Универсиадада ұсынылатын ас мәзірі анықталды

Алматыда Универ­сиа­да-2017 ойындарына қаты­са­тын спортшылардың бір күн­дік калория нормасы талаптары анық­талды. Дирекция мәліметіне қа­рағанда, 4000-4500 калория аралығында болады. Ен­ді атлеттер үшін ас мәзірін дайындаған кезде осы норма ескеріледі. Спортшыларға арналған тәуліктік тамақтану нормасында ет, сүт өнімдері, астық бұйымдары секілді маңызды өнімдер қарастырылған. Сон­дай-ақ, атлеттердің дұрыс зат алмасуын сақтау үшін оларға пайдалы сусындардың барлық түрлері ұсынылады. Осылайша қысқы ойындар 110 000 килограмға дейінгі мөлшерде ет өнімімен, соның ішінде қой, жылқы, тауық және күркетауық еті­мен қамтамасыз етіледі. Уни­версиада-2017 спортшылары мен қатысушыларына арналған тағам үлестіру бекет­теріне шамамен 6100 кг-ден ұн өнімі мен 60 000 кг-дан астам сүт өнімі жеткізіледі. Универсиада кезінде спортшылар мен ресми делегациялар мүшелері, FISU техникалық делегаттары, халықаралық тех­никалық мамандар (ITOs), ұлттық техникалық маман­дар (NTOs), еріктілер, БАҚ өкілдері, медициналық қыз­меткерлер, Ұйымдастыру комитеті, FISU Family өкілдері тамақтандырылатын болады. Сондай-ақ, Атлеттер ауылында қазақтың ұлттық, еуропалық жерортатеңізілік, азиялық, веге­териандық және халал се­кіл­ді бес тағам түрлерін дайын­дайтын 1000 орынға шақталған асханалар жұмыс жасайды. Универсиада еріктілері үшін тамақтандыру ланч-бокстар түрінде ұсыны­лады. Сондай-ақ, әрбір ны­сан­­ның коммерциялық ай­ма­ғында көрермендер мен жан­күйерлерге арнап тамақтандыру ұйымдас­ты­рылады. Сондай-ақ, Алматы қала­сының Тұтынушыларды қор­ғау департаментімен бір­­лесе отырып, Уни­вер­­сиада-2017 ойындары кезінде Тамақ­тандыруға бақылау жүргізу жөніндегі бірлескен іс-ша­ралар кешені дайындалды. Осылай­ша спорт­шылар мен қонақ­тар­­­­дың санитарлық-эпи­демиологиялық саулығы қам­тамасыз етіледі. Нысан­дар­да гигиеналық нор­матив­тер­дің қаншалықты сақталып отыр­ғандығын тексеру бағы­тында зертханалық зерттеулер мен аспаптық өлшемдер жүргізіледі. Айнаш ЕСАЛИ, «Егемен Қазақстан» АЛМАТЫ