Алматыда 9 айда 871 лауазым иесі жемқорлығы үшін жауапқа тартылды
Мегаполисте жемқорлыққа қарсы кезекті ауқымды жиын өтті. Алматы қаласы кәсіпкерлер палатасы мен «Жаңару» Жалпыұлттық сыбайлас жемқорлыққа қарсы қозғалысы» республикалық қоғамдық бірлестігі Алматы филиалы қаладағы кәсіпкерлердің басын қосты.
Парақорлықтың бизнеспен байланысты жүйелік кедергілеріне қатысты кездесуге салық, құқық қорғау мекемелері, қала әкімдігі мен қоғамдық ұйымдар да шақырылды. Жиын барысында жемқорлыққа байланысты нақты қылмыстық істер туралы мәліметтер айтылды. Мәселен, Мемлекеттік қызмет істері және сыбайлас жемқорлыққа қарсы іс-қимыл агенттігінің мәліметтері бойынша, жыл басынан бері Алматыда жемқорлыққа қатысты 156 қылмыс орын алған. Парақорлық жағынан қалада Алмалы, Бостандық және Медеу аудандары «көш бастап» тұр екен.
«Алматыда 2016 жылдың 9 айында парақорлығы үшін 871 лауазым иесі жауапқа тартылды. Оның 11-і республикалық, 53-і облыстық, 103-і қалалық және аудандық деңгейдегі қызметкерлер. Бұлар мемлекетке 33 миллиард теңге зиян келтірген. Шығынның 19,5 миллиарды кері қайтарылып, жеке мүліктері тәркіленді», – деді Мемлекеттік қызмет істері және сыбайлас жемқорлыққа қарсы іс-қимыл агенттігінің Алматы қалалық департаментінің жетекшісі Мақсатхан Анапин.
Агенттік жүргізген әлеуметтік зерттеулердің қорытындысына көз салсақ, жемқорлық індеті Маңғыстау облысында – 29%, Жамбыл облысында – 24% және Алматы қаласында 22%-ды құрайды. Керісінше, Солтүстік Қазақстан облысында парақорлық барынша төмен – 0,4%. Өкінішке қарай, соңғы 5 жылдың ішінде жемқорлықтың кесірінен көп көлемдегі қаржы қолды болып, 47 қылмыскер осы күнге дейін халықаралық іздестірілуде жүр екен.
Мемлекеттік қызметті ықшамдау мақсатында 3 деңгейлі іріктеуден тұратын конкурстық негіздегі мансаптық тағайындау үлгісі енгізілген болатын. Мемлекеттік мекемелерде жұмыс істегісі келетіндер алдымен заңдарды білуі, жеке адами қас-
иеттері арнайы сынақтан өтіп, осыдан кейін ғана әңгімелесуге шақырылады. Дегенмен, мемлекеттік қызметкерлер жалақысының 20-40 пайызға өсуі кадр алмасуын 2 есеге, команда ауысуын 27 есеге азайтқан. Елімізде сыбайлас жемқорлыққа қарсы стратегия қолға алынған кезде 59 түрлі заң қабылданғаны белгілі болып отыр.
Осы және басқа да шаралардың арқасында Transparency International әлемдік коррупциялық картасында Қазақстан қазір 168 елдің ішінен 123 орынға жылжыды. 2014 жылы 17 орынға төмен болатын. Ал парақорлықтың ең төменгі деңгейі Канада, Финляндия мен Германияда тіркелсе, керісінше, Ауғанстан, Судан және Венесуэла жемқорлық жағынан алғашқы үштікті бастап тұрған көрінеді.
Кездесуде Халықаралық валюта қорының бағалауынша, мемлекеттік сектордағы жемқорлық әлемдік ІЖӨ-нің 2 пайызын алып кететіні айтылды. Бұл Алматы қаласының жалпы өңірлік өніміне тең, демек, 79,2 миллиард теңге. Ал бұл қаражатқа 80 мектеп, 100 балабақша салуға немесе 500 шақырым жолды жөндеуге болады.
Айнаш ЕСАЛИ,
«Егемен Қазақстан»
АЛМАТЫ