Парламент Сенатының Төрағасы Қасым-Жомарт Тоқаев Израильдің Қазақстандағы елшісі Михаэль Бродскийді оның өтініші бойынша қабылдады. Төраға Израиль Премьер-министрі Биньямин Нетаньяхудың желтоқсанда Қазақстанға жоспарланған алғашқы ресми сапарының маңызды сипатын атап өтті.
.Қ.Тоқаевтың пікірінше, алдағы жоғары деңгейдегі келіссөздер екіжақты ынтымақтастықты мүлде жаңа деңгейге көтеретін болады. Сенат басшысы парламентаралық байланыстарды одан әрі нығайту жайын да айтты.
Израиль елшісі Б.Нетаньяху сапары аясында бірқатар екіжақты келісімдерге қол қоюға әзірлік туралы хабардар етті. Сондай-ақ, Шимон Перес туралы қазақстандық және израильдік бұқаралық ақпарат құралдарында жарияланған естелік мақаласы үшін Сенат Төрағасына М.Бродский алғыс айтты.
Сол күні Қ.Тоқаев Жапония елшісі Итиро Кавабатомен де кездесті. Жүздесушілер Президент Нұрсұлтан Назарбаевтың қарашаның басындағы Жапонияға ресми сапары зор табыспен өткенін атап өтті. Қ.Тоқаев Токиодағы келіссөздер екіжақты ынтымақтастық саласында нақты нәтижелерге жеткізді деп санайды. Дипломаттың айтуынша, Қазақстан Президентінің Жапония Парламентіндегі жарқын да мазмұнды сөзін қос палатаның депутаттары ерекше жоғары бағалады.
Кездесу барысында жаһандық қарусыздану және ядролық қаруды таратпау саласындағы екі мемлекет ынтымақтастығының келешегі талқыланды.