Береке бастауы – бірлік

Ақтөбеге жұмыс сапарымен келген Парламент Мәжілісі Төрағасының орынбасары Владимир Божко Достық үйінде этномәдени бірлестіктер және қоғамдық ұйымдар басшыларымен кездесті. Кездесуді жүргізіп отырған облыс әкімі Бердібек Сапарбаев жиналғандарды облыстың өткен жылғы экономикалық-әлеуметтік даму көрсеткіштерімен таныс­тырды. Оның айтуынша, негізгі көрсеткіштер толық орындалған, Елбасы назарда ұстап отырған еңбекақы, зейнетақы, жәрдем­ақы және шәкіртақы төлеуден бере­шек жоқ. Аумақ басшысы, сон­дай-ақ, облыстағы 18  этно­мәдени бірлестіктің өңірдегі ұлт­аралық татулық пен қоғамдық-саяси тұрақтылықты қамтамасыз етудегі белсенді жұмысын атап өтті. Облыстық Қазақстан халқы Ассамблеясы хатшылығының мең­герушісі Бұлбұл Елеусінова өткен жылы атқарылған жұ­мыстардан хабардар етті. Ол өңірде 90-нан астам ұлт тұра­тынын, этномәдени бірлес­тік­терде жұмыс істейтін жеті жек­сенбілік мектепте мемлекеттік және этностардың ана тіл­дері оқытылатынын, жеті көркем­өнерпаздар ұжымының халықтық және біреуінің үлгілі атақтары бар екенін жеткізді. Кездесуде тарих ғылым­дарының докторы Н.Абдоллаев, «Қазақстан корейлері» ассоциа­циясы облыстық филиалының төрағасы К.Цхай және басқалар сөз сөйлеп, тыныштық пен бірлікті нығайту, жастарды теріс діни ағымдардан сақтандыру туралы ойларын ортаға салды. Өңір басшысы В.Божконың Парламент Мәжілісіне Қазақстан халқы Ассамблеясы атынан сайланған депутат екенін тілге тиек ете келіп, астаналық қонақ­қа сөз кезегін ұсынды. Алдың­ғы сөйлегендердің ұсыныс-пікірлерін таразылай ой өрбіт­кен  В.Божко еліміздегі сүттей ұйы­ған бірлік пен тұрақты­лықты нығайтудағы және Ел­басы сая­саты мен мемлекеттік бағ­дар­ламаларды жүзеге асырудағы Қазақстан халқы Ассам­блея­сының рөліне  айрықша тоқ­талды. Ол әр адаммен жеке жұ­мыс істеу қажеттігін алға тарта келіп, лаңкестіктің алдын алу үшін діни сауаттылықты қалып­тас­тыру мәселелеріне назар аударды. Сатыбалды СӘУІРБАЙ, «Егемен Қазақстан» АҚТӨБЕ