17 қараша күні Түрік Республикасының Президенті Режеп Тайип Ердоған ресми сапармен Өзбекстанның Самарқан қаласына келді. Ресми ақпарат көздері екі күнге созылатын сапардың мақсатын екі ел қатынастарын нығайтып, жаңа деңгейге көтеру ретінде бағалап отыр.
Аталған сапар тек Түркия-Өзбекстан қарым-қатынастары жағынан ғана емес, сонымен қатар, түркі әлемінің келешегі, атап айтқанда, Түркияның Орталық Азиямен байланыстары тұрғысынан да маңызды деуге болады. Жоғары деңгейдегі кездесулердің өткізілуі түркі әлемінде халқының саны, мәдени және мемлекеттілік дәстүрлері жағынан ірі елдер болып саналатын Түркия мен Өзбекстанның саяси қатынастарына жаңа серпін береді. Бұл өз кезегінде сыртқы саясатта тепе-теңдік принципін ұстанатын, түркі әлемінде өзіндік орны бар Қазақстан үшін де айрықша маңызды болмақ.
Түркия Президенті Пәкістан мен Өзбекстанға ресми сапары алдында Анкара қаласында бұқаралық ақпарат құралдарына берген сұхбатында Өзбекстанға сапардың екі бауырлас ел арасындағы қарым-қатынастарға жаңа серпін береді деп үміттенетінін мәлімдеді. Р.Ердоған соңғы рет бұдан 13 жыл бұрын, яғни 2003 жылы Премьер-министр ретінде Өзбекстанда ресми сапармен болған еді. Сол сапарында екі ел арасында «Мәңгілік достық және ынтымақтастық келісіміне» қол қойылған болатын.
Түрік зиялы қауымы өкілдері үлкен үмітпен қарап отырған Өзбекстан сапарына Түркия президенті бастаған делегация құрамында вице-премьерлер В.Кайнак пен Т.Түркеш, Отбасы және әлеуметтік саясат министрі Ф.Б.Саян Кая, Сыртқы істер министрі М.Чавушоғлы, Экономика министрі Н.Зейбекчи және Энергетика және табиғи ресурстар министрі Б.Албайрак бар.
Самарқанда Түркия Президенті Режеп Тайип Ердоған Өзбекстанның Президенті қызметін уақытша атқарушы Шавкат Мирзиёевпен кездесіп, келіссөз жүргізді. Сапардың Өзбекстанды 25 жыл басқарған тұңғыш президент Ислам Каримовтің қайтыс болуынан кейін және елде 4 желтоқсанда өтетін кезектен тыс президенттік сайлау қарсаңында ұйымдастырылуы айрықша мәнге ие болып отыр.
Сапар барысында Түркия Президенті бір жағынан И.Каримовтің қайтыс болуына байланысты көңіл айтып, марқұм жерленген Шахи-Зинда мазарын зиярат етуге, екінші жағынан, Өзбекстан басшылығымен кездесіп, бір-бірімен жақынырақ танысуға мүмкіндік алды. Екі Президент шағын және кеңейтілген құрамда кездесулер өткізді.
Қос мемлекет басшыларының жоғары деңгейдегі өткізген кездесулері барысында Түркия мен Өзбекстан арасындағы екіжақты қарым-қатынастардың қазіргі ахуалы, келешегі мен басты бағыттары қарастырылып, аймақтық және халықаралық күн тәртібіндегі мәселелер бойынша пікір алмасылды.
Түркия мен Өзбекстан қатынастары әртүрлі күрделі кезеңдерді бастан өткізгені белгілі. Түркітілдес қос мемлекет арасында белгілі мәселелерге байланысты, өзбек оппозициясына қолдау көрсетілді деген күмәнмен кейбір түсініспеушіліктер орын алғаны тағы мәлім. Түркия тарапы бұл сапарда екі бауырлас ел арасында 2000 жылдарда орын алған мәселелерді оңтайлы шешіп, екіжақты ынтымақтастықты жаңа деңгейге көтеруге ниет етіп отыр.
1991 жылы Өзбекстан Республикасының тәуелсіздігін алғаш таныған мемлекет – Түрік Республикасы. И.Каримов өзінің президент ретіндегі алғашқы сапарын Түркияға жасағаны тағы бар. Өзбекстан президенті И.Каримов Түркітілдес елдер мемлекет басшыларының саммиттеріне де қатысқаны белгілі.
Түркия мен Өзбекстанды ортақ тарихи, мәдени және тілдік байланыстар біріктіреді. Түркияда бұрыннан бері тұратын, біразы Анадолының жергілікті тұрғынына айналған және тәуелсіздік жылдарында көшіп барған этностық өзбектер өз мәдени тамырларын ұмытпай, тарихи отандары – Өзбекстанмен байланысын жалғастырып келеді. Осыған орай екі ел арасындағы виза мәселесі де өз шешімін күтуде.
