М.Әуезов атындағы Қазақ мемлекеттік академиялық драма театрында Қазақстанның халық әртісі, «Парасат» орденінің иегері Нүкетай Мышбаеваның 80 жасқа толу мерейтойы аталып өтті.
Театр өнерінің негізін қалаған майталмандардың көзін көріп, тәрбиесін алған, әйгілі Асқар Тоқпановтың шәкірті, сахнада сандаған образдар галереясын жасап, бірнеше буын көрерменнің сүйікті актрисасына айналған Нүкетай Мышбаеваның сексеннің сеңгіріне шыққан тойына мәдениет пен әдебиет, өнер саласының қайраткерлері, театр ұжымы, көрермен қауым көп жиналды.
Алматы облысы Нарынқол ауылында дүниеге келіп, 1954 жылы Алматыдағы Құрманғазы атындағы консерваторияның актерлік бөліміне түскен жас Нүкетай оқуды бітірген соң М.Әуезов атындағы академиялық драма театрының актерлік тобына қабылданған. Содан бергі алпыс жылға жуық уақыт бойы театр қара шаңырағында үзбей еңбек етіп, сахнаның ауыр жүгін серіктестерімен бірге көтеріп келе жатқан актриса бүгінде халықтың сүйіктісі, қазақ өнерінің көрнекті тұлғасы болып отыр.
Режиссер Әзірбайжан Мәмбетовтің «Беу, қыздар-ай!» спектаклінде сәтті шыққан Айсұлуды алғашқы рөлі ретінде сомдаған Нүкетай сол кездері Әбділда Тәжібаевтың «Той болардасындағы» Айбала, «Көңілдестер» драмасындағы Роза, Қалтай Мұхамеджановтың «Құдағи келіпті» комедиясындағы ақкөңіл де адал Марфуға сияқты комедиялық рөлдерді сахналай жүріп, осы жанрдың үлкен шеберіне айналды.
Нүкетай Мышбаеваның драма жанрындағы алғашқы күрделі еңбегі «Ана – Жер-ана» спектакліндегі Әлиман рөлін сомдауы болды. Актрисаның осы рөліне қатысты Шыңғыс Айтматов: «Нүкетай Мышбаева Әлиманды менің шығармамдағыдан да терең ойнады» деп жоғары баға берген еді.
Күрделі әлеуметтік драмаларда ұлттық дүниетанымы, қазақы пайым-парасаты, рухы мықты, кесек мінезді қазақ әйеліне тән айрықша қасиеттерді аша білген Нүкетай актрисаның жалпы театр сахнасындағы үлкенді-кішілі сексенге жуық рөлінің барлығы да оның жүрек лүпілі, өнер іздері, өмірлік тәжірибесі мен үлкен рухани ізденістерінің жемісі һәм жеңісі.
Негізгі шығармашылығы сахна болғанымен, Нүкетай Мышбаева кино мен дубляждың да майталман маманы. Кинодағы алғашқы басты рөлі – «Қазақфильм» киностудиясының «Шығыс жолы» (1968 ж.) көркем фильміндегі жылқышы әйел. Сондай-ақ, ол «Жазда жауған қарда» (1965 ж.) Хатша, «Ағам үшін қалыңдықта» Өзген, «Алпамыс мектепке барадыда» мейірбике, «Жамбыл» (1996 ж.) фильмінде Жамбылдың анасы, «Тастандыларда» Сәбитхан апа рөлдерінде көрінген.
Сахна саңлағының мерейтойына орай өткен кешке арнайы келген Мәдениет және спорт вице-министрі Ақтоты Райымқұлова Елбасы Нұрсұлтан Назарбаевтың құттықтау хатын оқып берді. Қазақстан Жазушылар одағының басқарма төрағасы Нұрлан Оразалин Мемлекеттік хатшы Гүлшара Әбдіқалықованың, Сенат Төрағасы Қасым-Жомарт Тоқаевтың, Мәжіліс депутаты Серік Сейдуманов Мәжіліс Төрағасы Нұрлан Нығматулиннің, құттықтауларын жеткізді. Кешке актрисаның туған жері – Нарынқол ауылының әкімі де келіп, мерейтой иесіне сый-сияпатын ұсынды. Мерекелік кеш сахналық көрініспен және Нүкетай Мышбаева ойнаған қойылымдардың үзінділерін көрсетумен жалғасты.
Мира БАЙБЕК,
«Егемен Қазақстан»
АЛМАТЫ