Үкімет назарына
Өзібеков деп отырғанымыз – Қазақстан Республикасы Жер ресурстарын басқару агенттігінің төрағасы Өмірзақ Өзібеков. Сабаншиев деп отырғанымыз – осы агенттікке қарасты «Жер ресурстары және жерге орналастыру мемлекеттік ғылыми-өндірістік орталығы» республикалық мемлекеттік кәсіпорнының бас директоры Бағжан Сабаншиев. Дұрысы – бұрынғы бас директоры. Ал оны сергелдеңге салған – Агенттік төрағасының 2011 жылдың 24 қаңтардағы №8-л бұйрығы. Соңғы үш жылда еліміздің жер кадастрі мен мониторингін жүргізетін және бәсекелестік ортада тапсырыстар орындайтын «МемЖерҒӨО» РМК» бас директоры болып істеп келген Бағжан Сабаншиевтің тағдырын шешкен сол бұйрық. Қызметтен неге кетті? Бағжан Қожанұлы оның себебін өзі де түсінбейді. Негізінен, Жер ресурстарын басқару агенттігінің төрағасы Ө.Өзібековпен арадағы келісім-шарттың мерзімі үстіміздегі жылдың тамызында тәмамдалуы тиіс-тұғын. Бірақ төраға оның тағдырын сол тамызға жеткізбей шешіп тастаған. Арызын арқалап, «Егеменге» атбасын тіреген Сабаншиев араша сұрай келіпті. Оның айтуынша, қызмет еткен үш жыл ішінде оған бірде-бір рет әкімшілік шара көрілмеген. Ол басқарған кәсіпорынның жұмысы тек ілгерілеу үстінде болған. Тіпті, жұмысындағы жетістіктері үшін агенттік төрағасы оны 2010 жылдың желтоқсан айында Құрмет грамотасымен марапаттаған. Былайша айтқанда, оң қолымен сыйлық, сол қолымен бұйрық берген төрағаның бұл әрекеті тым түсініксіздеу болған сияқты. Осы түсініксіздеу мәселеге түсініктілеу жауап алу мақсатында агенттік төрағасына қоңырау шалдық. Кездесу ұйымдастыруды өтіндік. Келісілген күні, айтылған уақытта Өзібековтің қабылдау бөлмесінде болдық. Осы арада тағы да бір түсініксіздеу жағдай орын алды. Төрағаның шақыруымен ішке кіріп шыққан хатшы қыз маған төраға орынбасары Каналбек Райымбековке жолығуым керек екенін айтты. Арыз төрағаның үстінен жазылған. Арызға негіз болған бұйрыққа қол қойған да сол төраға. Сонда, орынбасар не айтпақ? Не де болса орынбасармен кездесуді ұйғардық. – Үстіміздегі жылдың 24 қаңтарында Жер ресурстарын басқару агенттігінің жабық түрдегі алқа мәжілісі өткізілді, – деп бастады әңгімесін Каналбек Өтжанұлы, – мұнда қаралған негізгі мәселе – «Жер ресурстары және жерге орналастыру мемлекеттік ғылыми-өндірістік орталығы» республикалық мемлекеттік кәсіпорнының бас директоры Бағжан Сабаншиевтің үстінен түскен арыз. Бұл арыздың иесі осы мемлекеттік ғылыми-өндірістік орталықтың Шығыс Қазақстан облысы бойынша еншілес кәсіпорнының директоры Ғалым Жадрин деген азамат. Оның жазуынша, Сабаншиев өзін негізсіз қудалаған. Республикамызда Бағжан Сабаншиев басқарған мемлекеттік ғылыми-өндіріске қарайтын 18 еншілес кәсіпорын бар. Бұл еншілес кәсіпорындардың директорлары сол Сабаншиевпен, яғни ғылыми-өндірістік орталығының бас директорымен жасаған келісім-шарт арқылы жұмыс істейді. Осы арыз түскеннен кейін біз агенттік тарапынан қызметтік тексеру жүргіздік. – Бұл тексеру қай кезде жүргізілді? Сабаншиев өзінің редакцияға жазған арызында оның