Голливудта фильм түсірді

Хайрулла-Сұлтан Хисами – АҚШ-тың Нью-Йорк кино академиясының 3-курсында білім алып жүрген маңғыстаулық жас. Талантын іспен дәлелдеуге ұмтылған ол Голливудта түсірілген «Ақырғы күнә» атты қысқа метражды фильмінің тұсауын туған жеріне келіп кесті. Бюджеті 3 мың долларды құрайтын кино батыстық стильде түсірілген, ал мағынасы жағынан қатыгездіктен аулақ болуға және жасалған күнәні кешіруге үндейді. Фильм сюжеті кейіпкерлер – қыдырумен күнә жасаған діндар мен оның ұлы арасында өрбиді. Күнә араласқан қиындықтан кешірім, мейірім және төзімділікпен күресу арқылы шығу жолы ұсынылады. Калифорнияның даласында түсірілген кино үшін небәрі бір-ақ күн жұмсалған. «Ең басты қиындық – күннің қатты ыстық болуы еді», дейді Хайрулла-Сұлтан Хисами. Әзірге жабық көрсетіліммен жұртшылық назарына ұсы­нылған фильмді 200-ге тарта ақтаулық тамашалап, оң пікір­лерін білдірді. Жас талант­тың шетелде алған білімін дамытып, тырнақалды туындысын жарыққа шығарып үлгергеніне қуанып, мұны өңір өнеріне жаңа да жас таланттың қосылуы деп бағалап жатты. Кино соңынан Назарбаев зияткерлік мектебінің 11-сынып оқушысы Дамир Бешаковпен бірге шеберлік сыныбын өткізген Хайрулла-Сұлтан өз арманы туралы бөлісіп, арманға жету жолындағы табандылық туралы әңгімеледі. Гүлайым ШЫНТЕМІРҚЫЗЫ, «Егемен Қазақстан» Маңғыстау облысы  Суреттер tumba.kz сайтынан алынды