарын құруға да қаржылай қолдау көрсетеді. Тіпті, кооперативтің мүшелері өзге мемлекеттік бағдарламалар шеңберінде несиелер алып, оны салалық кластер құруға жұмсай алады. Кооперативтердің құрылуы – бірігудің тиімді тәсілі. Осы арқылы ауылшаруашылық өнімі көлемін өсіріп қана қоймай, оның сапасын көтеруге де болады, деді газет тілшісіне есімі Орал өңіріне танымал ғалым, Жәңгір хан атындағы Батыс Қазақстан аграрлық-техникалық университетінің деканы, ауылшаруашылық ғылымдарының докторы Едіге Насамбаев. Жаңа заңда ауылшаруашылық кооперативінің бірнеше түрін құру қарастырылған. Бұл оның өндірістік, жабдықтау және өңдеу секілді түрлері болып табылады. Өз атауынан көрініп тұрғандай, оның әрқайсысының атқаратын өз функциялары бар.
Мамандар мен сараптамашылардың пікірінше, ауылшаруашылық кооперативі өндірісті басқарудың мүлдем тың, тосын тәсілі. Оның мүшесі болуға ниет білдірген ауыл тұрғыны пайлық жарна ретінде малын, сонымен бірге жылжитын және жылжымайтын мүліктерін белгілі бір мерзімге кооперативтің еншісіне ауыстырады. Бұл жөнінде арнайы акт жасалады. Солай бола тұрса да кооператив мүшелері сонымен бір мезгілде өзінің заңдық және экономикалық дербестігін сақтап қалады. Яғни, жер мен ауылшаруашылық техникасының иесі болып қала береді.
Шаруашылықты жүргізудің кооперативтік үлесіне тән ерекшеліктің бірі –өнім мен жабдықтаудың тұрақтылығы. Тасымалға жұмсалатын жалпы шығындардың үнемді болуы. Өнімділігі жоғары құрал-жабдықтар салып алынуы, кооперативтің әрбір мүшесінің құқығы толық сақталуы. Ұсақ-түйектік, тауарларды өткізудің тар өрістілігі ауылшаруашылық кооперативіне жат. Керісінше, оларға өндірілетін өнімдерді үлкен партиямен жөнелту үрдісі тән. Осы арқылы айналым қаражатының көлемін одан әрі өсіре беруге болады. Бұл өз кезегінде кооператив мүшелеріне жаңа техникалар мен қосымша асыл тұқымды малдарды сатып алуға және қажетті мал азығын жасақтауға мүмкіндік береді деп мәлімдейді мамандар.
Темір ҚҰСАЙЫН,
«Егемен Қазақстан»
Батыс Қазақстан облысы