жұмысына ешқандай тексеру жүргізілмегенін айтады. – Жадриннің арызы 2010 жылдың желтоқсан айында түскен болатын. Тексеру де сол кезде жүргізілді. Желтоқсан айының 15-ші жұлдызы әлде 20-сы ма, қазір есімде жоқ. – Сол тексерудің қорытындысы бар ма? – Қорытындысы бар. Оның қорытындысы жабық алқа мәжілісіне қатысушыларға таныстырылды. Қорытынды бойынша біздің салалық департаменттер соның ішінде Жерге орналастыру және мемлекеттік бақылау жөніндегі департаменттің бастығы өзінің қорытындысын берді. Сабаншиевтің айтуы бойынша 18 еншілес кәсіпорынның ішінде ең төменгі көрсеткіш Шығыс Қазақстан облыстық еншілес кәсіпорнына тиесілі дейді. Дегенмен, оның бұл уәжі дәлелденбеді. Себебі, аталған еншілес кәсіпорынның көрсеткіші жоғары да емес, төмен де емес, орташа көрсеткішке ие екені тексеру арқылы анықталды. Екінші мәселе Сабаншиев мырза өзіне қарасты сол 18 еншілес кәсіпорынның 17 директорымен 3 жылға келісім-шарт жасайды да, ал Жадринмен 1 жылға келісім-шарт жасап отырған. Біздің заң басқармасының қорытындысы бойынша бұл ретте Еңбек кодексінің 29-шы бабын Сабаншиевтің бұзғаны анықталып отыр. Неге бұлай? Неге 17 кәсіпорын директорымен 3 жылға, ал Жадринмен 1 жылға шарт жасасып отырған? Оның себептері Жадриннің қызметтік жазбасында көрсетілген, ол өзінің осы арызында Сабаншиев тарапынан оған бопсалау жасалғанын айтқан. Сабаншиевтің бұл әрекеттері үлкен алаңдаушылық тудыратын мәселе. Жабық алқа мәжілісінде агенттік төрағасы өзінің атына «домалақ» (анонимка) арыздың түскенін және онда да осыған ұқсас бопсалаушылық мәселелердің болғанын айтты. Бұл жағдайлар уақытында Сабаншиевке ескертілген. Бірақ, өкінішке орай, бұрынғы бас директор бұдан нәтиже шығармаған. Яғни, ескертулерді ескермеген деуге болады. Өзіңіз байқап отырған боларсыз. Мен мына алдымдағы хаттама, яғни, жабық алқа отырысының хаттамасына сүйеніп сөйлеп отырмын. Осы хаттамада Сабаншиевтің Жадринге орынсыз тиісетіндігі жазылған. «Сенің қазақтық қаның жоқ. Күректей дипломдарымен қазақтың жігіттері жұмыссыз жүргенде жастары зейнеткерліктен асып кеткен өзгелерді ұстап отырсың» деген сияқты Жадриннің ар-намысына тиетін сөздер айтқан. Айта кететін тағы бір мәселе, Сабаншиев өзінің редакцияға жазған арызында ешқандай әкімшілік шара алмағанын айтады. Сабаншиев мырзаның бұл сөздерінің негізсіз екенін дәлелдей аламын. Мәселен, Жадрин тарапынан мұндай арыз 2009 жылы да жазылған. Сол жылғы 3 сәуірде агенттік төрағасының бұйрығымен комиссия құрылып, Сабаншиевке қатысты қызметтік тексеру жүргізілген. Сол тексеру нәтижесінде 22 сәуірде Сабаншиевке қатаң ескерту берілген. Сондай-ақ 2009 жылдың 4 мамырында №74-б бұйрығымен Ақмола еншілес кәсіпорнында анықталған өндірістік қателерге және қаржылық кемшіліктерге байланысты оған ескерту жасалған. Сонымен қатар, 2009 жылдың 7 шілдесі күні №114 бұйрық бойынша Сабаншиевке Алматы қаласындағы еншілес кәсіпорнында орын алған жемқорлыққа байланысты қайтадан екінші рет ескерту жасалған болатын. Сондай-ақ ол кісі осы жұмысқа