Сарапшылар тарапынан Түркия Президентінің сапары тек Өзбекстан үшін ғана емес, түркі әлемімен ынтымақтастық тұрғысынан да маңызды кезеңнің басы деп бағаланып отыр. Соңғы кезде Түркия «Еуразияға ашылу» саясатын қолдап келе жатқаны белгілі. Мұны кейбір түрік сарапшылары Түркияның жаңа «Шығыс саясаты» деп те атайды. Бұл қазіргі шиеленіскен халықаралық жағдайда Түркияның Батысқа тәуелділігін азайтып, тепе-теңдікті сақтау үшін қажетті қадам екендігі белгілі. Сөйтіп, Анкара қайтадан Орталық Азияға басымдық бере бастаған сыңай танытуда.
Түркияның Орталық Азияға прагматикалық мән беруінің астарында Таяу Шығыстағы оқиғалардың жанама әсері болуы мүмкін. Р.Ердоғанның алдымен Пәкістанға, кейін Өзбекстанға келуінің де өзіндік мәні бар. Түркия Ташкентке ДАИШ сияқты террорлық топтарға қарсы күресуде ықпалдасу жөнінде ұсыныс жасауы ықтимал. Осы тұрғыдан, екі ел ДАИШ пен аймаққа қатысы бар экстремистік топтар арасындағы байланыстарды және Ауғанстан факторын есепке ала отырып, қауіпсіздік саласында ынтымақтастықты тереңдете түсуге мүдделі. Яғни, Түркия мен Өзбекстанның ынтымақтасуы, Өзбекстанның қауіпсіздігі және Түркияның аймақтағы мүдделері тұрғысынан да маңызды.
Ш.Мирзиёев басшылығы соңғы кезде көршілес елдер Қазақстан, Қырғызстан, Тәжікстан және Түрікменстан тарапымен жиі кездесулер өткізіп, екіжақты және аймақтық ықпалдастықты арттырып, өңірлік мәселелерді шешуге ниет танытып отырғаны мәлім. Түркия да осындай оңтайлы сәтті пайдаланып, Өзбекстанмен қарым-қатынасқа соны екпін бергісі келеді. Түрік тарапы бұл жолы Анкараның негізгі басымдығының сауда-экономикалық байланыстарды дамыту екенін баса айтады.
Осы кезге дейін түрік-өзбек екіжақты экономикалық қарым-қатынастары саяси мәселелердің көлеңкесінде қалып келгені айқын. Екі ел арасында әр түрлі салаларда 90-ға жуық келісімшартқа қол қойылған. Яғни, саяси себептермен шектеліп келген қатынастардың әлеуеті біршама жоғары деуге болады.
Өзбекстан мен Түркия арасындағы саяси-экономикалық қатынастардың күрделілігіне қарамастан, екі ел арасындағы тауар айналымы 2015 жылы 1,2 миллиард доллар көлемінде болды. 2014 жылы Ташкентке сапармен келген Премьер-министр А.Давутоғлы тауар айналымын Түрікменстандағыдай 5 млрд долларға жеткізуді ұсынған еді. Қазіргі кезде Өзбекстанда тоқыма, құрылыс, азық-түлік, қонақүй ісі, құрылыс заттары, пластик, дәрі-дәрмек және қызмет салаларында түрік капиталымен жұмыс істейтін 700-ге жуық компания тіркелген. Ал Түркияда өзбек капиталымен 114 компания жұмыс істейді.
Түркия тарапы Өзбекстанға тоқыма, денсаулық, туризм, тері өндірісі салаларында, сондай-ақ, терроризмге қарсы күресте өз ұсыныстармен келуі мүмкін. Түрік кәсіпкерлері халқы 30 миллионнан асатын Өзбекстанда қосымша мүмкіндіктер мен үлкен әлеует барына сенеді. Кейбір дерекке сүйенсек, Түркия Өзбекстанның сыртқы саудадағы негізгі серіктестерінің бірі. Мысалы, Өзбекстанда мақта өндірісі және Түркияда тоқыма өндірісі бірлесіп, ортақ жобалармен жұмыс істей алады. Түркияның Өзбекстандағы құрылыс пен қызмет салаларына инвестиция құюға қызығушылық танытуы Ташкентке де тиімді. Өзбекстанмен білім, мәдениет және гуманитарлық салаларда да байланыстарды дамыту – Анкара мен Ташкентке өзара пайдалы.
2016 жылы Ресей мен Түркия қарым-қатынастарының жақсаруына Қазақстан Президенті Н.Назарбаев үлкен үлес қосқаны белгілі. Осы қыркүйек айында Елбасының Самарқанға арнайы сапармен баруы және Өзбекстанның Президенті қызметін уақытша атқарушы Ш.Мирзиёевпен кездесуі, кейін тағы Ш.Мирзиёевпен және Түркия президенті Р.Ердоғанмен телефон арқылы сөйлесуі Түркия мен Өзбекстанның жақындасуына өз септігін тигізді деп айтуға толық негіз бар. Бұл өз кезегінде Елбасы Нұрсұлтан Назарбаевтың мәмілегер саясаткер және түркі әлеміндегі көшбасшы екенін тағы бір мәрте дәлелдейді.
Жанат МОМЫНҚҰЛОВ,
түркітанушы