Соңғы кезде заңгер кадрларға деген талап айтарлықтай күшейтіліп келеді. Осыған орай, кеше Бас прокуратурада «Заңгер кадрларды даярлау, құқық қорғау органдарына іріктеу және жылжытудың өзекті мәселелері» тақырыбында халықаралық дөңгелек үстел Бас прокуратура жанындағы Құқық қорғау органдарының академиясымен және IRZ Германия халықаралық құқықтық ынтымақтастық қорының қолдауымен болып өтті.
Бас прокурор бірінші орынбасары Иоган Меркель тәуелсіздік жылдары құқық қорғау органдарының кадрлық саясатында едәуір жұмыстар атқарылғандығын ерекше атады. Жалпы, кадрлық болжам, басшылық лауазымдарға кадрлық резерв, бәсекеге қабілеттілік көрсеткіші, қызметкерлерді бағалау, лауазымдар бойынша разрядтар енгізілді, ротациялауға жататын басшылық лауазымдардың тізбесі бекітілген. Сондай-ақ, ашықтықты қамтамасыз ету үшін ведомстволық деректер банкі құрылуда. Онда бос басшылық лауазымдар туралы мәліметтер жинақталады. Әрбір қызметкердің жұмысын объективті өлшеу және бағалау үшін жұмыс стандарттары енгізілетіні де назардан тыс қалмады.
Ал Құқық қорғау органдары академиясының ректоры Ұлан Байжанов құқық қорғау жүйесі үшін кадрлар даярлаудың жаңа моделін таныстырды. Оның мәліметіне қарағанда, соңғы 12 жылда елімізде жоғары оқу орындарын 250 мыңға тарта заңгер бітірген. Әрбір 100 мың тұрғынға шаққандағы көрсеткіш бойынша Қазақстан Корея, Жапония, Германия, Ұлыбритания және АҚШ сияқты елдерді артқа тастаған. Жыл сайын елімізде заңгерлерді даярлауға рұқсаты бар 82 жоғары оқу орны болса, олар жылына 30 мың талапкер жинақтайды екен. Тек 2015 жылдың өзінде ғана 20 мыңға тарта түлек заңгерлік мамандық иесі атанған. Алайда, жаңа талаптарға сәйкес таңдау жасағанда олардың 75 пайызы бірінші кезеңнен-ақ сүрініпті. Басқасын айтпағанда, құқық қорғау органдарының қызметін реттейтін негізгі заңдарды білмейтін болып шыққан.
Отырыс барысында сөз алған Майндағы Франкфурттың бұрынғы бас прокуроры Ханс-Йонзеф Блюмензатт өз кезегінде Германияда заңгерлік білім алу үшін 4, 5-6 жыл қажет екендігін алға тартты. Сонымен қатар, жоғары оқу орнын бітірген түлектер 2 жылдық тағылымдамадан өтуі қажет болса, оның нәтижесі бойынша да мемлекеттік емтихан тапсырады екен. Тек емтихан тапсырғаннан кейін ғана заңгер атанып, судьялыққа немесе прокурорлыққа өз кандидатурасын ұсына алатын көрінеді. Бұл елде екі жылдық тағылымдамадан өткендердің 15 пайызы, яғни 7 мыңы ғана екінші мемлекеттік емтиханнан сүрінбей, үлкен өмірге жолдама алады екен. Солардың көпшілігі адвокат болып шығатыны ерекше аталды.
Бұдан кейін сөз алған Мемлекеттік қызмет саласындағы өңірлік хабтың басқарушы комитетінің төрағасы Әлихан Байменов бұрынғы бір данышпан заңгердің «Заңдар да адамның өсуін ескеріп пішілген киімі сияқты болуы керек» дегенін орнымен келтірді. Кадр даярлауды қоғамның 10-15 жылдағы өсуін ескере отырып жүзеге асырған жөн, деген Ә.Байменов кадр даярлау жүйесі еліміздің дамуы барысын ескере әрі даму әлеуетін қаперге ала жүзеге асқаны жөн деген пікірін ортаға салды.
Қорыта айтқанда, талқылау барысында сарапшылар заңгер кадрларды даярлау, іріктеу, құқық қорғау органдарында заң кадрларының мансаптық өсуін қамтамасыз ету сияқты мәселелерде өз пікірлерімен және тәжірибелерімен бөлісті. Оның нәтижелері бойынша заң кадрларын даярлау, іріктеу және ілгерілету жүйесін жетілдіру, құқық қорғау органдары кадр саясатының тиімділігін арттыру бойынша ұсынымдар енгізілгендігін атап кеткен орынды.
Асқар ТҰРАПБАЙҰЛЫ,
«Егемен Қазақстан»