келгелі бері біздің өзіміздің тарапымыздан жасалған тексеру жұмыстары нәтижесінде осы мемлекеттік ғылыми-өндірістік орталыққа қарайтын 7 еншілес кәсіпорнында анықталған кемшіліктер бір-біріне ұқсас кемшіліктер болып шықты. Сондықтан бұлар жүйелі кемшіліктер деп аталады, оларды жоюға бұрынғы бас директор Сабаншиев тарапынан әрекет жасалмаған. Мұндай кемшіліктер туралы агенттіктің 2008 жылғы 30 шілдедегі №2 қаулысында, 2009 жылғы 19 қаңтардағы №1 қаулысында, 2009 жылғы 31 наурыздағы №2 қаулысында, 2010 жылғы 20 қаңтардағы №1 қаулысында, 2010 жылдың 22 шілдесіндегі №3 қаулысында және де 2010 жылдың 28 қазандағы №4 қаулысында көрсетілген болатын. – Сабаншиевтің бас директор қызметіне тағайындалғаннан бастап, кешегі қызметтен кеткенге дейінгі аралықтағы кемшіліктері жөнінде айтып отырсыз. Осындай ескертуден көз ашпаған адамды агенттік төрағасы Өмірзақ Өзібеков 2010 жылдың 16 желтоқсаны күні Құрмет грамотасымен марапаттаған ғой. Мұндай қарама-қайшылықты қалай түсінуге болады? – Бұл жердегі мәселе мақтау грамотасын берді екен деп, оның жұмыстағы кемшіліктеріне көз жұмып қарамауымыз керек. Мақтау грамотасы салалық жұмыстағы көрсеткіштерге байланысты берілген. Жасыратыны жоқ, Сабаншиевтің жұмысында жетістіктер бар. Өндірістік көрсеткіштері жоғары. Оның жасаған жұмыстары бұрнағы жылдармен салыстырғанда ілгерілеп отырғанын да мойындаймыз. Дегенмен, бұл мақтау қағазы да, жұмыстағы жетістіктері де өзі жіберген кемшіліктер, әсіресе, жемқорлыққа байланысты бопсалаушылықтарын ешқандай ақтай алмаса керек... Оқырман қауымға түсінікті болу үшін агенттік төрағасының орынбасары Каналбек Райымбековпен болған әңгіменің диктофонға жазылған үлгісін толық жариялап отырмыз. Сондықтан бұл әңгімені талқылаудың қажеті де бола қоймас. Осы кездесуден кейін арыз иесімен ұшырасып, кейбір мәселелерге байланысты түсінік алуды ұйғардық. – Мен Шығыс Қазақстан облыстық еншілес кәсіпорнының директоры Ғ.Жадринді қудалайтындай әрекеттер жасағаным жоқ, – деді Сабаншиев бізбен әңгімесінде. Онымен жасалған келісім-шарт мерзімі 2010 жылдың 29 желтоқсанында аяқталды. Осыған байланысты тағы бір жылға келісім-шарт жасалды. Неге? Себебі, Ғ.Жадрин басқаратын Шығыс Қазақстан облыстық еншілес кәсіпорны қаржы-шаруашылық жоспары бойынша 550 миллион теңгенің өнімін өндіру керек болса, бұл жоспарды ол 20 миллион теңгеге кем орындады. Сондықтан Ғ.Жадринмен бірден үш жылға емес, бастапқыда бір жылға келісім-шарт жасауды ұйғардым. Жұмысын жөндесін, көрсеткішін жақсартсын деген мақсатпен. Ал оған өзге ұлт өкілдерінің кадрларын жұмыстан шығарып, тек қазақтарды ғана жұмысқа қабылда деген сөзді айтқаным жоқ. «Зейнет жасындағы адамдарды ұстап отырғанша, қолдарында күректей дипломдары бар қазақтың жігіттерін неге жұмысқа алмайсың» деп айтқаным рас. Ұлттық кадрларға қолдау жасау керек екенін және оларды өсіріп, тәрбиелеу қажет екенін ылғи да айтып келемін, қазір де айтарым сол, мүмкіндік туып жатса, алдағы уақытта да сол бағытымды өзгертпеймін. Тағы да қайталап айтамын, біз ұлттық кадрларымыздың өсуі һәм өркендеуі үшін барлық мүмкіндіктерді жасауымыз керек. Менің бұл сөзім, өзге ұлт кадрларын қудалау арқылы деген сөз емес, менің айтпағым – зейнеткерлерді демалысқа жіберу арқылы жастарды жұмысқа тарту. Әлбетте, зейнеткерлерге құрмет көрсетіп, шамаң келсе, шапаныңды жауып, алғысыңды айтып шығарып сал дегенім рас. Бұл тек қана Жадринге айтылған сөз емес. Барлық директорларға осылай айттым. Шығыс Қазақстан облыстық еншілес кәсіпорнындағы жағдай Павлодарда да, Солтүстік Қазақстан облысында да, Ақмола, Қостанай облыстарында да, тіпті Астананың өзінде де бар. Бірақ сол облыстардағы еншілес кәсіпорын директорлары бұл тығырықтан шыға білді. «Өгізді де өлтірмей, арбаны да сындырмай» кадр дайындаудың мүмкіншілігін тапты. – Сіз өзіңіздің редакцияға жазған арызыңызда қызмет еткен мерзіміңізде агенттік төрағасы тарапынан ешқандай сөгіс немесе ескерту алған емеспін дейсіз. Ал агенттік төрағасының орынбасары Каналбек Райымбеков сізге бірнеше мәрте қатаң ескерту де, сөгіс те берілгенін айтады... – Агенттік тарапынан маған ешқандай тәртіптік шара көрілген емес. Соған қарағанда сырттан жазалай салатын әдеттері болса керек. Себебі, менің жұмысымды тексеріп, акті жасап, түсінік алған емес. Егер ондай құжаттары болса, көрсетер еді ғой. Қазақстан Республикасының Жер ресурстарын басқару агенттігі төрағасы Ө.Өзібеков мені қызметтен босату жөніндегі бұйрықты осы агенттіктің 2011 жылғы 20 қаңтарда өткен кеңейтілген алқа отырысының қаулысы және агенттіктің жабық алқа отырысының 2011 жылғы 24 қаңтардағы №2 хаттамасына негіздеп шығарған. Бірақ осы екі құжатты да маған таныстырған емес. Себебін өзім де шамалаймын. Өйткені бұл құжаттарға сүйенетіндей төрағаның негізі жоқ... ... Бұл мәселеге байланысты алып-қосарымыз жоқ. Пікір білдіруді де қажетсінбеген едік. Дегенмен, Сабаншиевті сергелдеңге салған сол бұйрықтың шикілігі байқалып тұрғандай. Олай деуімізге себеп, адам тағдырын шешіп отырған сол бұйрықтың Сабаншиев айтқандай негізі әлсіздеу сияқты. Негізі әлсіз нәрседе нақтылық болмайды. Ал нақтылық болмаған жерде түсініксіздік пайда болады. Сол түсініксіздік – Сабаншиевтің айыбы неде, кінәсі қайсы деген сұрақтарға нақты жауап болмағандықтан туындап отыр. Редакциядан: Мақалада көтерілген мәселе бойынша Б.Сабаншиев өзіне қатысты агенттік төрағасының бұйрығын заңсыз деп табу жөнінде сотқа жүгінген екен. Осыған байланысты соттың шешімі шыққаны және бұл шешім бойынша Б.Сабаншиевтің талабы қанағаттандырылғаны туралы хабар келді. Астана қаласы Есіл аудандық сотының судьясы А.Сүлейменовтің төрағалығымен болған сот отырысында Бағжан Қожанұлы Сабаншиевті қызметіне қайта тағайындап, мәжбүрлі бос жүрген күндерінің жалақысын, ақшалай өтемақысын төлеу, моральдық шығынды өтеу жөнінде шешім қабылданыпты. Сонымен Сабаншиевті сергелдеңге салған Өзібековтің бұйрығы бұзылды. Құқықты мемлекетте солай болуға тиісті де. Шарафаддин ӘМІР.Аймақтар • Кеше
Зерде • Кеше
Қоғам • Кеше
Қоғам • Кеше
Оқиға • Кеше